Нальчик шагьрулий хьусса «Лучший преподаватель детской школы искусств — 2024» тIисса щалагу Аьрасатнал конкурсрал Ухссавнил Ккавкказуллал Федерал Округрал ятIапIрай ххув хьуну бувкIунни жула лаккудуш, ГьунчIукьатIрал шяравасса ТIагьират Аьлиева.
Ва конкурсрай гьуртту хьунни Ухссанил Ккакказнавасса оьрчIал искусствардал школардал хьхьичIунсса преподавательтал.
Жагьилсса пишакар ТIагьират Аьлиевал ххюрахъул шинну хьуну дур Каспийск шагьрулийсса Сергей Агъабавовлул цIанийсса ОьрчIал искусствардал школалий итххявхсса оьрчIахь сольфеджио, музыка ва музыкалул литературалул теориялул дарсру дихьлай.
ТIагьират бувну бур 1995-ку шинал Каспийск шагьрулий. ТIагьиратлул ппу МахIаммад (аьпа баннав цал) Дагъусттаннал Художниктурал союзрал член, тамансса шиннардий уссия ДГПУ-лул художествалул ва графикалул факультетрай дарсру дихьлай. Вагу хъинну гьунар бусса ххаллилсса инсан ия. ТIагьиратлул нину Тамаригу изобразительный искусствардал преподавательну зий буссия. ЦIана ва цамур пишалий зий бур.
Музыкалухсса гъира Тагьиратлувун оьрчIнийва багьну бур. КуртIсса дур ванил музыкалул кIулшиву. ТIагьиратлул бувккуну бур Агъабавовлул цIанийсса ОьрчIал искусствардал школа, Готфрид ХIасановлул цIанийсса МахIачкъалаллал музыкалул училище, Ашттарханнал паччахIлугърал консерватория. Ва бур циярагу, тарбиячитураягу хъуннасса тIалавшинна дусса педагог. БацIаву дакъа ларай дуллайнма бур пишалул магьиршиву. ВаничIан искусствалул школалийн заназисса оьрчIал, фестивальлай, олимпиадарттай ва проектру ахттар даврил конкурсирттай гьуртту хьуну, цимилагу хьхьичIунсса кIанттурду бувгьуну бур.
2023-ку шинал Тагьират Аьлиевал сипталийну дайдирхьуну дур «В Каспийске мое сердце» тIисса, Каспийск шагьрулун дакъассагу, щалагу Республикалунгу хъуннасса агьамшиву дусса проект.
Гьашину мартрай, ТIагьират хьхьичIунсса преподаватель хIисаврай, язи бувгьуну бур «Лучший преподаватель детской школы искусств — 2024» тIисса музыкалул искусствалул аралуву зузисса пишакартурал дянивсса конкурсрай гьуртту хьун.
– Майрай на гьуртту хьура конкурсрал региондалулмур ятIапIрай. Шикку 1-мур кIану бувгьуну махъ октябрьданий ттуйн оьвкунни СКФО-лиймур ятIапIрай гьуртту хьун. Конкурсрай бия мукьва журалул бяст-ччаллу: самопрезентация, тIиртIу дарс дишаву, пишалул ххуллийсса ихтилатру ва методикалул семинарду баву. Укунсса даражалул конкурсрай цалчинна гьуртту хьусса. БакIрай на хъинну хъювсул буклай буссияв. Утти тIурча, ххарину бура нава зузисса школалул даврин, ттула захIматран лайкьсса кьимат бищаврия, – буслай бур ТIагьират.
Ва конкурсрай ванил музыкалул тIиртIу дарс дирхьуну дур цинма кIулвагу бакъасса Нальчик шагьрулул Культуралул институтрачIасса искусствалул школалул оьрчIахь.
ЧIал къавхьуну, ТIагьират композиторшиврул гьунар бусса, хъинну итххявхсса цила ученик МахIаммадов Щайхлущал гьуртту хьунтIиссар Москавлив хьунтIисса конкурсрал финалданий.
– Конкурс хьхьичIра-хьхьичI хъанай дур педагогтурал хIал ххал бигьлагьисса, вайннал дуллалисса даврил хIасиллу чIалачIи дуллалисса давуну, – тIий бур ТIагьират.
ЦIана ТIагьират конкурсрайн хIадур уллай бур цила ученик.
– Вава школалийн занай буссия ттул уссурвал, ссурвал. На шикку дуклакисса ппурттуву гьуртту шайссияв цинярдагу конкурсирттай. ТIайламур бусан, ттун ва школа ттула кулпат кунма чIалан бикIай, – тIий бур ТIагьират.
ЧIа учинну ТIагьаратлун гихунмайгу тIалабацIуртту!
Имара Саидова
