Ноябрьданул 19-нний МахIачкъалалив МФЦ-лул къатраву хьунни «Информационные войны: борьба за умы и влияние» цIанилусса журналистътурансса, пресс- секретарьтурансса ва студентътурансса семинар.
Ва сакин бувну бия «Институт Новых Медиа» АНО-лул Дагъусттаннал Информациялул ва печатьрал агентствалул чIарав бацIаврийну.
Семинарданул программа сакин дурну дия информация цачIун баврин, му хIакьсса бушиву исват баврин агьамшиву дусса чIявусса масъаларттая. Гьурттучитуран ва хьунни уттизаманнул шартIирдай зун лахьхьин буллалисса семинар.
Семинарданул даву дайдихьлай, Дагъусттаннал Информациялул ва печатьрал агентствалул каялувчи Аьбдуразакь Жамалуттиновлул кIицI лавгунни, ва цIанасса ппурттуву агьалиначIан тIайласса информация биян баву мурадрайсса хъуннасса агьамшиву дусса даву хъанахъишиву.
– Информациялулмур дяъвигу аьралий иширтталмунияр ялавайсса къабикIай. Федерал ва региондалул даражалий ппив хьусса, билаятрайн къарщисса, щалва тIайла бакъасса информациялул инсантуравун нигь-ццах дутлан дикIай. Мунияту, ва семинарданул кумаграйну журналистътураща инсантурачIан лавайсса даражалул информация биян буллансса сант ххишала дуллалиссар, – увкунни ванал.
Семинарданий ихтилатру бунни хасъсса аьралий операция байбивхьуния шийнмай, репортажру дуллай, агьалинахь аьралий иширттая бусласисса журналистътурал, МИЦ «Известия» СКФО-райсса корреспондентътурал бюрорал каялувчи Мурад МахIаммадовлул, 1-мур каналданул корреспондент, новостной журналистикалул эксперт ХIусайн ХIусайновлул. ХIакьину вайннал репортажирттайну кIул хъанай бур халкьуннан хасъсса аьралий операциялул иширттая.
– Телевидениялул даража вайми информациялул сайтирдаяр лавайсса бухьурчангу, СМИ-лул буссар цалва аудитория. Чув-бунугу ца иш хьусса чIумал, мунияту мугьлат бакъа балжисса информация бусан аьркинну бикIай. ХIакьину жун багьлай бур жулами дакъассагу, украинналми соцсетирдал ва Telegram-каналлалгу хъирив лавну бикIан. Мунийнугу жун хъунмасса кумаг шай цайминнал пикрирду хIисавравун ласун, ми зузисса куц ххал бигьин, – увкунни ХIусайн ХIусайновлул.
РБК-лул новостирдал программалул редактор, журналист Ксения Бажутинал гьарта-гьарзану бувсунни соцсетирдал ва информациялул кумаграйну СМИ-рду хьхьичIуннай даврия. Ванил мукунма бувсунни Пермский крайрай властьрал органнал пресс-службарду СМИ-рдащал цачIуну зузи баврия.
Журналист-аналитик, Гуманитар институтрал лингвистикалул ва журналистикалул кафедралул хъунама преподаватель Ханжан Кьурбановлул ихтилатраву бувсунни информация сакин баврия ва мунил анализ даврия, аналитикалул макьалартту хIадур даврия.
«Дагестанская правда» кказитрал хъунама редакторнал хъиривчу, медиатехнолог Исрапил Исрапиловлул паччахIлугърал органнал ва Республикалул муниципалитетирттал прессалул къуллугъирттай зузиминнайн лавайсса даражалий соцсетьру ва Telegram-каналлу зузи дара тIисса оьвчаву дунни. Ванал бувсунни вай контентру лавайсса даражалий зузи дансса ххуллу-чараннаягу.
Мобильный съемкартту даврил кьюлтIшивурттая бусласисса ихтилат бунни мобильный видеосъемкарттал эксперт МухIаммад МахIаммадовлул.
Муниципал сайтру хьхьичIуннай даву мурадрайсса маслихIатру бунни УнцIукIуллал райондалул «ЕИС» МБУ-рал каялувчинал хъиривчу Хайрулла ХIайбулаевлул.
Ва семинар хьунни машгьурсса журналистътуращал опыт кIибачIинсса агьамсса ишну. Гьурттучитуран, шикку ларсъсса кIулшивуртту ишла дурну, цала даврил даража гьаз баву бакъассагу, халкьуннал чулухасса вихшала цIакь дансса чаран ххишала хъанахъиссар.
Семинарданул ахирданий спикертурал балжисса жавабру дуллунни журналистътурал суаллахьхьун.
Имара Саидова
