СунбатIлив Мудунхъал ХIусайннул ва Камилатлул кулпатраву бувна 4 арс ва 3 душ. Кулпатрал маэшат, колхозравугу зий, ризкьилия бия.
Байбивхьуна Буттал кIанттул цIанийсса Хъун дяъви. ХIусайннул ва Камилатлул арсру – Жамалуттин, Сайпуллагь, Давуд дяъвилийн бувцуна. КIира шин хьуннин, Жамалуттиннул ва Сайпуллагьлул Ватандалухлу чувшиврий жанну дуллуссар тIисса чагъарду бувкIуна. Давуд дяъвилия, контузиягу хьуну, ххуйсса наградарттащал зана хьуна. Ванан дуллуну дия «ЯтIул ЦIукул» 2 орден, «Ушаковлул цIанийсса орден», «Буттал КIанттул цIанийсса Хъун дяъвилул орден» ва тамансса медальлу. Давудлул арсваврал, МахIаммадал ва Жамалуттиннул, Совет аьралуннаву бурж лавхъссар.
ЦIана ванал арснан, Артурдун, «Дагъусттаннал халкьуннал Виричунал цIа» дуллуну дур. Украиннаву хасъсса аьралий операция байбивхьуния шийнай ва националистътуращал талай уссар. Тихун гьаннингу «Жуковлул медаль» ларсун дур Сириянаву талай. Ва бакъарив шяраваллингу, нитти-буттангу, уссур-ссуннангу пахру. Буттахъая ирсирай нанисса ватан дуруччултрал, патриотътурал кюру хьунни ХIусайннул къатригу, лякьлуя бивзсса наслугу. ЧIа учинну ххаллилсса сунбатIличу Артурдун цIакьсса цIуллушивугу, ватан ххирашивугу. Аскисса душмангу ххит увну, ххувшаврищал нитти-буттачIан цIуллуну, сагъну зана хьуннав ина, Артур!
МахIмуд Аьлилов
