«Ниттил маз», «Буттал кIану», «Барачат» тIисса махъру куртIсса махъру хъанай бур, Дагъусттаннал дазуя увккун махъ, ина чассара куну суал буллукун, на Гъази-Гъумучатура учара, бакIгу гьаз дурну, лахъну. Му бур жула лакрал бакIрал чагъар, бюхттулсса инсаншиврул документ. Микку хIурматгу лахъ шай биялну.
Цаппара гьантрал хьхьичI Гъази-Гъумук, цIуну бувсса ххаллилсса школалий, щалва жяматгу бавтIун, дуклаки оьрчIая байбивхьуну, муаьллимтурайн бияннин, дунни хъинну ххуйсса мероприятие – МахIаммад-ХIажи Къаплановлул сакин бувсса «Гъази-Гъумучи ва мунил тухумру» тIисса кIива томрайсса луттирал презентация.
Байбихьулул махъ лавхъуна Лакрал райондалун хъунама Юсуп МахIаммадовлул. Гьарта-гьарзасса доклад бувна школалул директор Соня Макьаевал. Муния махъ ххуй-ххуйсса ихтилатру бувна цайми-цаймигу бусравсса вакилтурал ва хъамаллурал.
Ахирданий МахIаммад-ХIажинал цалагу лавхъуна дакIнийхтунусса барчаллагьрал махъ. Гьарзад ххуйя, ххаллилъя. Амма, тIайламур бусан, ттул дакIнийн цахъи асар биян бунни МахIаммадхIажинал оьрмулуцIун цIакьну бавхIусса ЦIуссалакрал райондалийн багьаймур чул чанну бакъа кIицI къабаву. Авторнал мукун ххаллилсса, лайкьсса луттирду чичавриву ЦIуссалакрал жяматрал гьурттушивугу диялсса дуссар тIиссару.
ХIурматращал
Зайнуллагь Мирзоев
МахIаммадхIажи Къаплановлун
цIа куну
Къапланхъул, Идрисхъул, МахIаммад-ХIажий!
Исламрал кIира цIа вин щил дирзуна?
Идавс МахIаммадгу, ХIажлил ХIажигу –
Му захIматсса гьиву вий щил дирхьуна?
Вин ссан аьркинссия цIардаха лахьлан,
Кьабивтун оьрмулул утта ххуллугу,
Жегъирххуллийх Лаккуйн цIуницIа ачин?
ЗахIматсса давуртту бакIрайн цан ласав?
Щамхалтал ва хантал, тайпа-тухумру,
Уздантал ва чIанкIри, мискин-гъаривтал…
Вин ссан аьркинссия цинцилттай бихьлан,
Лакрал марцIсса жямат бястлихун бичлан.
Вил хъуни луттирдах жу ябитарду,
Жун чIалан бивкIунни ина був захIмат.
Жу махIатталссару, учин махъ бакъар,
Барчаллагь тIиссару бухкъалагайсса!
Цалчинсса лакку махъ жущал чивчума,
Цалчинсса оьрус махъ жущал увкума…
Жуяхха зун дирзсса «Аслан-Къапланхъул»
Жуя вин буллусса язисса душгу.
Вил оьвхъусса уссихь Аьвдулхаликьлухь
Буккин буван ччива ина чивчумур.
Ккаккан бангу ччива битав Сагидлун,
Буруган бан ччива аьпа бувмигу.
Циксса хьхьурду дичав ина пикрирдай,
Тайпа-тухумирттан цIарду ххал дуллай?
Цуксса къуццу бував чаннасса кьини,
ЦIаних Гъумучиял тарих аьч буллай?
Тти гьаз дувантIиссар лакрал вирттаврал
Жунна хъамадиртсса буттахъал цIарду
Гъази-Гъумучиял шагьрулул тарих
ЦIунил гьаз бантIиссар цIурттайн бияннин.
Ина бувсса захIмат Лакку улклуха
Арулла никиран барачат хьуннав!
Ина дурсса даву эбратну хьуну
Цинярда щархъая чичлай лякъиннав!
ЦIуссалакрал жямат
