Ккуллал райондалул Культуралул управлениялул къатраву хьунни Аьрасатнал Федерациялул Конституциялул кьинилун хасну райондалул художественный самодеятельностьрал коллективирдал хIадур дурсса концерт. Мажлисрал хъамаллуравух бия «Зунттал хъами» журналданул редактор Хамис Шамилова бакIчисса коллективгу. Хъамаллурал аьрххилул мурад бия журналданул 2025-ку шиналсса подписка даврил, миллатрал маз, аьдат-эбадатру ядаврил масъаларттан хас бувсса.
Байрандалун хас бувсса мажлис тIитIлай, бусравсса хъамалгу, райондалул жяматгу барча бунни райондалул администрациялул бакIчи Шамил Рамазановлул.
– Конституциялул кьини агьалинал байранну хъанахъиссар, цанчирчан гьанулул закондалий цIакь дурну дур жула билаятран хъуннасса агьамшиву дусса, миллатирттахь архIалсса ихтиярду душиву тасттикь буллалисса кьанунну. Конституциялул закондалул жува циняв архIал бацIан бувссару, захIмат буллансса, илкинну занансса, цинявннан цасса мюхчаншиврул ихтиярду дузал дурссар.
Цинявннан чIа тIий ура цIакьсса цIуллушиву, барачатшиву ва узданшиву, тIайлабацIуртту, – увкунни ванал.
Шамил Рамазановлул райондалул администрациялул чулуха ХIурматрал грамота дуллунни культуралул давриву, 50-нния лирчусса шиннардий дакIнийхтуну бивхьусса захIматрахлу Ккуллал шяраваллил Магьирлугърал къатрал хъунмур Зина Гудован.
Хъирив Хамис Шамиловал бувсунни журналданул тарихрая, республикалул жяматийсса, политикийсса ва социал оьрмулувусса хъаннил биялдарая. КIицI лавгунни СМИ-рдал гьашину Сочилий хьусса «Вся Россия» тIисса форумрай «Зунттал хъами» журналданул «За лучший дизайн» тIисса диплом лайкь бувшиву.
Ихтилатру бунни лакку мазраймур журналданул редактор Аьжа АьбдурахIмановал, журналданул редакторнал хъиривмур Сулгият Булгаевал. Табасараннал мазрайсса журналданул редактор Сувайнат Исрапиловал бувккунни цилва чивчусса шеърирду.
ЛяличIисса асарду бия хъамаллурал концертрая хIасул хьусса.
Ва концертрай исват хьунни Ккуллал райондалий халкьуннал творчество кьиматрай душиву. Шикку гьуртту хьусса артист цаягу машгьурсса ва цIанихсса артистътураяр ялавайсса даражалул акъая. Яла-яла, миллатрал ирсирай нанисса ххазина ябуллалисса сахIналийсса мюрщисса оьрчIая хъинну рязину бия хъамал.
Имара Саидова
