Декабрьданул 18-нний Дагъусттаннал ХIукуматрал председатель Аьбдулмуслим Аьбдулмуслимов гьуртту хьунни «Мурадирттал елкалул» акциялий.
Премьер-министрнал ХIукуматрал къатраву бацIан бувсса ЦIусса шинал елкалия ливккунни оьрчIал мурадирттащалсса 3 шар.
Дарбантлиясса 3 шинавусса Мадинал буттал жан дуллуну дур хасъсса дяъвилул операциялий. Душнин ччай бур ссайгъат – сюрприз.
МахIачкъалалиясса 5 шинавусса Кавсаратлул мурад бия ичIаллил спортрал комплекс ласун ччисса. ЦIанасса ппурттуву душнил кулпат арцул кIюлану бусса бур.
МахIачкъалалиясса 11 шинавусса Вагьаб инвалид ур. ЦIусса шинал ссайгъатну ванан ччай дур ласун эллиптический тренажер.
Аьбдулмуслимовлул бувсунни циняв мурадру бартбигьинтIишиву. Аьмну ДР-лул ХIукуматрал члентурал елкалия ливккунни оьрчIал мурадирттащалсса 80-нниха ливчусса шарду.
Акциялувух хIала бувххунни мукунма ДР-лул бак1чинал Халкьуннал Мажлисравусса вакил Нюсрет Оьмаров, вице-премьертал, министртал ва цаймигу органнал каялувчитал.
Ва акция Аьрасатнаву най бур 2018-ку шиная шинмай, ванил цачIун буллай бур хъин-хъинсса давуртту дуллан ччисса 1000-хъул инсантал.
ХIадур бувссар
ХI. Аьдиловлул
