Дагъусттаннал Росгвардиялул управлениялий хьунни кIанттул органналул хъунаманан кIанайсса полковник Антон Зуевлул пресс-конференция. Ванал дунни Управлениялул подразделениярттал шинал лажиндарайсса хIасиллу.
ХIаписарнал бусласимунийн бувну, кIанттул управлениялул подразделениярттал федерал органнал зузалтращал хIала-гьурттуну региондалий 3 азарунния ливчусса бигарду бартбивгьуну бур. Управлениялул зузалтрал мукунма бартбивгьуну бур чIявусса инсантал бавтIсса мероприятиярттай (Аьрасатнал президентнал бувчIавурттай, культуралул, спортрал мероприятиярттай, диндалул ва цаймигу байраннай) жяматийсса низам ва мюхчаншиву дуруччаву мурадрайсса 2 азаруннийн бивсса бигарду.
Терроризмалущал талатаврил ххуллий МахIачкъалаллал соединениялущал ва Дагъусттаннал Виваллил иширттал министерствалул подразделениярттащал бартбивгьуну бур 1400-нния ливчусса бигарду. ФСБ-лул дазул управлениялущал, МВД-лул линейный управлениялущал ва Росрыболовствалул Ухссавнил Ккавкказуллал кIанттул управлениялущал цачIу хъуннасса даву дурну дур Каспий хьхьирий, Терек ва Сулакь неххардий закондалуцIун къабавкьуну щинал луртанну дуккаврин ххуллу кьукьин. Ва ххуллий дурсса даврил хIасиллайн бувну, тахсиркаршиврий щак багьлай увгьуну ур 19 инсан, административ жавабрайн увцуну ур 874 инсан, зевххуну бур закондалул ххуттава бувккун балугъ бугьлагьиний ишла буллалисса 764 ярагъ ва 11 тонна балугърал.
Полковникнал бувсунни шинал дянив вневедомственный къаралданул ва ЛРР-данул (лицензионно-разрешительной работы) подразделениярдал дурмуния.
Вневедомственный къаралданул зузалтрал бурувччуну бур 4 азарунния ливчусса объектру, инсантал ялапар хъанахъисса ва миннал хъус дусса кIанттурду, автотранспорт.
Лицензияртту ва ихтиярду дулайсса даврил подразделениярттал зузалт щаллусса шинай 95 азарунния ливчусса ярагъ бусса инсантурал ялув бацIаву дуллай бивкIссар, мукунма ххал буллай бивкIссар ихтиярду дулайсса системалул 130 объект.
– 2024-ку шинал ЛРР-данул зузалтрал полициялул участковыйтуращал архIал, заллухъруннал цукунсса шартIирдай ябуллай бурив ярагъ кIул баву мурадрай, 37 азарда ххалбигьаву дурну дур. Дуллуну дур 15 азарунния лирчусса лицензияртту, 34 азарда ихтияр, 3700 частный охранникнал удостоверение, – кIицI лавгунни Антон Зуевлул. Мукунма ванал бувсунни 2024-ку шинал къуллугърал буржру лайкьну бартбигьлай тIий Росгвардиялул управлениялул 798 зузала ва аьралийтуран паччахIлугърал ва ведомстволул наградартту дуллушиву.
Хъуннасса даву дуллай бур Управлениялул подразделениярттал зузалт жагьилтал Ватан ххирану тарбия баврил ххуллийгу. Республикалул школардай Управлениялул хъунама, генерал-майор Александр Ореховлул сипталий сакин бувну бур Росгвардиялул хасъсса 14 класс. Шинал лажиндарай Росгвардиялул зузалт профильный классирттал оьрчIахь дихьлай бур Чувшиврул дарсру, сакин дуллай бур миннан цала подразделениярттавунсса экскурсиярду, буллай бур спортрал бяст-ччаллу. Росгвардиялул жагьилсса зузалт ва аьралитал Ватан ххирану тарбия шаву мурадрай, подразделениярттал зузалт гьуртту хьуну бур Аьрасатнал, региондалул ва ведомствалул дуллалисса 44 акциялий.
КIицI лаган, ляличIисса къулагъас дур спортрал масъалалух. 2024-ку шинал подразделениярттал зузалт гьуртту хьуну бур Аьрасатнал Нацгвардиялул Ухссавнил Ккавкказуллал округрал личIи-личIисса спортрал 11 чемпионатрай.
Антон Зуевлул кIицI лавгунни ялун нанисса шинал хьхьичI ххуттайн ласунтIисса масъаларттугу. Ххишаласса къулагъас, гьар мудан кунна, дикIан тIий дур терроризмалущал ва экстремизмалущал талатаврил, жяматийсса низам ва агьалинал мюхчаншиву дузал даврил масъаларттах, мукунма хасъсса аьралий операциялий гьурттушинна даврих.
Ихтилат къуртал буллай, полковникнал барчаллагь увкунни региондалул СМИ-дал вакилтурахь кIанттул органдалул подразделениярттал даву тIайлану аьч дуллай тIий ва барча бунни ми ялун нанисса ЦIусса шинащал.
Андриана Аьбдуллаева
