Декабрьданул 9-нний щалагу Аьрасатнаву кIицI лагай Ватандалул Вирттаврал кьини. Ва кьини лахъа-хъун бувай, дакIнин бичай бур Совет Союзрал ва Аьрасатнал Вирттал.

Ккуллал райондалул щархъаву хьунни ялун нанисса никирахь Ватан дуручлай жанну дуллусса ва хIакьинусса кьини билаятрал мурадру буручлачисса къучагътурая, Ватандалул цIанихсса тарихрая бусласисса хьунабакьавуртту, дирхьунни чувшиврул дарсру ва дунни цаймигу мероприятияртту.

Ва кьини Ккуллал райондалул Культуралул къатрал хIаятраву «Вирттаврал аллеялувусса» аьпалул улттуй дирхьунни тIутIив. Вирттаврал аьпа абад буллалисса мажлисрай гьуртту хьунни райондалул администрациялул вакилтал, культуралул идарарттал зузалт ва дуклаки оьрчIру.
Аьпалул мажлис тIивтIунни Ккуллал райондалул бакIчинал хъиривчу Анатолий Давдиевлул.

– Ватандалул Вирттаврал кьини – му къучагътурал тарихрал ирс буручлачисса, хъуннасса агьамшиву дусса кьинину хъанахъиссар. Ва кьини аьпалул хьусса Вирттал дакIнин бичаву бакъассагу, лахъа-хъун буллалиссару хIакьину аьралий буржру бартбигьлагьисса къучагъталгу, – увкунни Давдиевлул.
Райондалул Хъунисриннал советрал председатель Т1агьир Абакаровлул кIицI лавгунни вай мероприятиярттал оьрчIру Ватан ххирану тарбия бавриву хъунмасса к1ану бугьлагьишиву. Ванал дакIнин бивчунни Ккуллал райондалия бувксса Совет Союзрал ва Аьрасатнал Вирттал.

Ваччиял дянивмур даражалул школалул дуклаки оьрчIал бувккунни къучагътуран хас бувсса шеърирду, бувсунни Вирттаврал оьрмурдая, аьралий къучагъшивурттая.
Ватандалул Вирттаврал кьинилун хас дурсса ххаллилсса мероприятияртту дунни Хъювхъиял, Ккуллал, 2-мур ЦIувкIуллал, Вихьуллал ва ЧIяйннал шяраваллавугу.

Имара Саидова