«Илчи» кказитрал хьхьичIсса номердай жу бивщуссия хасъсса аьралий операциялул гьурттучи, утти хьхьичI ххуттай бавцIусса аьралитуран гуманитар кумаг биян буллалисса ва миннал чувшивурттая чичлачисса Бархъаллал шяравасса Жамалуттин Амирхановлуя.
Вай гьантрай жущал ихтилатрайн увксса Жамалуттиннул бувсунни аьрай цала «Илчи» тIисса позывной ларсшиву.
«Илчи» кказит аьралитурачIан биян баврицIун, укунгу лахъа-хъун буллай ур ва миллатрал кказит.
ДакIнин бутан, 2022-ку шинал, хасъсса аьралий операция байбишайхту, контракт чирчуну, мюрщисса оьрчIругу къаша-шавайсса нитти-буттачIа кьабивтун, хушрай лавгссар оьрмулул 36 шинавусса Жамалуттин Ватандалул мурадру буручлан. Ва уссия къуллугъ буллай 177-мур полкраву, хьхьирил бахьттагьалтрал подразделениялуву Запорожcкаллал областьрай.
Контрактрал чIун къуртал хьуния шихунай, хIакьинусса кьинигу, ва занай ур аьралитурачIан гуманитар кумаг биян бан. Ивну ур Курдюмовкалийн, Горловкалийн ва захIматсса тагьар дусса цаймигу кIанттурдайн. Ца ирглийсса аьрххилий жул коллективралгу тIайла бувкссия Жамалуттиннухьхьун жула чулухасса ссайгъат ва кказитрал цаппара номерду.
КIицI лаган, Жамалуттин тийх аьралий корреспондент хIисаврайгу уссар.
Вай гьантрай ванал гьан дунни кказитрайн къучагъну талатисса ккулиоьрчI Абакар Бурхаевлуясса макьала.
Андриана Аьбдуллаева