Назмурду датIара тIутIал ардая

Назмурду датIара зунттал бакIая,
Кьанийх экьиларгсса тIутIал ардая –

ТIуркIу тIисса мурчал шадсса балайну,
Щюлли аьрщава нанисса ссихIну.

Бити гьанай бикIан кIинттул марххала,
Интнил гьаз бантIиссар шадсса чарххана.

Дяркъу щинал жюржу – назмурдал ххару
Ххяллал тикрал байссар лакку мазрайну.

Цири цIарал къавтIи ка гъили дайсса,
Назмурдаву дуна цIарал кIалайрду.

Цири ссавний цIуртти, цIай-цIай къатIийни,
ЦIурттину чIалайни назмурдал ххару.

Ина булбул, на Булбул

Эмарат булбулчIелмуй,
Лелуххантраву ххуймур.
АслахIсса вил балайлул
Бавцири хIайран бувай.

Зунттаву эмаратру
КIулсса арцул лелуххий,
Лахъара ина чани
ХъункIултIутIал чIапIава.

Балайчи булбул чIелмуй,
Ттулмур дакIгу дур вищал,
Ва шаэршиврул лишан
Вил такьвалуву чIалай.

Ина булбул, на Булбул,
Ина аьшукь, на шаэр,
Чичлай бура вин хасну
Ттула назмурдал ххару.

БулбулчIелмуй, чIу гьаз ба,
Дунияллун баянну,
Бюхттул зунттал рахIаву
Мусил щатIив бишланну.

Ттул минай, чанна цIукуй

Ттул минай, чанна цIукуй,
Зунттал нурданул чаний,
Шаэртурал шеърирдал
БувцIу мусил буттукьай.

Агь, ттул зумувсса назмуй,
ДакIний щугълурдал гьануй,
Барз зияратрай бацIай
Бизанттай тIутIал бярдуй.

ЦIанихсса аьлимтурал
Аькьлулул бувцIу кьуллай,
ЦIа дурк балайчитурал
КIяла арцул гюнгутIий.

Неххал чарттай цIавцIусса
Эшкьи дувай тавханай,
Зунттал мицIай бавцIусса
Бюхттул муруллал къапуй.

Пагьмурдал гьану цIакьсса
Аькьлу-кIулшилул мяъдан,
Гьаварай гьунар ххисса
Летчиктурал ликказан.

Назмурдал хъаттирдай

Назмурду – ми ттул хъарур,
Ттул ччавур, ттул асардур.
ЧIаллаву къама кунма,
ДакIниву салкьи шайсса.

Лелуххул хъунмур даву
Кюру баву дунугу,
БулбулчIелмуллул дакIрив
ДикIайсса балайрдавур.

ДакIнил аваданшиву
Авдалнал хъус дунугу,
Оьмунил ва хъинмунил
Дя дуссар назмурдаву.

Цийва кюру буваннин
Ялугьлайсса мурхь кунма,
БакIрай барзу ликканнин
ДарцIусса ххяли кунма,

На ялугьлай бикIара
Назмурдал хъу дияннин.
Ттула пикри, асарду
Балайлийну байбишин.

Бяълилул багъ

Аьрщарайгу, къяртрайгу
Бургъил нур мусийн лахълай,
Хъя тIий бур бургъил чани
Бяълилул кIяла тIутIай.

Дюхлулсса хьхьемгу дутIлай,
МарцIну дур кIяла кIюрхгу,
Шадсса макI кунна чIалай
КIяласса щюллишиву.

Дюхлулул кIукIлушиву
Дахьра аьрщарайн щилай,
ТIутIава бяълилул ссихI,
СсихIир кунма, личлай бур.

Нурданул тIинтту кунна,
ТIитIин дурну хъаругу,
Мурхьирал тIутIал кьункьай
Лехлай бур кIяла хьхьиру.

Багъгу, арцул гьавагу
БуцIин буллай макьаннал,
Кьунттуя щингу хIачIлай
ЧIев-чIев тIий бур чIемултгу.

Жагьилний жалинт хьусса
Ниттил ниттихъул кунма,
Ялугьлай бур архнивун
НацIу бяълилул мурхьру.

Даруврал дюхлу хIачIлай
КIяласса багъ лагмава,
ТIитIиннав зун дуниял
ТIий, оьвтIий бур жуйнмагу.

Интнил аьламатру

Аьрщарал аьламат личай интнива,
Пиш-пишгу тIий, баргъгу буккай зунттуха.

Дунияллул дакIнил чани чантI куну,
Аьрщарал аьч дувай ца ххаришиву.

Мусил ва ттиркьюкьал къупру хъя куну,
Сунттул дарайлия щащай урттугу.

Жюружани

КIяла чарттал щуттая
Жартру жюржуртIи дурну,
Хъунна ххяллуйх яларай
Най дуссар жюружани.

ЧIентIру чIурдай чIа буллай,
ЧIюлусса макьан дуцлай,
Щинал жартлил галайлул
Балай учай магьирну.

Бургъилух ва зурулух
ЛирцIуну аьчну дачай,
Ххяллайсса тIутIал рангру
Жура-журану чIалай.

ЦIан хьхьуниву пахъ дагьну,
Шану лахъай цIуртталу,
БатIлай лагма асарду,
Шанаши бувай хьуву.

Мурхьру

БавцIунува шанай бур
Циняв мурхьру багъраву,
Чанна цIурттал чанналу
Щюлли гъи дур чагъраву.

Пахъ дагьсса урттул кьяртуй
Барзукка шанаву дур,
ЧIарахсса тIутIул чIапIуй
ЧIимучIалттул ххютгу дур.

Кюрттавусса чIелмултрал
ЧIу-чIитI бакъар бувагу,
Балай тIийнма бикIайсса
Булбулгума шанай бур.

Ва ххуйшиврух ябитан
Акъар цучIав чантI кусса,
Зурул хъирив магъ хьуну
Бигьлайсса ттурлу дакъа.

Къурув

Зунттул хъачIрайн хъар хъанай,
НахIуну пиш-пишгу тIий,
Щалла даралул вирдакI
Бургъил дурцIуну дия.

Шярава шагьраххуллу
Къурувппай тIивтIуну най,
ХIалли-чIаллил лакьин ччай,
ХIарачатрай халкь бия.

Ххуллул зумардацIухсса,
НацIу мечIал ххуй чIапIив,
Ссутнил дазуй бавцIуну,
Ттигу кьакьлан бувая.

Лакку мазрал чIу кунма,
ЧIаллу щурщу тIий бия.
Ца дусшиврул дайдихьу
Дайдихьлай къурду бия.

КIунтIуксса къалмул ккукку
Мусил кIунтI кунма чIалай,
ЧIали щяв къабагьанну
Бава хъу ттихIлай дия.

Лаккуйсса оьрмулул тIин
Щаращава най бия,
Аьрщарая къабуцлай
Мюрщи-хъуни зий бия.

Суврарал кьанкь хIаласса
СсихIгу бишлай рахIая,
Дюхлай дия дакIнивун
Дюхлулул кIукIлушиву.

Жула хъунил аьнттуву
ТIитIин бувну ссупрагу,
ТартнакIлихун кIарттул ччатI
Муксса нахIуну бия…

Зунттал хъами

Иттархъеннал лувату
Ттюнгъасса яру пар тIий,
ИчIаллил кушулуву
Щуруй дур хъаннил кару.

Жагь дахьвану кьус бикIай,
Жагь бацIай, лагма буккай,
КIюрхния кьунниялнин
Даву яла къалагай.

Багърал, къурнил, ризкьилул
Барачат бишай тIювай,
Хъув хъарас кьутIин дуллай,
ХIарачат бай бутталгу.

Аьрщи-щамарайх занай,
Сасан бувай чIан-ччанну.
Хъуруннал карав буцлай,
Хъуни бувай оьрчIругу.

ТIювай дакI гъили дуллай
Вилаххав цIарал лама,
Дусшиврий бухлай-буклай
ЧIаххув-чIарахнал шачIу.

Гъинттул ххалав, ардарав,
ХIаллил лакьлай къурдарав,
КIарттул ччатIул кьункьащал
Буттал улклул тIутIавух.

Агьаммур рахIатшиву
Зунттавара дайдишай,
Зунттал хъаннил ххуйшиву
ТIабиаьтрал чIюлу дай.

Инагу, нагу

Аьламрал лахъшиву
ХIисав къахъанай,
Я ляпI чин къабуллай,
Ялугьлай бур барз.

– Ссавний барз, ссайннукьай
Жува тамахIсса?
Чунмайру нанисса,
Дардругу духIлай?

– Ттул дус, ххира ссувай,
Ссавний ссурухIий,
Вил нурданул симан
Мусиват хьурив,
ТалихIрал нур дусса
Бярнил щинаву,
Вил мусил пахъдагьру
Пашманну дурхха?

Гьарца ххуйшивруву
ДакIний личIайсса,
ДакIнин ххира симан
Вилгу дяйкьурив?

Эшкьилул зумуну
Инагу оьвтIий,
Вих ялугьлай, нагу
Бурахха аьтIий.

Бакъар талихI шилу,
Аьрщарай, ттунгу,
Ссавний барз, ссайннукьай,
Жува тамахIсса?

Щийннив оьвтIий ина,
Щиллив цIа на тIий –
ЦIурттаву инагу,
Аьрщарай нагу.

Цулуцалт

Дагъусттаннал цашиву
Цалийн дуцлай зунттаву,
Цулуцалт, хIажлийн кунма,
Цулун бувккуну бия:

ТIутIал ардал зумардайх
Щя-щябивкIсса зунттурду,
Ссав кунна, някIсса тIутIал
Иттав ялугьлай бия.

Уртту-тIутIаватура
ДурчIлай халкьуннал тура,
Дара дунийх ппив хъанай
Хъярч-хъяхъавура дия.

Ххуйшиврул дазуйх бишлай
Зума дайлсса чIиникIру,
Ца мякь бия даврихсса
Экьилаглай урттувух.

Симаннайх тIуркIу буллай
Янусса пишлил щатIив,
Дарссун най дия ччаву
Жагьилнал балайлуву.

Балайчи алвагь излай,
Ссахрив мякьсса ссурухIи,
Язисса хиял балглай,
Бия тIутIал кацI буллай.

ЗахIматрал ва цашиврул
Савлугъ дуллайсса кунма,
Лехлай бия зунттавух
Зузалтрал бала-гьалай!

Зунттал душру

ПуркIутIи дурну кIачру,
Шахьлахьи дурну дукра,
ДукьрахIангу гьалакну
Хьамаран дизан дурну,

БакIлахъия ласавай,
КIинттул бигьалагавай,
Ссуттил ларкьумур дукьлай,
Зу къатта-къуш ябару.

Барзунттайн бургъил чани
Буккавай-къабуккавай…
Бюхттул зунттаву душрув,
Зу къурдарав буккару.

Гъайувкусса хъуруннал
Хъяврин къаай хъудугьу,
Аьрщаралгу, щиналгу
Кьадру лахъри зунттаву.

ТIабиаьтрацIун цану
Къуццу тIисса ххуй душрув,
Зунмасса талихIиран
Буттал кIану ябара.

Бизанттай тIутIал тIуркIу
Зул кушулуцIун бувай,
РатIнил щинал жюржугу
Зул балайлухун бакьай.

Ща мусил ссурулккуртта

Ранг-рангсса тIутIал ардай,
ПалцIа тIисса бизанттай
Бургъил нур мусин лахъай
Ща мусил ссурулккурттай.

Лайсалгъарал кIунтIаву,
Ттиркьюкьал вирххулуву,
Шадсса аьламрал чаннай
Карамат ссурулккурттай.

НякI-щюлли ссавнил чани
Ранг-кьачIа лаган буллай,
Ссурула ссайгъат кунма,
Щарнил ялтту битара.

Гъи дайдихьулий

Хъуру дурчIлай хъами
Мярарал къурув,
Нувщул тIутIив хъя тIий
Нувщул хъуруннай…

Маршри арцул тIутIал
ТIуркIутIи бувну,
ХIикматсса гъирарай
Гъи дур дайдихьлай.

ХIурия-тIутIал дур
Вай рахIру лахIлай,
ОьнтIалагру оьрчIи
ТIутIал дур далглай.

ХьхьунцIуллай цIу лахълай
Пятту-тIутIал аргъ,
Ссавния ххарину
Буруглай бур баргъ.

Бартурттуйх мя-гъа тIий
Занай бур чIиру,
КъячIи-тIутIив канай,
ШанчIапIив бувчIлай.

Ххяллул ухнилусса
ЧIирисса арив
ЧIируннатIутIавух
Гадри бур занай.

Урттул палцIа тIий бур
ЧIюлу бизану,
Щюлли щатIив бишлай
Агьма изанну.

ЦIусса оьрму

ЧIивитIу ванача
Дунъяллийн уклай,
Аьрщи-ссав лагмара
Паракьат дара.

ЧIиви оьрчIан чани
Бащан бувайча,
Барзунттая, ттурлуй,
КIункIу машара.

Ялун мадияра,
Ттуршилул дяркъуй,
ХъятIи тIутIул къупру
Силул ччуччайча.

Арснал тIааьншиву
Даслай каниву,
Паракьат хьуннича
Ниттил къювурду.

Куклуну гьавалий
ХIакиннал гьаз ай,
Ттиркьюкьал лякьлува
ТIивтIу тIитIала.

Аьрщи-ссав, лагмара
ВичIи дишара,
Шанювкьуну урча
Чувнал ишара.

ЧIимучIали

Заэвну зурзу тIий,
Ххуй тIутIуй ликлай
Бур чIимучIали.

Харарал хъаттирдай
Арцул накьичру,
Ххуйшиву цила.

ХъункIултIутIул чIапIай
Шанугу лахъай,
Жалин душ кунма.

КутIасса оьрмугу
Пай-хай тIий лагай,
Ца цIупар кунма.

Ва щябивкIсса тIутIив
Щяв зизинтIиссар
ЧIимучIалттущал.

Дакъа-къатIа хьунссар
КIира ххуйшиву –
Ца лахIзалуву.

Амма цайми тIутIив
Хъя учинтIиссар
ЦIусса чIапIащал.

ЦIунил ляхъантIиссар
ЧIимучIалигу
ЦIусса интнищал.