Бюхъай на гьашинусса шинал «Илчилийнсса» махъра-махъмур макьала чичлай бикIангу. ЦIусса шинал байрандалун хас бувсса номер бухьувкун, ци-дунугу дахханасса, цахъи тяхъа-шадсса дикIан аьркинни. Шинал лажиндарай чичлай бивкIру пашманмуния, кьурчIимуния, къумамуния. СВО най буссаксса, дунияллий дяъвилул къавгъарду, питнарду, исламистътурал-радикалтурал, щаллагу дунияллийсса терроризмалул тарап дургьуминнал ва муттаэтурал къалмакъаллу дуссаксса, ххаришивурттугу къаххарисса дунутIий, байраннугу къабайрансса.
Буккулт шинал ахирданийвагу бялахъан бан, тяхъа бан аьркинни. Темагу цурда дуркIунни. Яла ччанавккумур, чIявусса бястру буллали бувмур. Аьрасатнал РувхIаний управлениялул (ДУМ) чIярусса хъами дуцин ихтияр дуллалисса шариаьтрал хIукму – фатва. Декабрьданул 19-нний Москавуллал муфти Илдар Аляутдиновлул баян бунни, ДУМ-рал кIира-шанна щарсса дуцин ихтияр дуллалишиву. ВанацIун авкьуну, Аьрасатнал Бусурманнал рувхIаний управлениялул хъунама, щайх Равил Гайнуттиннулгу кIицI лавгунни, кIира-шанна щарсса дуцинсса къадагъа дакъашиву, дуниявийсса (светский) законнал кьаралданува буклакисса иш бакъашиву. Амма декабрьданул 23-нний Аьрасатнал Генпрокуратуралул кIицI лавгунни, ва жува гъалгъа тIисса шариаьтрал хIукму Аьрасатнал паччахIлугърал кулпатрал политикалуцIун бавкьусса зат бакъашиву. Прокуратуралул аьй-бювкьу дувайхту, ДУМ-ралгу шариаьтрал хIукму леща-лекьа бунни. Гихунмаймур иш цукун хьунссарив къакIулли, бурганну цIусса шинаву ссайн бучIайрув. ДакIнийхтуну мукIру хьунна, Дагъусттаннал телевидениялийсса передачалуву ваниннин зувиллий шанна шинал хьхьичI, на увкуссия, нава кIира-шанна щарсса дуцаврил муттаэ бакъара куну. Агар ухьурча мукунсса адамина, кIира-шанна щарсса дурцуну, циняв архIалну ккаклай, цаннийрагу къия къахьунну, цавайвагу оьрчIру личIи къабуллай къуццу тIисса, ласру бакъа ливчIминнангу ласру аьркинну бухьувкун, ми дунияллий циняв хъаннин биял хъанайгу бакъахьувкун, гьарнал ихтиярди куну. Передача дурксса кьини, шаппай бухханнинма ичIура ттуйн ттархьру дарчуна, адаминан ца щарсса гьассар, виламанал кIира дуцларча ци банна, ца дурцувкун, паракьатну оьрчIалсса, къушлилсса буллай щяикIан аьркинссар циван къаучав, тIий. Таний жагьилсса, аькьлу бакъасса, циняв хъамигу, оьрчIругу цану ккаккан шайсса бюхъу-бажарданул арамтал бакъашиву къабувчIайсса бухьунссияв. Уттирив, тIайланма ва найбунува учинна: на хасну чIярусса хъами дуцаврил муттаэра. Чара бакъа оьрчIалгу, хьхьичIмур щарссанилгу дакIнин щунсса иш буну тIий. ЩинчIав къаччан къабикIанну дузал хьун, ссихIир бан шайсса ссихIирчитал бакъану тIий. Вайва гьантрай, цIуну увчIусса Американал президент Дональд Трамплул баян бунни, цува президентнал къуллугърай цIакь хьусса кьинива «трансгендерное безумие» дацIан дуванна куну. Яни, инсаннан цува хъамитайпану ягу адаминану лявхъухьурча дунияллийн, лявхъусса куццуй яхъанан аьркиншиврий чIурчIав дуллалисса, пол даххана дуван къадагъа дуллалисса. Ва ялагу, чув-адамина чувнан щар шаву оькки къабизайсса инсан ттун къаувчIинссар цукунчIавгу, му ишираву на къухънассара, нягу къуркъассар. Арийлвагу, ацIийлвагу хъами арамтуран хъанахъисса ташурду хъинникьай, кIилчинмур щарссану щар хъанай бухьурчагу, кIира-шанна дуцлай ухьурчагу. Амма чIярусса хъами дуцаврил масъала хъинну захIмат-жапасса темар. Бусланни бигьасса. КIира-шанна щарсса дуцаврил хIакъираву цума ци тIий урив цIуххав нагу цаппара инсантурахь. Зунмагу бувчIлай бухьунссар укунсса суалданухьхьун жавабру дуллалиминнал цала цIа-бакI тIайлану кIицI лавгун къаччишиву, мунияту нагу цаппара цIарду даххана дував.
Расул Шагьабуттинов, Динийсса институтрал преподаватель, элмийсса зузала:
– Мубараксса Кьурандалий тIутIимунийн ва ххирасса МухIаммад Идавсил (с.аь.в.) увкумунийн ттул цукунчIавсса щак бакъассар ва бикIангу къабюхъайссар. Хасну нава, ттулва маэшат гьаз байхту, кIилчинмур щарссагу дуцин дакIний ура.
Ражав Шамсуев, имам:
– Му суалданущал ттучIангу бучIай чIявусса, микку так Аллагьнал рязишивур гьасса. Исламрал кIира-шанна щарсса дуцин бучIи буллай бухьувкун, Аллагьнал кумаг баннав гьарцаннан.
Ризван Аьлиев:
– Яруссаннал ва даргиял чиваркIуннал, табасараннал къадуцларчагума, лакрал арамтуран бучIир кIилчинми хъами дуцлан. Миллат яшаву мурадрай. Так му зат бувчIусса хъамигу нясив хьурча. Ласнал хьхьичI ккуру бихьлай, никирттайн багьлай, лергъ тIий бур лакку хъами ялун щарсса мадуцара тIий, миннатру буллай. Кувгу, кIилчинмур щарссания гьим дуннихха, личIи хьунну тIий тарс бацIай. ЦIукъавххуну дурцуну нажагь ашкара хьурчагу, кIийн-гилун ххяхлахиссар, ттул ялун щар дуцин, на ссал оьккиссара, кьадарссара тIий. Хъаннил психология мукунсса дур. ОьрчIру чIявуссаксса тухумгу цIакь хъанахъиссар. Ва ялагу. КьюлтIну хъанничIан лас занай ушаву кьамулсса бур, заназу, так ялун личин мабара тIий. Бунагьралун агьлагьисса лас ххассал уван кIанай, бунагьру буллан кабакьу буллалисса.
Аьбидат ХIусманова, хIакин:
– КIира щарсса дуцаврия гъалгъа тIун бигьар, хIатта кIирагу, шаннагу ядансса даражалий ухьурчагу. Микку хъаннинни захIматсса. Ласнал цамургу щарсса дурцусса хъами циняв аьзаврай бур, хъинну нажагь бухьунссар дуцаврия рязисса. Миннахь цIуххара, цири зун кьурчIи бизлазимур, куну. Зун минналмур дардгу дурчIинтIиссар. ЗахIматсса масъалари куну кьабитан шайсса масъала бакъар, ттун му темалиягу бавнувагу къачча.
ЩайхахIмад ХIажихIусайнов, имам:
– Аллагьнал измулияр ларайссагу, хьхьичIунссагу закон къадикIайссар, ттулмур пикригу миннуяр ккалли бансса бухрав. Дуцин бучIиссар, амма тIайлашиву дикIан аьркинссар гьарца чулуха, адамина хIадурну икIан аьркинссар аьдлулий къуццу тIун. Ишру личIи-личIину багьайхха, масалдаран, дяъвилул чIумал чиваркI чIявусса литIай, ягу оьрчI бакъасса щарссания личIи хъанан бикIай. Хъамитайпалун, личIи хьуну, цинма цуппалунияр, ласнал хъаралу къахъиннив?
Аьбдулаьзиз Кьурбанов, предприятиялул хъунама:
– Аьрасатнаву чиваркIуннаяр хъами чIявусса бухьувкун, бусурман агьалинан мукунсса ташурдая заралнияр хайр бикIанссар. ЧIявусса жагьилтал хIанттихун, наркотикирттахун, зунарахун багьну бур. Щинни душру щар хьунтIисса, цIуллу-цIакьсса чиваркI бакъаний? Циванни ташу баву оьккишивуну дикIан аьркинсса? Оьккишивур зуна баву, буцинна тIий, хъяврингу бувну душ кьабитаву, ягу оьрчI лиян бан духтурначIан хъамитайпа гьан буваву. Щар дуцавриву оьккишиву дикIан къабюхъайссар, гьай-гьай, кIилчинмур дуцайхту, цалчинмуних къулагъас чан хьун ритан къабучIиссар. Ялунгума хIурматрайсса, ччаврийсса арардур дикIан аьркинсса.
Асият МухIуттинова, кондитер:
– Ласнал цамургу щар дуцин ччай ушиву бувчIайхту на, жулва оьрчIахгу ччаву дикIан, ттущала дусшиву дусса хъамитайпа буца учав, бувцунни. Ца ттунма ва Аллагьнанни кIулсса ттул зумату рязисса махъру цукун бувкссарив. Амма адамина хIинчурай, алхъандалий ахIингу, айгьингу къашайссар, мунан щар дуцин ччан бикIарча. АвхIуну утарчагума, чаран лякъинтIиссар мунал. Мунияту мукунмур чIумал бан личIаймур цар бусса – ссавур дуван, кьамул дуван. Аькьлулий къуццу буван. Иттав ххяхлахимур къачIалан, яру бахIин.
Сулайман Мудунов, программист:
– Зувира-мукьцIалла шинавусса душру бур диссертациярду дуручлай, фирмардай каялувшивуртту дуллай, аьрш-куршлил заллухъру цивппа ххай. Щарду хьун къаччай. ЩилчIав биялалий ссан аьркинссар тIий, ттунма ччикун буссара тIий. ТачIав цукунчIав аьй къаданна я шанна-мукьра щарсса дурцунай, я кIилчин-шамилчин щар хьумуний.
Сиянат Исяева, студентка:
– Гьич къарязира. Ттул адаминарав, ттучIа икIу, акъаравгу – насу вила ххуллийх чун гьан ччай уссарав. Шариаьтри, исламри, бучIиссар тIисса варсагърувагу къачча, цукунчIавсса хIуччардалгу ттул пикри баххана къабантIиссар. Ва ттулмур тарапри. Адамина чил хьуву ушиву кIулну ттун шаний шану бияйссарив. Му хьунни хавар.
Рамазан Муслимов, юрист:
– Гьарца хъамитайпалул зумувсса суал бикIай, ттуятурив дайдихьу дуван аьркинсса тIутIисса. ХIисавравун ласун аьркинни, дяъвирдал, ковидирттал, авариярттал биялсса чиваркI бювкьшиву. Ва ялагу, хIакинтурал ва статистикалул мяйжан бувсса зат бур, арамтал арамталну личIавугу нигь рутлатисса тагьарданий душиву, чIявусса чиваркI ччянива хьхьара хъанай бушиву. ОьрчIру бакъасса кулпатругу чIяву хъанай бушиву. Ва кIану хIисавравун лавсунгу къулайшинна хьунссия цIуллусса чувнан кIира-шанна щарсса дуцинсса ихтияр шариаьтрал фатвалийну цIакь дурнура ритарча.
ХIусман Сулайманов, менеджер:
– Бигьанна жаваб дулуншиврул, кIира щарсса дуцин ччисса адаминахь цIухха, вила буттал дурцуну ччивав куну.
Гулханум Мирзаева, ишбажаранчи:
– Агьа, циван къадуциви. Му яла бюхъу бакъама, царагу ядан къахъанайма икIайхха кIира дуцинна тIий сукку хьунугу. Ссах яданна кувкун, думуний гьашиву дурну, Аллагьнал кумаграйну тIий. Цува щарссанил яуллай унува, цамургу ччай. КIира щарссанил цува къутай ивтун яуллан. БацIула, кIира дурцуминнал, ЦIусса шинал байран цумур кулпатраву дувайривав?
ПатIимат Рамазанова
