Декабрьданул 1-нний МахIачкъалалив ГъазимахIаммад АхIмадовлул цIанийсса Олимпий резерврал спортшколалул дуллалисса дзюдорал первенствалий 34 килорал кIушиврий цалчинсса кIану бувгьунни СилахIуттиннул арс Хучбар Сулиевлул.
ЧIава спортсмен ур Хъусращиял жяматрал дянив бусраврай цала цIарду кьадиртусса, аьпа баннав цал, Аьбдуллагь Сулиевлул, Буниямин Аминовлул ва Залкипри Исяевхъал тухумраясса.
Хучбар дуклай ур С.М. Оьмаровлул цIанийсса МахIачкъалаллал 1-мур гимназиялий 3-мур классраву. Оьрмулул 5 шинаву айивхьуну ур дзюдорайн занай. Ванийннингу Хучбардул дзюдорал турнирдай, чемпионатирттай 12 хьхьичIунсса кIану бувгьуну бур.
Гьуртту хьуну ур Хучбар Аьрасатнал Виричу, авиациялул генерал-майор Суламбаг Оксановлул аьпалун хас дурсса регионнал дянивсса дзюдорал турнирданий, ЦIуссалакрал райондалий хьусса хасъсса аьралий операциялий къучагъну жанну дуллусса дагъусттанлувтурал аьпалул первенствалий. Ингушетиянал республикалий «Экажево» тIисса олимпий резерврал спортшколалул дзюдорал турнирданий гьуртту хьуну, Хучбардун приз хIисаврай дуллуну дур велосипед. ЧIава спортсмен кIийла гьуртту хьуну ур СВО-лий аьралий бурж бартбигьлай, виричуну жан дуллусса, полициялул капитан, «Ястреб-Каспий» СОБР-данул оперуполномоченный Султанов Муртазал аьпалун хас дурсса, «Ахмедхан» тIисса дзюдорал клубрал дуллалисса турнирдай. Хучбар ур хIакьсса спорсменнал хасият дусса, итххявхсса, гьунар бусса оьрчI.
ДакIнийхтуну барча уллай, чIа тIий буру Хучбардун дуккавривугу, спортравугу тIайлабацIуртту!
Имара Саидова
