Уттигъанну Махlачкъалалив, Республикалул Вишневскийл цlанийсса азарханалул актовый залдануву, хьунни «Гаджиевские чтения: Кардиоренальный континуум и вопросы кардионефропротекции у коморбидных больных» тlисса щалвагу Аьрасатнал элмийсса ва практикалийнусса конференция.

Ваний гьуртту хьунни кардиологтал, нефрологтал, терапевтътал, эндокринологтал ва аьмсса практикалул хlакинтал. Конференциялий буллалисса докладирттах вичlи дишин бувкlун бия Республикалул клинический азарханалий практикалийсса Дагъусттаннал медициналул университетрал студентътал ва госпитал терапиялул кафедралул зузалт.
Бавтlминнахь ча бувкру тlисса махъ лавхъуна Дагъусттаннал терапевтътурал элмийсса медициналул обществалул председатель, Аьрасатнал Цlуллу-сагъшиву дуруччаврил министерствалул Ухссавнил Ккавкказуллал федерал округрайсса штатрай акъасса хъунама специалист-терапевт, ДГМУ-лул госпитал терапиялул кафедралул профессор Сулайман Маммаевлул.

Цалва ихтилатраву ванал чlурчlав дуруна ва конференция, ваниннин гьарцагу шинал дуллай диркlми кунна, хас дурну душиврий цала учитель, медициналул элмурдал доктор, профессор Хlажиев Хайруттин Апаннинал арснан, цувгу авцlуну ивкlсса Дагъусттаннал терапевтътурал элмийсса общество сакин даврил бакlщаращуцl. Бувсунни региондалий ва общество хьхьичlуннай дан ва цаймигу давуртту дуллай профессорнал бивхьусса хъунмасса захlматрая.
Гихунмай конференциялул лагрулийсса докладру бувна цала Сулайман Маммаевлул, СтГМУ-рал поликлиникалул терапиялул кафедралул каялувчи, медициналул элмурдал доктор Н. Аграновичлул, ДГМУ-лул госпитал терапиялул кафедралул доцентътал Д. Оьмаровал ва З. Аьлиевал.
Хьуна ва шиналсса конференциялул темалийн багьайсса чlявусса ихтилатру ва цlюрувкьусса масъаларттайн багьайсса дискуссияртту.

Бадрижамал Аьлиева