Декабрьданул 8-нний МахIачкъалалив 1-мур ЦIувкIуллал жагьилтурал чIатIаракI ритаврил бяст-ччал хьунни. Вай соревнованияртту хьуна АьбдурахIман Гуйдалаев каялувшиву дуллалисса Ккуллал райондалул жагьилтурал ккурандалул сакиншиндарайну.

Бяст-ччаллий ххув хьуминнан бахшишругу дуллуна. Цалчинмур кIану бувгьуна Халилбагов Мурадлул, кIилчинмур – МахIаммадов Аьбдуллал, шамилчинмур – МахIаммадов МутIаллил. – Жулла шяраваллил агьалинал хIарачатрайну ва кумаграйну жуща бювхъунни гьашину Шяраваллил кьинигу лахъа-хъунну кIицI лаган, цайми мюнпатсса давурттугу дуван гъинтнил чIумал ЦIувкIрав. Жул мурад бур шагьрурдайгу жулва жагьилтал, оьрчIру лях-карахвагу цачIун батIавансса, спортрал бяс-ччаллавухгу гьуртту хъананшиврул. ЧIатIаракI ритавривухгу гьуртту хьуссар. Ва спортрал жура жула МухIаммад Идавсилгу (с.аь.в.) суннар, – увкунни Халилбагов Мурадлул.

Шиккува кIицI лаганна Мурад жяматрал гьар иширавух чялишну хIала уххайсса инсан ушиву. Спортрая архсса тема духьурчагу, кIицI къалавгун битан къахьунссар, цIанакул, жагьилсса инсантурал лакку мазрай чивчумур къабуккайсса ппурттуву, ванал цанмагу, 2 инсаннангу «Илчи» кказит чивчушиву. Мукунма ЦIувкIратусса цамагу жагьилнал — ХIасанхIусайнов Расуллулгу, 10 кказит чивчушивугу кIицI лаганна, подпискалул чIун къуртал хьуннин, махъминнангу гъира багьаншиврул миллатрал кказитрал чIарав бацIан.

ПатIимат Рамазанова