Уттигъанну Аьрасатнал «Звезда» тIисса федерал телеканалданийн оьвкунни хасъсса аьралий операциялий мушакъат хьусса жула ватанлув, табасаран миллатрал арс ХIамзатов Мавлидин Исмяиловичлуйн. Цува телеканалданийн наниний, Мавлидиннул оьвкуну бур «Дараччи» клубрал Москавуллал филиалданул ва «Дагъусттан» МЦК-лул душвавращал цачIанма госпитальданийн бувкIсса ва мудангу дахIаву дуну бивкIсса Ххадижат ЦIаххаевайн: «ЗахIматсса кьинирдай ина ца яла гъанма инсан кунма ттул чIарав бивкIссара, ттул дакI данмур буслай, аьркинмур щаллу дуллай бивкIссара, ва передачалийнгу ттущалва ина бувкIун ччива», – куну.
Укун вай гьантрай Мавлидиннущал студиялийн лавгунни жула лаккудушру — Чапаевкалиясса Ххадижат ЦIаххаева ва ЧIяйннал шяравасса ПатIимат МухIуттинова.
Мавлидин ХIамзатов ур Хивский райондалийсса Ашага-Ярак тIисса шяравасса. Ялапар хъанай ур Ставропольлай.
Хасъсса аьралий операциялийн лавгун ур хушрай. Къуллугъ буллай ивкIун ур 2023-ку шинал декабрьданул 21-нния 2024-ку шинал январьданул 24-ннийн бияннин.
Гьуртту хьуну ур Авдеевкаллал чулийсса талатавурттаву.
Ялтту лехлахисса дронну дугьлай унува, хаварбакъулий кассетный миналий ччан бивзун, никирая ялавай ччаннацIа хьуну ур. Оьттул нанисса ччаннащал 3-4 километралий ххярклий най, жуламинначIан увкIун, ххассал хьуну ур. Мадара хIал бувссар ванал госпитальлай. Му ппурттуву, мукунмасса бала хьуну, 2-мур госпитальданий хъин хъанахъисса лаккуоьрчI Эдуард Ибрагьимовлух (Хан Леков) ва цаймигу аьралитурах буруган лавгсса душру кIул хьуну бия Мавлидиннущалгу. Мунияр шихуннай дахIаву дур ванащал «Дараччилул» член, медициналул зузала Ххадижат ЦIаххаевал.
– Хасъсса аьралий операция байбивхьуния шинмай на цимилгу бивссара госпитальлайн захIматсса щавурду дирсса аьралитурачIан. Ци бакIрачIан бучIарчагу, оьрмулува дакI къадурксса, захIматшивурттал лахIан ан къаавцIусса, яхI бусса, чувшиврул бутIа буллусса жагьил ур Мавлидин. ДакI хъинсса, аьчухсса ур, вайми аьралитурал дакI данмур буллан икIай, – тIий бур Ххадижат.
Цува Вишневскийл госпитальданийн гьан увну, протез байхту, уссихь машина бувцуну ухьхьу куну, аьркинмур ларсун аьралий дустурачIан 2-мур госпитальданийн занай ивкIун ур Эдуардлущал арх1ал.
Азарханалия итаакьайхту, Ставропольлал аьралий комиссариатрай зун ивкIун ур.
ЦIанагу передачалий гьуртту хьун увкIсса Мавлидин хьхьичIа-хьхьичI Ветерантурал (2-мур) ва Вишневскийл госпитальлайн аьралий дустурачIан ивунни.
– Мавлидин увкIукун аьралитал тяхъа-таза буккайссар, – тIий бур ва кIулми.
Хасъсса аьралий операциялий ккаккан дурсса чувшиврухлу лайкь хьуну ур наградарттан: «Къучагъшиврул ордендалун», «Дагъусттаннал миллатрал виричу» медальданун ва м.ц.
Хасъсса аьралий операциялул хъиннура цIакь дуллай дур жула миллатирттал дянивсса дусшиву. Цал уттигу жула халкьуннал ккаккан бунни кьини дуркний цаннал чIарав ца бушиву.
Андриана Аьбдуллаева
