ДР-лул Халкьуннал Мажлисрал Законодательствалул, законшиврул, паччахIлугърал дузалшиндарал, кIанттул цилакаялувшиврул ва регламентрал комитетрал председатель Артур Исрапиловлул бувсунни агьалинал хьхьичIун ласласисса МахIачкъала шагьрулул статус баххана баврицIунсса реформа – чIумул тIалавшинна душиву.
Декабрьданул 3-нний «Дагестан» РИА-лий хьусса пресс -конференциялий Артур Исрапиловлул бусаврийну, республикалул хъуншагьру анаварсса бущилий лябуклай бур, агьали гьарза хъанай бур. 2015-ку шиная шиннай уттинин зузи дурну диркIсса кIанттул цилакаялувшиврул 2 шачIанттул даражалийсса системалийну (двухуровневая модель) аьркинну бия шагьрулул ялапарлувтуран бигьану дузал буллан цалва масъалартту муниципал властьрайхчил, мюнпатну ва лавайсса даражалий щаллу буллан каялувшиврул хIукмурду, чан дуван бюрократиялул давуртту ва агьалинащалсса дахIаву дузал дуван муданна ва анаварсса бущилий.
Аьрасатнаву шанма шагьрулий диркIссар шагьрулул вивсса районну: МахIачкъалалий, Самаралий ва Челябинскалий.
Челябинскалий бувкIун бур кIанттул цилакаялувшиврул сакиншиндарал цIусса системалийн. Самаралийгу цIусса системалийн бучIаврил давуртту къуртал шавай дур.
Амма къабювхъуну бур мюнпатну дачIин полномочияртту (къуллугърал ихтиярду) шагьрулул округрайх ва шагьрулул районнайх. Цанчирча 2 шачIанттул даражалийсса шагьрулул управлениялул система мюнпатну зузисса къадиркIун дур.
«Федерал закондалуву цивура диркIссар диялдакъашивуртту, шагьрулул вивсса районнал полномочиярттавасса чIяруми диркIссар аьмсса, балжи дакъасса журалийсса (общего, неконкретного характера). МахIачкъалалив шагьрулул вивсса районнал цаппара балжи дурсса полномочиярттугума шагьрулул округравун дагьан дурну дия», – кунни Артур Исрапиловлул.
Пресс-конференциялий бувсунни мукунма МахIачкъала шагьрулуву дахханашивуртту хьуну махъ полномочияртту къадачIинтIишиву шагьрулийх ва шагьрулул районнайх.
Аьрасатнаву шанма шагьрулий диркIссар шагьрулул вивсса районну: МахIачкъалалий, Самаралий ва Челябинскалий.
Челябинскалий бувкIун бур кIанттул цилакаялувшиврул сакиншиндарал цIусса системалийн. Самаралийгу цIусса системалийн бучIаврил давуртту къуртал шавай дур.
Артур Исрапиловлул тIимунийну, ва масъала ххал бигьин цала рисалалий тапшур бувну бур Дагъусттаннал бакIчи Сергей Меликовлул.
Жула хъуншагьрулул ца шачIанттуйсса даражалул системалийн бучIаврийну бюхъан тIий бур шагьрулул хозяйствалул управлениялул оптимизация дуван, луртанну чанссагу тIайласса кьаралданий ишла дуллан ва шагьрулул инфраструктуралул лябуккулул мюнпат лахъ буван.
Депутатнал бувсунни шагьрулул система даххана дуллалишиву инсантурал пикри-зикрирдугу хIисаврайн лавсун. Инсантураща бюхълай бур цала пикри-зикрирдая бусан шагьрулул администрациялийн бувкIун ва чичрулийну заявленияртту буллуну.
ХIасан Аьдилов
