Махъсса ппурттуву жула халкь бакIрай бавцIуну, цала минардайн зана хъанай, хъу-лухччив дугьлай, багъ-бахчарду буллай, хозяйствардахун багьлай бушиврия дакI ххари хъанай дур. Жул тамансса хIалъя, СунбатIуллал шяраваллия арх дакъа, Бюхттул-Ссуру зунттулу тIиртIусса «КунцIалу» тIисса агрофирмалия баллай, кIиккун биян ччай. Вай гьантрай Ккуллал райондалийн аьрххи багьну буна, сант ишла дурну, агрофирмалийнгу лавгру.
Мяйжаннугу, цIа дансса, цинявннан эбрат хьунсса хозяйство тIиртIуну дия шикку. ЦучIав вих къахьунссар, ва хозяйствалуха зун шиккун чIярусса шиннардий Москавлив ялапар хъанай, зий ивкIсса экономикалул элмурдал доктор, профессор СунбатIуллал шяравасса АьбдурахIманнул арс Адамов Насруллагь увкIун уссар тIий.

 

Насруллагь увну ур Сун­батIуллал шяраву учительтурал кулпатраву. Ванал буттал АьбдурахIманнул 23-шин дурну дур СунбатIуллал школалул директорну зий. Нину Розагу географиялул ва химиялул дарсру дихьлай бивкIун бур. КIира шинай Германнаву аьралий бурж лахълайгу ивкIун, зана хьуну махъ увххун ур С. Орджоникидзел цIанийсса паччахIлугърал управлениялул академиялувун. Мунияр махъ къутрал бувну бур Москавуллал Управлениялул университет. Шиккува къуртал бувну бур аспирантура ва докторантура. АцIнияхъайсса шинну дурну дур ванал университетрал кафедралул заведующийну зий. Мунияр махъ Аьрасатнал Кооперациялул университетраву кафедралул заведующийну ивкIун ур. Цила чIумал Аьрасатнаву ва ивкIун ур оьрмулул яла жагьилма аудитор.
Пишалул ххуллий Насруллагь лайкь хьуну ур Аьрасатнал кооперациялул университетрал ректорнал чулухасса, «Трансстрой» ОАО-лул корпорациялул ва Финансирттал ва экономикалул институтрал чулухасса хIурматрал грамотарттан.
Насруллагь гьуртту хьуну ур дазул кьатIувсса элмулул ва практикалул конференциярттай. Зувиллихъайсса шинну дур ванал преподавательнал стажрал, миннува 13 шин дурну дур университетраву дарсру дихьлай. Насруллагьлул чирчуну дур 300-ннийн дирсса элмийсса давуртту. Ва ур «Менеджер года» тIисса щалагу Аьрасатнал конкурсрал лауреат. Лайкь хьуну ур «Сдержанность и компетентность» тIисса ордендалун, «За заслуги в транспортном строительстве» тIисса лишандалун, мукуна «За вклад в развитие потребительской кооперации России» тIисса ордендалун.

– ПандемиялуцIун бавхIуну, манзилданий дарсру дихьлай, зун бивкIукун, пикри хьуна, ттула буттал шяравун увкIун, хозяйствалуха зун. Шикку 20-хъул шиннардил хьхьичIра дуссия хозяйство. Ва давриха зий уссия жула Салманов ХIажикьурбан. Оьрму-хIал лавгсса ХIажикьурбаннунгу бигьану бакъая. Пикри хьунни агрофирмалул хъунмур хъар ттуйнна ласун.
АцIния арулла шинай ивк1ссара на буттал шяраву ялапар хъанай. Танийсса жагьилтал куна, нагу икIайссияв шия ли­хъан та бириянавав тIий. Яла ттун бувчIуна буттал кIанттуяр ххуйсса цичIав дакъашиву. ХIатта, гьарица шинах ниттин кумаг бан шяравун учIайсса ивкIнугу, буттал кIанттуя мякь лихлай бакъая, кIива-шанма барз Лаккуй бансса багьана шайссания тIун икIайссияв. Арх увцун махъ хъиннува бувчIлан бивкIуна жула Лакку билаятрал кьадру. Зунттурдайн я щайхту, ттул чурххавун рухI дучIай, дакIнийсса цинявппа буруккинтту буккай. Игьалагара на так зунттаву. Асар хъанан бикIай, жула щархъава кулпатру бивзун нанаву, жула шяраваллу дачIра дуклай, чIаххуврайсса цайми миллатиртталми хъуни хъанай най душиву, – тIий ур Насруллагь.
Щалагу дунияллий пандемия дайдирхьусса чIумал, пикри хьуну бур ванан, буттал шяравун зана хьуну, хозяйствалуха зун. ЦIанакулгу Насруллагьлуйн Москавлив Тимирязевлул цIанийсса университетравун кафедралул заведующийну, Плехановлул акдемиялул менеджментрал кафедралул профессорну зун оьвтIий бур. Шяраву унугу, Насруллагь элмийсса давуртту дяличIан ритлай акъар. ХIакьинугу ва ур «Российский экономический Интернет-журналданул» хъунама редакторну. Лях-карах, бизнес школардал каялувчитурал тIалав увну, ва лагайсса ур компаниялул зузалтрансса финансирттал учетрацIун бавхIусса авторский курс буккин.
Хозяйствалул даврил хъуннасса чIун зехлай дур, кару диял хъанай дакъар. Цанма кумаг бавугу, лакку кIану ххира шавугу, захIмат буллай вардиш шавугу мурадрай, Насруллагьлул Москавлия увцуну ур хъунама оьрчIгу. ЦIана ва дуклай ур СунбатIуллал школалий.
– Ттул кулпатрал, оьрчIал гъи шикку рутайссар. Гьашину хъунама оьрчIгу шиккува ацIан ав. СунбатIуллал школалийн занай уссар. Навагу шяраву хъуна хьусса инсан ухьувкун, ччай бия ттула арснангу шяраваллил кIанттурду, тIабиаьт, багьу-бизу кIул хьуну, шиччалу ххира хьуну. Ччай бия ванан лакку маз лавхьхьуну. Байбихьулий Москавлив аьдат хьусса оьрчI щала рязину акъассия, утти вардиш хьуну, гьалмахтурайнгу шихун оьвтIий ур. Шиччасса суратру гьан дуркун, тайгу махIаттал хъанай бур жула тIабиаьтрал караматшиврий, – буслай ур Насруллагь.
Мяйжаннугу, махIаттал хьунсса тIабиаьт дур жула зунттаву. Уртту-тIутIи кьаркьсса, ссуттихуннайсса чIумалгума шиччалу караматну чIалай бия. Мащилул лагма-ялтту дия кIялагьилул хIалу. Жюр-жюр тIий неххавун хIала духлайсса щаращал щинну, кьанивсса бярав гьузузисса урдакру, лагмасса ардай канакисса ризкьи… цила дикIайкунсса шяраваллил сурат. Вай караматшивуртту ядангу инсаннал аякьалийсса ка аьркинни.
ХIакьинусса кьини шикку ябуллай бур 200-нийн бивсса ризкьи. ТIивтIуну бур нагь-нис дайсса, гъилисса, дяркъусса щин дусса цех. Агрофирмалий гьарца зат дур механизированнайсса: оьллу ттизаву, ризкьи бусса ппал марцI баву. Райондалий цалчин вайннал дирхьуну дур 70-80-хъул километралийхсса ризкьи архну къагьавансса ттукIрайсса ххаллу («электропастухру»).
– Ва кIанттай хьхьичIрагу ферма диркIссар. Та чIумал тагу аргъирай диркIун дур. Амма, жу кьамул дурсса чIумал, шиччалу лащинсса тагьарданий бия. Ххуллурду зия хьуну бия, ттукI бакъая, царагу магъи сагъну дакъая. ЧIатIух машина гьансса ххуллу буллан багьайва. Гьарцимурца цIу дуккан дуллан багьунни. Диялсса давуртту дарду. Ттиния тиннай дулланссагу чIярур. Шиччалу цIу буккан баву хъунмурчIин Артур Амуттиновлул хIарачатрайну хьуссар.
Цалсса, циняв шартIру дузал даннин, ризкьи гьарза буллай бакъару, цанчирчан зунттал кIанттурдай кIи хъинну дяркъусса дикIай. КIинттулнинсса ххулугу жува байссар, цаппара ххалал машинартту машангу ласару. НакI-нис лув дагьан къаритай, шиккунма бувкIун машан ласай. ЖуламиннацIун ссурхIи, лазги, табасарангума бучIай. МарцIсса гьавалий, уртту-щинай хъуни буллали­сса ризкьи бур. Гъаттара гьарза бан ччай буру. Амма кару диял хъанай дакъар. Хъунма­сса тIайлабацIу хьунни жул хозяйствалийн Рамазан бакIрайн агьаву. Ва ур даргиричу. Ванай дакI даркьуну, бригадирну итарду. КарчI дакъасса ххуйсса зузала ур, – тIий ур Насруллагь.
Ххал барду жу агрофирмалийсса Рамазаннул багьу-бизу. ЦIанасса шиккусса циняв давуртту дуллалима ва ур. Оьллугу ттивзуну, нагь-нис ванал дуллай ур. Гьарица кIанттайгу мукунсса марцIшиву дия, шикку хъамитайпа бакъашиву хIисав хъанай бакъая.
Шикку мукунма, чIумуха лавхьхьуну, туристътал бучIан буллансса шартIругу дузал дуллай бур. Уттигъанну вайннал дурххуну дур 10 миллиондалунсса, агротуризм хьхьичIуннай даву мурадрай­сса Аьрасатнал шяраваллил хозяйствалул министерствалул грант. Ва давугу хIалли-хIаллих тIий нирхиравун рутлай бур. Жу бувкIсса чIумалгу туристътурансса къатри дуллай булувкьуну бия усттартал. Насруллагьлул бусласимунийн бувну, агрофирмалул ва агротуризмалул ишру бачин бан хъунмасса захIмат буллай ур ванал цалагу гъанчу Артур Амуттинов.
Гьай-гьай, хIакьину шикку дурсса къатри хьхьирил зуманив диркIссания, хъунмасса хайр ласун бюхъанссия. Амма, Артур Михайловичлул вай давуртту ххишаласса харжгу буккан бувну, буттал кIанттай аргъ дизаву мурадрай, шикку дансса пикри хьуну бур. Ва цувагу зузала ур. Мажал биривсса чIумал, шиккун увкIун, зун икIайсса ур. Агрофирмалия баллай, шиккун бучIайсса бур республикалул къуллугъчитал ва цаймигу бусравсса хъамал.
– Туристътал кIункIу баврихгу жу хъуннасса къулагъас дуллай буссару. Шикку ляличIисса уртту-щин дур, марцIсса гьава бур. Цал шиккун увкIсса инсан яла-ялагу зана хьунссар тIисса пикри бур. Планну чIярусса дур. КIялагьилул хIав туристътал бигьалаглансса, чяй, кофе хIачIлансса ккурчIарду бан пикрирду бур. Мукунма, пикрилий буру райондалул центрданий, Ваччав, ххуйсса оборудованиялулгу дузал бувсса, гьарта-гьарзасса нагь-нис, дикI дахлансса цех тIитIин.
ЦIанасса ппурттуву жула продукция дахлансса кьутIирду дуллай буру МахIачкъалаливсса хъунисса ттучаннащал. Утти­гъанну, жул агрофирмалия кIул хьусса аьрабнал щайхтуращалгу хьунни хIала-гьурттуну зунсса ихтилатру.
Имара Саидова
Андриана Аьбдуллаева