МахIачкъалалив, Оьруснал театрдануву, «Инсан» ихIсандалул фондрал ва нанисса шинал хIасиллу дуллалисса мероприятие хьунни. ХIукуматрал вакилтуравух бия Халкьуннал Мажлисрал хъунаманал хъиривчу Камил Давдиев, диндалул иширттал ва миллатирттал политикалул министр Энрик Муслимов ва цаймигу бусравсса къуллугъчитал.
БавтIцириннан (600-нниха ливчусса инсантал) ккаккан бунни фондрал проектирдая бусласисса спектакль. Вайнна цаппара проектирдал цIарду: «Къашавайминнан кумаг бува», «ЦIусса къатта», «Закят», «РувхIаний центр цачIу буллалиссару». Фондрал гендиректор МахIаммадрасул МахIаммадовлул барчаллагь увкунни муданмасса чIарахбацIултрахь, пишкаш дунни цIа чирчусса каний дахIай ссятру. 2024-ку шинал фондрал хIарачатрайну 548 инсаннан 121 153 968 къуруширттансса медициналул кумаг бувну бур, 92 кулпат къатрал дузал бувну бур, мюхтажминнан къатри дувангу харж дурну дур 40 275 182 къурушру.
Ва республикалийми агьалинан бувсса кумагри. Дагъусттаннал кьатIувминнан кумаг бавугу фондрал аьдатри. Гьашину Донецкаллал ва Луганскаллал республикарттайн 30 тонна гуманитар кумаграл диян дурну бур. Волонтертурал дуки-хIачIия диян дурну дур Херсоннал областьрайсса бугьараминнан, мушакъатминнан, ахIвал кIюламиннан. Бивссар кумаг кьатIаллил билаятирттайнгу.
Палестиннан 14 197 940 къуруширттансса кумаг бувну бур, Ливаннан – 2 385 926 къуруширттансса, машан лавсун, биян бувну бур тайнначIан 29 янна шюшай машина, 1000 газрай лахъай пач, 1000 виргъан ва микссава кIараллу. Аьмну фондрал 215 азара инсаннан 375 000 000 къуруширттансса кумаг бувну бур. Фондрал хIасиллу дуллалисса мероприятиялийгу хъиншиврул ххуллийсса давуртту дия. Арулла шинавусса къашавайсса Камилан, масалдаран, спортрал вакилтурал пишкаш бунни янна дуруххай машина ва ноутбук.
Мукунма мушакъатсса оьрчIру тарбия буллалисса ниттихъан чIивимур хIажлийнсса путевкарду дуллунни. Ухссавнил Ккавкказуллал ихIсандалул идарарттал ассоциациялул хъунаманал бувсунни Дагъусттаннал муфтинан барчаллагьран къарачай жинсирал тяй пишкаш буллай ушиву. Ххибан ливчIунни, фонд хIасул хьушиву 2012-ку шинал ва Аьрасатнавусса ихIсандалул фондирттаву хьхьичIунсса 10-ннивух бушиву.
ПатIимат Рамазанова
