ЦIуссалакрал райондалий тIивтIусса «Возрождение Родины» тIисса ихIсандалул фондравун 100 азарда къуруш дирчунни ЦIуссалакрал райондалийсса ЦIуссалакрал шяравасса Муртазал арс Малик Султановлул.
Хасъсса аьралий операциялий жан дуллусса, Чувшиврул ордендалунгу лайкь хьусса Султанов Муртазааьлил буттауссур Малик.
Хъунма хIал къавхьунни ЦIуссалакрал райондалий жяматийсса суккушиннардал сипталийн бувну хасъсса аьралий операциялий гьуртту хъанахъисса аьралитурал чIарав бацIаву, миннал кулпатирттал масъалартту щаллу баву мурадрайсса ихIсандалул фонд тIивтIуну.
– ХIакьинусса кьини укун чумартсса, сахаватлувсса инсантурал дуллалисса давурттал кьимат лавайссар. Барчаллагьран лайкьссар къучагъну аьралий буржру бартбигьлагьисса жагьилтурал махъ бацIан хIадурсса уздансса инсантал. Зу кунмасса патриотътал жула аьралитурал махъ буссаксса, ххувшаву ласунсса вихшалагу ххишала хъанай дур, – увкунни «Возрождение Родины» фондрал хъунама Зайнуллагь Мирзоевлул.
Украиннал аьрщарай хасъсса операция байбивхьуния шинмай гьурттучитуран ва миннал кулпатирттан цукссагу кумаг бунни ЦIуссалакрал райондалул жяматрал. Ва ихIсандалул фондрайн цикссагу Барчаллагьрал чагъарду бувкIунни СВО-лийсса аьралитурал чулуха.
Шиккува кIицI лаган, цума-цагу инсаннаща бюхъайссар хасъсса аьралий операциялул гьурттучитуран кумагрансса фондрацIун цащава шайсса кабакьу буван.
Имара Саидова
