ДР-лул Халкьуннал Мажлисрал 39-мур сессиялий депутатътурал кIилчин дурккуну кьамул дурунни «2025-мур шинайнсса ва пландалий ккаккан дурсса 2026 ва 2027 шиннардийнсса ДР-лул бюджетрал хIакъираву» тIисса закондалул проект.
Масъалалул хIакъираву махъ лавхъунни ДР-лул Халкьуннал Мажлисрал Бюджетрал, финансирттал ва налогирттал комитетрал председательнал хъиривчу Мурад Исмяиловлул. Ихтилат бунни мукунма ДР-лул финансирттал министр Шамил Дабишевлул.
Бюджетраву яла гъанмур шинайн ккаккан бувну бур харжлугъ лахъ буван дуккаврин, ЖКХ-лун ва цIуллушиву дуруччаврин. 2025-ку шинал бартдигьинтIий бур 7 национал проект, миннун харж дуван тIий бур федерал бюджетравасса арцу.
ДР-лул Халкьуннал Мажлисрал председатель Заур Аскандаровлул тIимунийну, бюджет хъанай бур гьармур хIисаврайн ларсъсса (сбалансированный), мунил мурадну хъанай бур АьФ-лул президент Владимир Путиннул ва Дагъусттаннал бакIчи Сергей Меликовлул бивхьусса масъалартту бартбигьинсса шартIру дузал даву.
«Бюджетраву хIисаврайн лавсун буссар циняв бакIрайн лавсъсса социал буржру, ккаккан бувну буссар социал объектру ва инженер инфраструктурарду дувансса арцу. Бюджетрал проект кIилчин дуккинсса чIумалнин цахъисгу ххуй-хъин дурну диркIссар ва хъун дурну диркIссар 22 млрд къуруширттал. Ми арцух бюхъантIиссар бартдигьин национал проектру ва паччахIлугърал программарттаву ккаккан дурсса мероприятияртту, – увкунни Заур Аскандаровлул.
ХIадур бувссар
ХI. Аьдиловлул
