Абачара ХIусайнаев

КIи дядирзун махъ

Кьунну Кьилвалухату
Гъилисса хIукъу бувккун,
Лухччи ва ссав цукуннив
Ца яну-кIукIлу хьунни.

Баргъ къабияй ратIувсса
НякI микIирал дагьани,
КIилчин дази къагьанну,
Жири-жири дагьунни.

Дюхлай бур ппал къарихъул,
Ккур тIий бур чIуллух зукри,
КкурчIав нахIу хавардай
Гъили бувну бур къужри.

СсунтI чавай, тIанкI учавай,
ТIиринт бишлай бур кьунча,
Ниттил маз бивтсса ттарал
ЦIай тIий дур танил бурхIай.

Валттувух хъи ликIавай,
Щях ссан ришлан бикIавай,
Бугъа бур хан-паччахI ххай,
«Бу-у…» тIий, байгьин къашавай.

Шяравух дурккун найсса
Оьлуркъу щинал ратIру,
Баргъ ялату лагайхту,
Ду-дунийра тартунни.

БяшкIанттуя кIунтIа тIий,
Дарссуну дагьавайсса
Зюрукъяйндалул щути
КIиккура микI ларчIунни.

Арив, зунттуй, зунчалу
ЧантI учавай дур тIутIив,
СсунтIа тIий бугъа буна,
Интнил кьанкь ттун ришлай дур.

Бадави Рамазанов

КIинттул

Бухвалагавай бур баргъ,
Ятин хханссар жула баргъ,
Ургу, зунттугу ххал ба,
Магъи хханссар марххала.

БакIуй бавцIун бур вяркъу,
Ганин дакъарвав дяркъу?
Нагу дакьин дав чана,
Гьунттий ччеххулийн гьанна.

Жу дарсирайн бачиннин
Дадалгу дувай дукра,
КIинттул канан буччиннин
Интту бугьайссар гьанна.