ЦIуссалакрал райондалий ЦIуссаккуллал 2-мур школалий «Движение Первых» суккушиндарал активистътал хьунабавкьунни хасъсса аьралий операциялул гьурттучи, хьхьирил бахьттагьалтрал 3-мур батальондалул фельдшер, прапорщик Альбина Къаплановащал. Аьрайсса ванил позывной дур «Императрица». Ва ялун бурувгун паракьатну чIалачIисса душнил чувшиврул дакъар дазу-зума.

ЗахIматсса щавурду дирсса аьралитуран дяъви нанисса кIанттурдай кумаг бан кьянкьа-кьурчIисса арамтурангума къабигьассар. Ва сивсусса душнил уттинин щавурду дирсса цикссагу аьралитуран, дяъвилул майданная буккан бувну, медициналул кумаг бувссар. Дуклаки оьрчIру гъирарай вичIи дирхьуну бия Альбинал аьраясса хавардах, цIухлай бия аьралий операция нанисса кIанттурдайсса тагьардания, аьралитурансса шартIирдая, ванил цила дуллалимуния. Альбинал бувсунни хьхьичI ххуттай бавцIуминнал чувшиврия, яхIирая. Хьунабакьаву дуклаки оьрчIансса тарбиялул дарсну хьунни. «Императрицал» кIицI лавгунни, цуппа тачIав пашман къавхьушиву медициналул зузалал пиша язи бугьаврия, оьвчаву дунни оьрчIайн ххуйну дуклан, билаятрал тарихрах ххишаласса къулагъас дуллан, Ватандалух ччаву дуну бикIан.