Ноябрьданул 22-нний Ма­хIачкъалалив, Оьруснал театрданул залдануву Да­гъусттаннал халкьуннал артистътурал, Лариса ХIажиевал ва АхIмад АхIмадовлул, концерт душиврул аваза биялсса бия, сайки 2 зурул хьхьичIва билетругу бавххуну бия. Концертрайн багьансса тIайлабацIу хьуминнавух навагу тамаша бувну бивкIра, щапI куну бувцIусса, залданувуцириннай.

Концертрайн бучIан ччисса агьалинал миннатирттал хатир бувну, цаппара кIантту ххибувну бия щябикIай кIанттал лях. Бия лакгу, къалакгу. Ттул чIарав, масалдаран, табасаран миллатрал жагьил ия, СВО-лул гьурттучи – Москавлиясса. БацIан къавхьуну цIухлай бакъарав на, Москавлия лажинни концертралшиврий увкIрав тIий. УвкIра увкунни. Концертгу ххал дурну, дяхьхьунува Москавлив, тиччагу Донецкалийнай най ушиву бувсунни, отпуск къуртал хьуну. Гъалгъа тIун ччай бунугу, концертрая аьрайн нанисса инсаннахь ци тIунссияв. Маччасса хъамитайпагу буслай бия, оьрчIал поликлиникалий хIакин-педиатр, Яруссаннал миллатрал инсан, концертрайн чIал хъанай бурача, цихлува къашайшалт кьамул бувакьай тIий бивкIшиву.

Найбунува учинна, хъинну тIайла дарцIусса тандем дур куну Ларисал ва АхIмадлул. Мяй­жаннугу, концерт дачин дуван­сса конферансьегу увагу аьркинну акъая, цивппа, Лариса ва АхIмад усттарну дачин дурну бия. Лариса – иминну, личIину да-я бакъа, АхIмад – хъярчру хIалану. Лакрал культуралул тарихраву ва дия цIушинна, Лакрал паччахIлугърал театрданул артистътал ва халкьуннал артистътал-балайчитал сахIналий хIала бувхсса. Театрданул коллектив бувккуна МахIаммад-Загьид Аминовлул «Вассалам, вакалам» тIисса спектакльданувасса парча ккаккан бан. Ва ялагу, ца тIааьнсса дуссухалттул байххихху бивтунни залданувуцири, музыкалул тIилисин ва пасихIсса лакку мазрал хIикмат хIала бувххун.

Буниялттунгу, бияча ца аьламатсса иш! Фейерверк! Утти­заманнул жагьилтуран нахIу лавчIсса калима хьхьичIун ларсун учин, шяраваллил вайб! Театрданул артистал сахIналий хьхьичIунсса хIухчин дуллу­сса мусил ссят шюшлай бунува, лях-карах Лариса ва АхIмадгу балайрду тIий бия. Залданувуминнал ва сахIналийминнал гур­сса хъатурдил чIу, хъярчирдал шад бувсса лахъсса хъяхъаврил чIурду, жулва жагьил заманнул «хитру», къюкIливун бухлахисса балайрду: «ЛухIи яруй», «Чаргудай», «Ваппабай», «Урмахху», «Агь, ххирай, ххазинай». Вай халкьуннал балайрдан цIусса оьрму буллунни, цIусса къалай дурккун, экьинани бунни. ЦIусса балайрду? Премьерарду? Ми бакъа бикIайхрав Ларисал ва АхIмадлул концертрай. Ши­ккува, хIалу дагьнура, барчаллагь учин ччай бура АхIмадлухь цIусса балайрдахлу, ниттихасса ва Лариса ХIажиевахасса ттулва шеърирдан цIусса оьрму булаврихлу.

Кьимат тамашачитурал, вичIи дирхьуминнал бищунссар, лакрал литературагу, культурагу куртIну кIулсса инсаннал, АхIмадлул «урттул къар ларсун нанисса бавай» я бацIаву ххуйсса ишри, мунал кунма бюхханну, асар хьунну му балай цаманал къаучинссия. Лариса ХIажиевахасса назмугу, АхIмадлул цалагу сахIналий кIицI лавгсса куццуй, дачIи ссятрал мутталий, ца махъ, ца хха баххана, бакьин къабувну хIасул хьусса назмур, Ларисах­сса ччавугу, мунил творчествалул кьиматгу цайнува цивппа шеърилул ххуттардивун лавгун тIий. АхIмад махъ зуманив сукку хьунни концертру дуллай. Лариса ХIажиева кунма, гьарзат хIисавравун ларсун, мюрш-кьюршгума итталун дагьанну, дюхъан дурну концерт ккаккан дувайсса балайчи республикалий цама акъар. Мяйжаннугу концерт-спектакль лавайсса даражалий хьунни, муниха зий, оператортурая байбивхьуну режиссернайн бияннин биял­сса захIмат бивхьушиву чIалай бия. ЦIа къадурну бацIан къахьунссар Ларисал лаххиялиягу. Аслийсса зунттал душнил багьу-бизу ккаккан буллалисса лаххиягу дикIай, цIу бусса зана-кьулушиннагу. БакIрал ххуйшиву ва бювхъусса чIу Ларисан Заннал сахаватну буллуну бур. Амма захIмат къа­ххирану, ци гьунарданул заллу ухьурчагу, гьаз хьун къашайссар.

Лариса бур хъу-лухччинуха зий аьдат хьусса, захIмат­раву савсъсса душ. ИчIаллил кушу ххирасса, дуллалимунил паргалсса. Вагу чун нанисса кIицI лагавур учирча, захIмат ххирашиврийра чIурчIав дуллалисса. Репертуарданувусса гьарца балай, махъру, макьан хъинну ялув бавцIуну личIи дувайсса ва кьакьарттуй зулму хьунну репетициярду дуллалисса.

Гьунар ябангу, ялун личин бангур усттаршивугу, гьунаргу аьркинсса. ХьхьичIва-хьхьичI, цилва Ларисал бюхъу-хIарачат барачатнур ванил концертру агьалинан хъамакъаритансса даражалийсса хъана­хъисса. ЛичIину ванил кумагчитал, чIарахбацIултгу бу­сса ххай бакъара. Ва концерт-спектакль, жулва мазгу, магьирлугъгу, тарихгу яшаврил ххуллийсса, лувату нанисса никирангу мюнпатсса давур. Лакку маз яшаврин кумагран­сса, жагьилтурал дакIурдиву чанссарагу ниттил мазрах­сса ччаву чантI учин дуван­сса. Фольклор, ппухълуннал рувхIанийсса ирс-ххазина хъама къабитансса. Укунсса арсру ва душру бусса миллатгу арши бусса миллатран ккаллиссар. Хъинникьай лакрал дунияллий буну укун агьалинал дакIурдивун кьутIа тIутIисса, миллатшиврул кIулши чантI учин дуллалисса балайчитал – чаннацIуртти.

ЦIурттал дуэтрал концерт ччянива агьалинан ххира хьу­сса, щаллагу дунияллул лагрулийсса сийлийсса конкурсрай Болгариянаву цалчин­сса кIану бувгьусса «Зульфия» тIисса балайлия дайдирхьуна, вава балайлину къурталгу дурна. Шанна ссят ва дачIи, мурхьирдал чIапIив кунна, лерххун ларгуна, артистътуран, балайчитуран ва тамашачитуран лакку балайрдал, лакку мазрал ххуйшиврул ххаришивугу, неъматгу буллуну. Цукссагу хIаллай, ппив хьун къаччай, гурсса хъатру ришлай бавцIуну бия караматсса балайрдал гьаваслан дурсса дакIурдил заллухъру барчаллагьрай. Интнил хIукъулул къаданну Ларисал ва АхIмадлул балайрдал зул дакIру марцI дуккан дантIиссар.

ПатIимат Рамазанова