Ноябрьданул 22-нний МахIачкъалалив Оьруснал театрданул залдануву ларайсса даражалий ларгунни Дагъусттаннал халкьуннал артистал АхIмад АхIмадовлул ва Лариса ХIажиевал цачIусса концерт. Театрданул зал щапI куну бувцIуну бия тамашачитурал.
КIиягу артистнал творчество ххираминнаву жагьилссагу бур, оьрмулул хъуниссагу, бурлак бакъассагу, цайми миллатирттаяссагу. ХIакьсса культуралул, искусствалул мазран таржумачи къааьркинни. Му гьарнан бувчIайсса маз бур.
Ци чулийгу, пахру багьлай бия укунсса даражалул артистал, Дагъусттаннал булбул Ларисагу, ляличIисса чIунил заллу АхIмадгу ттула миллатрая бушиврул.
Арулва журалул асарду бур Ларисал балайрдаву. Мукунма бюххансса бур магърибуллал билаятгу цала чIуний хIайран бувсса АхIмадлулми балайрдугу. АьнтIикIасса Ларисалгу, тачIав бизар къашайсса АхIмадлулгу балайрдах мякь бувккун бия тамашачитал, хIатта вайннал цачIусса концертгу, АхIмадлул цаламургу хьуну хъунма хIал къалавгун бунугу.
Конферансьешиву АхIмадлул творчествалул личIиссара тема дур. Ва гьунаргу ванаву балай учавунияр хъисвагу чанну бакъар. Ва ххуллухьгу концерт дачин дурну цува ия.
Тамашачитуращалсса аьчухсса ихтилат, цIу бусса хъярч-махсартту, миннул тяхъа-таза буккан бувсса тамашачитал. ЛяличIисса дия залданувусса аура.
Концертрай щаллу бувсса сайки циняв балайрдал махъру ва макьанну АхIмадлул цалла чирчусса дия.
Гьар мудан кунма цIу буну ларххун бия Ларисагу.
Ва концертрай хъиннува аьч хъанай бия кIиягу артистнал гьарица чулухасса гьунар, гьармуниву тIин бушиву.
ЦIанамур концертрал композициягу дахханасса дия. СахIналий ккурчIа бувну, тамашачитал бялахъан буллай бия Лакрал театрданул артистал. Вайннал ккаккан бунни М-З.Аминовлул «Вассалам-вакалам» спектакльданувасса парча. Ххуйя тачIав бизар къашайсса Саният Рамазановагу.
Хъинну дакI даркьунни Туркнал билаятрая увкIсса АхIмадлул сахIналия «Илчи» кказит лахъа-хъун баврийгу. Гьарица увкусса мукъува аьч хъанай дия артистнал Ватандалухсса ччаву.
Ттуллагу дакI ххари хьунни экрандалий ккаккан дуллалисса суратирттавух ттула ниттил суратрай ябавцIуну.
АхIмадлул нину Султанатгу, ттул нинугу архIал дуклай бивкIссар Дагъусттаннал пединститутраву, студент заманная шихуннай дусшиву дуссия.
Акъахьунссия ва кьини АхIмадлул ва Ларисал концертрая неъмат къалавсъсса. Му исват буллай бия ришлашисса хъатурдилгу, артистътуран лавсун нанисса тIутIал кацIурдилгу.
Концертрал программа къуртал хьуну махъ Лариса ХIажиевал барчаллагь увкунни Дагъусттаннал культуралул министр Зарема Буттаевахь, Лакрал театрданул каялувчитурахь ва артистътурахь, цинявппагу ва концерт сакин дан чIарав бавцIуминнахь, гьай-гьай, цивппа ххирасса тамашачитурахь. АхIмадлулгу, Ларисалгу балайрдах мякь бувккун бивкIсса тамашачитуран кIивагу гьунар хIала бувхсса концертрая унгу-унгусса байран хьунни. Концертрал дайдихьугу, дайлит1угу артистътурал дунни тамашачитуран ххира хьусса «Зульфия» балайлийну.
Уттигу концертрах ялугьлай бушиву буслай, личIи хъанай бия вай артистътурая.
Андриана Аьбдуллаева
