Декабрьданул 8-нния 12-ннийн бияннин Москавлив най дуссия «Лучший преподаватель ДШИ-2024» тIисса щалагу Аьрасатнал конкурс. Ва конкурсрай гьуртту хьуссар уттигъанну Нальчик шагьрулий хьусса «Лучший преподаватель детской школы искусств –2024» тIисса щалагу Аьрасатнал конкурсрал Ухссавнил Ккав­кказуллал Федерал Округрал ятIапрай 1-мур кIану бувгьусса жула лаккудуш, ГьунчIукьатIрал шяравасса ТIагьират Аьлиева.

Москавлив Хъунмур театрдануву хьунни финалистътал барча буллалисса шадлугърал мажлис. Ххув хьуминнан наградартту дуллунни АьФ-лул культуралул министр Ольга Любимовал.

Конкурсрал дия 3 ятIап. Финалданул бяст-ччаллавусса «Искусствалул школалул хьхьи­чIунсса преподаватель» номинациялий гьуртту хьунни 8 жагьилсса ва 8 опыт бусса преподавательтал. Гьурттучитурал магьиршиврун кьимат бишлай, хIисавравун ласлай бия партфолиолувусса материаллу, искусствалул цайми школардаясса оьрчIахь тIиртIу дарсру дишаву, искусствалул кIулшивурттаясса ихтилатру, методикалул семинарду ва презентация даву.

Конкурсрал 1-мур бутIуву ТIагьиратлул, цила дарсру дишаврил методикалия бусаву бакъассагу, хIадур дурну дия композиторнал гьунар бусса, хъинну итххявхсса цила ученик МахIаммадов Щайхлуясса видеоролик. Хъиривмур бутIуву ванил хIадур бувну бия «Творчествалул лаборатория» ва «Музыкалул искусствалиясса ихтилатру».
Конкурс наниссаксса хIаллай преподавательтуран, кутIасса чIумул мутталий проектру ляхъангу дурну, миннуя бусан багьлай бия. Му бакъассагу, жюрилул ва нитти-буттал чулухасса суаллахьхьунгу жавабру дулун багьлай бия.

Вай бяст-ччаллаву музыкалул искусствалул лавайсса даражалийсса кIулшивуртту ккаккан дурсса, Каспийск шагьрулийсса Сергей Агъабабовлул цIанийсса ОьрчIал искусствардал школалул жагьилсса пишакар Т1агьират Аьлиева ххув хьунни «Лучший молодой преподаватель ДШИ-2024» тIисса номинациялий.
– ТIайламур бусан, бакIрай на хъинну хъювсул буклай буссияв. Бяст-ччаллу наниссаксса хIаллай, жу куннащал кув дус хьуру, даврил опыт кIибачIарду. Барчаллагьрай бура лавайсса даражалий конкурсрал даву сакин дурсса Аьрасатнал Культуралул министерствалийн. Сант дирирну дунура, барчаллагь учин ччай бура конкурсрайн хIадур хъанахъисса ппурттуву ттула чIарав бавцIусса ОьрчIал искусствалул школалул директор Марина Юрьевнахь, коллегахъахь ва хаснува ттула ниттихь, Тамарихь, ГьунчIукьатIрал жяматрахь, – увкунни ТIагьиратлул.

ТIагьи­рат Аьлиевал 5-хъул шинну хьуну дур Каспийск шагьрулул Сергей Агъабабовлул цIанийсса ОьрчIал искусствардал школалий итххявхсса оьрчIахь сольфеджио, музыка ва музыкалул литературалул теориялул дарсру дихьлай. Музыкалухсса гъира ванин оьрчIнийва багьну бур.
ТIагьиратлул бувккуну бур Сергей Агъабавовлул цIанийсса ОьрчIал искусствардал школа, Готфрид ХIасановлул цIанийсса МахIачкъалаллал музыкалул училище, Аьшттарханнал паччахIлугърал консерватория. Искусствардал школалийн ваничIан заназисса оьрчIал, фестивальлай, олимпиадарттай ва проектру ахттар даврил конкурсирттай гьуртту хьуну, цимилагу хьхьичIунсса кIанттурду бувгьуну бур.

Шиккува кIицI лаган, ларг­сса шинал Т1агьиратлул сипталийну дурну дур «В Каспийске мое сердце» тIисса, Дагъусттаннал культура ва аьдатру ядаврин хас дурсса проект. Ванил презентациягу дурссия Т1агьиратлул Нальчик шагьрулий хьусса конкурсрай.
ДР-лул культуралул министр Зарема Буттаевал кIицI лавгунни, Дагъусттаннал ОьрчIал искусствардал школардал тарихраву Т1агьират Аьлиева «Лучший преподаватель детской школы искусств» тIисса цIа цалчин ларсъсса педагог хъанахъишиву.
Зун гъирагу, шавкьгу дусса, даврил опытгу бусса жагьилсса пишакар уттигу хIадур хъанай бур цаймигу конкурсирттай ва СКФО-лий хьунтIисса искусствалун хасъсса конференциялий гьуртту хьун.

Имара Саидова