Ватандалул Вирттаврал кьинилуцIун дархIуну республикалул шагьрурдай ва районнай хьунни личIи-личIисса мероприятиярду.
ЦIуссалакрал райондалул школарттай видеоконференциялул связьрайхчIин ккаккан дунни Дагъусттаннал бакIчи Сергей Меликовлул МахIачкъала шагьрулул 54-мур школалий дирхьусса «Разговоры о важном» тIисса Ватандалул Вирттаврал кьинилун хас дурсса тIиртIу дарс.
Сергей Меликовлул дуклаки оьрчIру барча бунни Ватандалул Вирттаврал кьинилущал, бувсунни оьрчIахь байранналул тарихрая.
БакIчинал кIицI ларгунни Буттал КIанттул цIанийсса дяъвилий дагъусттанлувтурал дурсса чувшивуртту. Бувсунни, цIанасса ппурттуву Украиннал аьрщарай нанисса хасъсса операциялул иширттаву къучагъшивуртту ккаккан дурну, Аьрасатнал Вирттаврал цIарду лайкь дурсса дагъусттанлувтурая.
– ХIакьину щалагу билаятрай кIицI лаглай бур Ватандалул Вирттаврал кьини. Жува дакIнин бичлай буру билаятрал тархъаншиву ва цашиву дуручлай бивкIмий. ЦIанасса никирангу кIулну бикIан аьркинссар ва эбратну хьун аьркинссар жула вирттал, – увкунни Сергей Меликовлул.
Барчаллагь увкунни цивппа рязину Ватандалул мурадру буруччин «Каспий» батальондалул кьюкьравун нанисса жагьилтурахь.
ТIайланнасса эфирдануву Дагъусттаннал бакIчинал жавабру дуллунни дуклаки оьрчIал суллахьхьун, бувсунни Ватан дуруччаву цумацагу оьрчIал бурж хъанахъишиву.
ЦIуссалакрал райондалул школарттал педагогтурал, Республикалул БакIчинал махъру тасттикь буллай, кIицI лавгунни Ватандалул Вирттаврал кьини аьралитурал гьунарду абад буллалисса, ялун нанисса ник тарбия даврин хъуннасса агьамшиву дусса байранну хъанахъишиву.
Шиккува кIицI лаган, ЦIуссалакрал школарттай Ватандалул Вирттаврал кьинилул проектрал лагрулий дирхьунни Чувшиврул ва дакIнин бичаврил дарсру.
