Уттигъанну Дагъусттаннал Техникалул университетрал Аьралий кIулшивурттал центрданийн (ВУЦ) увкIунни Чувшиврул шанна ордендалул заллу, Аьрасатнал Виричу НурмахIаммадлул ппу Энгельс ХIажимахIаммадов.
Университетрал ректор Назим Баламирзоевлущал ва ВУЦ-рал каялувчитуращал ванал ххал дунни центрданий цукун най дурив дуккаву, ххал бунни аудиторияртту ва техникалул дузалшинна.
ДакIнин бутан, центрданул ца аудитория Аьрасатнал Ви­ричу НурмахIаммад ХIа­жи­ма­хIаммадовлул цIаний­ссар.
Жунма кIулссар, гвардиялул хъунама лейтенант, гвардиялул десантно-штурмовой Ккавкказуллал казачий полкрал 247-мур роталул командир НурмахIаммадлул къучагъшиврий жан дуллуссар хасъсса аьралий операциялий. Ванал полк цалчинминнувух тIайла бувккун бивкIссар Донецкаллал ва Луганскаллал республикардал мюхчаншиву дуруччин.
Февральданул 24-нний Нур­махIаммадлул БМП нанисса колонна гуж ххишаласса душманнайн тIайла дарцIуссар. Ва талатавриву НурмахIаммадлуйн захIматсса щаву дирссар. Мукунсса тагьарданий унува, махъра-махъсса патрон харж даннин, НурмахIаммад душманнайн данди авцIуну ивкIссар. Ца граната лирчIсса чIумал, цувагу, лагма лавгсса украиннал боевикталгу пIякь учин бувссар. Мунийну душманнал вив лавсъсса ванал аьралий дустураща ххассал хьун бювхъуссар.
Виричунал буттал Энгельслул ихтилат бунни курсантътуращал.
– Энгельс МахIаммадовичлул арс хьуссар хасъсса операциялий цалчин Аьрасатнал Виричунал цIа ларсъсса аьраличу. Ванал къучагъшиврия кIулссар щалагу жула билаятрай, ва эбратну ккаккан уллай буссар жагьилсса никиран. ХIакьину цала къучагъсса арсная, мунал аьралий ххуллия, хьхьичIуннайшивурттая бусантIиссар зухь Энгельслул. НурмахIаммад кунмасса аьралитал чувшиврул ва Ватан ххирашиврул, къуллугърал буржру дакI марцIну бартбигьаврил эбратну хьун аьркинссар, – увкунни ректорнал, курсантътал Виричунал буттащал кIул буллай.
Хъирив Энгельслул бувсунни НурмахIаммадлуя.
– НурмахIаммад чIивинийва ия аькьлу-кIулшилул увччусса, бюхъу-хъит бусса оьрчI. ЧIивисса чIумала аьраличу хьунна тIий икIайссия. Цахъи хъуна хьуну махъ на му кIул увссия, та ппурттуву Гьавалул ва десантрал аьралуннаву къуллугъ буллалисса, цIана Аьрасатнал обороналул министрнал хъиривчунал къуллугърайсса Юнус-Бек Евкуровлущал. Та чIумал ччан бивкIуна арснан цала оьрму гьавалул ва десантрал аьралуннацIун бахIин, Воздушно-десантное училищалувун уххан. Цалчинсса курсрайва ва взводрал командирну ивтуна, спортрал ххуллий ххуйсса ккаккияртту чIалачIи дурна. Училище къуртал бувну махъ, кIийла гьан увна Сириянавун. Мичча увкIун махъ, шиннардиха къалавхьхьуну, оьрмулул хъунасса инсан куна къуццу тIий ия. Цала чIунархIал оьрчIру, миннал ихтилатру ванан ялттутувану чIалай бия. Дяъви ккавксса, дустурацIа хьусса вин хъиннува бувчIлачIиссар оьрмулул кьадру-кьимат ттуйнува кIулли – тIий усси­яв на мунахь, – буслай ур Энгельс МахIаммадович.
Мяйжаннугу, Энгельс Х1ажи­махIаммадов цува ур аьралий къуллугърал бурж, аьраличунал хъа, яхI цирив кIулсса хIаписар. Ванал къуртал бувну бур Аьрасатнал Виваллил иширттал министерствалул ва ПаччахIлугърал къуллугърал академияртту.
Зий ивкIун ур Чачаннал, Къабардин-Балкьарнал, Ингушетиянал Виваллил иширттал министерстварттай. Лайкь хьуну ур шанна «Чувшиврул» ордендалун, «За отвагу», «За боевые заслуги» медальлан.
– Ттул арснал чувшиврий жан дуллунни. Гьай-гьай, арс оьрмулуцIа шаву ттун хъинну кьурчIину бур. Ганал жан дуллуссар хIакьсса хIаписарнал кунна, рухI дуссаксса къуллугърал бурж бартбигьлай, Ватангу, аьралий дусталгу буручлай, – тIий ур Виричунал ппу.
«Ххуйну дуклакияра, спортрахун багьияра, лахьлахьияра зула дин, республикалулгу, билаятралгу тарих, Ватан ххирану, зулагу, зула кулпатралгу оьрмурдах, тIуллах жаваб дулун кIулну бикIияра, – оьвчаву дунни Энгельслул курсантътурайн.
Ихтилат къуртал буллай, ванал барчаллагь увкунни Дагъусттаннал Техникалул университетрал ректорнахь Аьралуннал КIулшивурттал центр тIивтIуну, му аьркинмунил дузал баврихлу.
– Центрданул даву гихуннайгу лавайсса даражалий дачин дан ттущава шайсса кумаг нагу банна. Укунсса идарарттал бияла хъунма­ссар жагьилсса ник Ватан ххирану тарбия давриву, – увкунни ванал.
Андриана Аьбдуллаева­