Гьарца шинал декабрьданул 9-нний жула билаятрай сий бюхттулну кIицI лагай аьпалул кьини – Буттал кIанттул Вирттаврал кьини. Ва кьини хас дурну дур цал дакIнил гьавас, кьувват, яхI ва чумартшиву Буттал КIанттул хьхьичIсса жаваблувшиннану ккаклакисса инсантуран, Виричувнал цIа багьавай хIалал дурцириннан.

Ва кьини Гъумучиял оьрчIал библиотекалий Магьирлугърал центрданущал цачIуну дурунни вирттал дакIнин бичлачисса «Гордимся славою Героев» тIисса мероприятие.
Муний гьуртту хьунни Гъумучиял школалул 3-мур классрал дуклаки оьрчIру.

Дирхьуну дия луттирдал выставка «Герои книг с железным характером» тIисса. Библиотекалул хъунмур Мариян Ашаевал бувсунни байрандалул тарихрая ва Аьрасатнал Вирттаврая. Ванил кIицI лавгунни дунияллий дакъашиву царагу паччахIлугъ Аьрасатнануксса дяъвирду ккавксса. Цуксса хIайпнугу, Буттал КIанттул цIанийсса Хъун дяъвилия махъгу бавцIуну бакъар дунияллий дяъвирду: Авгъанисттан, Чачаннал Республика ва хIакьину Украиннал аьрщарай нанисса хасъсса аьралий операция.
ОьрчIан хаснура ххуй дирзунни Хъун дяъвилул ветеран Петр Шпаничлуясса ва хIакьину хасъсса аьралий операциялий гьуртту хъанахъисса вирттавраясса видеоролик. Вайннавасса чIявуминная оьрчIан бавну бур телевизорданува, кказитирттая, интернетрава.

Дяъвилул темалух жагьилсса никиран хъунмасса гъира бур, гьай-гьай, ватандалул бучIантIимур вайннал кIунттихьри бусса. Выставкалий оьрчIан ххуй дирзунни цIардая ва наградарттая бусласисса  литература.

Дуклаки оьрчIал дурккунни Вирттаврал кьинилун хас дурсса назмурду, увкунни балайрду.
Ахирданий библиотекалул зузалал, дуклаки оьрчIал слайдрая  дуккингу бувну, дакIний битан тавакъю бунни вай махъру: «КъабучIиссар ххира хьун сагъми, агарда  ватандалул ххуллий жанну дуллуминная аьпа якъабарча».

Зулайхат Тахакьаева