Ноябрьданул 20-нний Миллатрал библиотекалуву лахъа-хъунну хьунни жяматрал, политикалул ва паччахIлугърал цIанихсса ишккакку, гьунар бусса сакиншинначи ва каялувчи, аьлимчу-экономист Амуттинов Амучи Михаиллул арснан хас бувсса «ЧIумул дахханашивурттугу духIлай» («Преодолевая время перемен») тIисса луттирал презентация.
Мероприятиялий гьуртту хьунни оьрмулул ва пишалул ххуллий, личIи-личIисса политикалул ва жяматрал иширттаву Амучи Михайловичлущал хьунабавкьусса, хIала-гьурттуну бивкIсса инсантал, дустал, гъан-маччами. Дачин дурну бия мероприятие «Литературный Дагестан» журналданул хъунама редактор, проектрал автор Мурад АхIмадов ва Дагъусттаннал Чичултрал союзрал лакрал секциялул хъунама Супиян Оьмаров.

Увну ур Амучи Михайлович 1951-ку шинал декабрьданул 7-нний Ккуллал райондалий­сса СунбатIуллал шяраву.
1969-ку шинал, школа къуртал бувну махъ, увххун ур Рос­тов-на-Дону шагьрулий Му­ххал ххуллул транспортрал инженертурал институтравун. ЗахIматрал ххуллу байбивхьуну бур Казахнал муххал ххуллий механикну.
1975-ку шинал зун ивкIун ур Дагъусттаннай. Слесарьная тIайла хьуну Строительный объединениялул (УМС) генеральный директорнайн ияннин бивтун бур циняв шачIантту.
1997-ку шинал ивтун ур Да­гъусттаннал экономикалул министрну. Мура чIумал ва ивкIун ур Дагъусттаннал ХIукуматрал председательнал хъиривчунугу.
1999-ку шиная айивхьуну Дагъусттаннал Пенсионный фондрай каялувшиву дуллай ивкIун ур, архIала ХIукуматрал председательнал хъиривчунал бигардугу бартбигьлай. 2010-2018-ку шиннардий ва ур Москавуллал Экономикалул институтрал директорнал хъиривчуну, архIала жяматийсса давурттахагу зий.
1990-1993-ку шиннардий увчIуну ур МахIачкъала шагьрулул Депутатътурал советравун.
1994-1998-ку шиннардий Да­гъусттаннал ПаччахIлугърал советрал членну. 2007-2011-ку шиннардий Амучи Амуттинов ур Дагъусттаннал Халкьуннал Мажлисрал депутатну.
2002-ку шинал Ломоносовлул цIанийсса Москавуллал паччахIлугърал университетрал экономикалул факультетрай экономикалул элмурдал доктор хьунсса диссертация дурурччуну дур.
2012-ку шинал ларсун дур профессорнал цIа.
Амучи Амуттинов ур ацIва­хъул монографиярттал ва ххю­цIалунния лирчусса элмийсса публикациярдал автор.
Ванал захIматран лайкьсса кьимат бивщуну бур ХIуку­матрал ва жяматрал.
Амучи Михайловичлул наградарттавух дур ДАССР-нул Верховный Советрал чулухасса ХIурматрал грамота, Халкьуннал дусшиврул орден (Армениянаву, Спитак шагьрулий аьрщи сукку хьусса чIумал хха­ссал буллалисса давуртту сакин дурну тIий), Орден Почета (Репрессиярттахьхьун бирив­сса халкьуннал реабилитациялул хIакъиравусса закон щаллу дурну тIий). Дур Аьрасатнал Пенсионный фондрал ва Госкомстатрал чулухасса медальлу, Дакьаврил фондрал мусил медаль, «За заслуги в сохранении родной земли и сближении народов», «Родину защитили и честь сберегли» медальлу.
Амучи Амуттинов ур Да­гъусттаннал лайкь хьусса строитель, Аьрасатнал лайкь хьусса экономист, «Щит Отечества» ордендалул заллу.

Амучи Михайлович дакI­нин утлатисса ихтилатру бунни Мурад АхIмадовлул, Дагъусттаннал экономикалул министр ХIажи Султановлул, Ккуллал райондалул бакIчи Шамил Рамазановлул, Дагъусттаннал Госсоветраву ивкIсса Имампаша Чергизбиевлул, генерал Муслим Даххаевлул, «Дагестан» ГТРК-лул директорнал хъиривчу Ссалам Хавчаевлул, экономикалул элмурдал доктор, профе­ссор Насрулла Адамовлул, Аьра­сатнал ПаччахIлугърал Думалул IV созыврал депутат Мамма Маммаевлул, Дагъусттаннал халкьуннал чичу Мирза Давыдовлул, Дагъусттаннал Пенсион фондрал хъунаманал хъиривчу Нуруллагь Сулаймановлул, Пенсион фондрал отделениялул профкомрал председатель АьвдурахIман МахIаммадовлул, шяравучу МахIмуд Аьлиловлул, Аьрасатнал ФСБ-лул полковник Растиван Бековлул, профессор, Мах1аммадбаг Х1усайхановлул ва м.ц.
Ихтилатчитал, ца зумату кунма, буслай бия Амучил узданшиврия, инсаншиврия, чувшиврия ва чумартшиврия. КIицI лаглай бия ва щала Дагъусттаннайгу, цала миллатрайгу дакI цIуцIисса хIакьсса патриот ивкIшиву, чув ухьурчагу цува авцIусса кIанттул аргъ дизан дайсса чув-адамина ивкIшиву.
Амучил хIурмат хъунма­сса бия къуллугъчитурал дянивгу, укунмасса инсантурал дянивгу. Ванан кIула ккашилнал лякьагу, мякьнал кьакьаригу. Амучи чIарав авцIусса, кумаграл ка тIиртIусса чIявусса лякъинтIиссар жула халкьуннаву. Ванал дурцири давурттал хIисав-сан дуллалисса чIумал, кIива оьрму бувтсса хханссар.
ДиркIун дур чIун Амучи Амуттиновлул шанма жаваблувсса паччахIлугърал къуллугъ архIал бачин бувсса: Госсоветрал член, ХIукуматрал вице-премьер, Дагъусттаннал экономикалул министр. Ванилгу барашинна дуллалиссар цуксса вихшала диркIссарив ванайн, цуксса хъар лархъун ивкIссарив му тай захIматсса шиннардий.
Ца чулуха, жула миллатран хъунмасса бахтти хьушиврун ккалли бан бучIихьунссар укунсса инсантал жула дянив бикIаву, ца чулухагу, жула алши бакъашиву духьунссар вай ччяни дунияллия лагаву. Циксса ххаллилсса давуртту данссия Амучи Михайловичлул, цахъи оьрму ялагу буллуссания. Ци чулийгу, сагъну унува цала цIа абад дунни ванал.
Амучи Амуттиновлул оьр­мулун цIа кусса луттираву дур паччахIлугърал къуллугъчитурал, дустурал ва даврил уртакьтурал ванаясса дакIнин бичавуртту. Ми цаппарасса жу рищунну кказитрал ялунмайсса номерданийгу, Амучи Михайлович увсса кьинилуцIун дархIуну.
Луттираву бувсун бур ванал нитти-буттая, агьлу-авладрая, оьрмулул ва захIматрал ххуллия, политикийсса ва жяматийсса иширттавусса лайкьшивурттая, хьхьичIуннайшивурттая, дур личIи-личIисса чIумал журналистътурал ванаща ларсун диркIсса интервьюрду.
Лу ххилтIу буллай, яла-ялагу махIаттал хъанай бура, цукун бюхъайссар ца инсаннаву вайкссава гьунарду бикIан тIий.
Цинявппа ихтилатчитурал кIицI лавгунни Амучи Михайловичлул цIа дирзсса кIичIиравалу, идара бикIан аьркиншиву Да­гъусттаннай.
Ихтилатру къуртал хьуну махъ Амучил уссил Артурдул барчаллагь увкунни ва лу дунияллийн буккан захIмат бивхьуминнахь, цинявппагу ва дакIнин утан луттирал презентациялийн бувкIминнахь.
Презентациягу, цува Амучи Михайловичлун лархьхьуну, лайкьну хьунни. Цинявппагу ихтилатру бия дакIнийхтунусса, аьчухсса. ЧIун мадарасса ларгнугу, ппив хьун анавар буклай бакъая.

Андриана Аьбдуллаева