Ноябрьданул 13-15-нний МахIачкъалалив, Дусшиврул къатраву хьунни террорданийн къарщисса республикалул форум. Ва сакин бувну бия Дагъусттаннал Национал политикалул ва диндалул иширттал министерствалул, Дагъусттаннал Террорданийн къарщисса национал комитетрал ва террорданийн къарщисса комиссиялул.
Форумрал даву шанма агьамсса бутIуйх дарчIуну дия: жагьилтуращалсса даву, информациялул политика ва миллатирттал дянивсса арарду. Ванил лагрулий хьунни научно-практическая конференция. Шикку гьуртту хьунни Дагъусттаннал ва Аьрасатнал цайми регионнал Экспертътурал сообществалул вакилтал. Конференциялул мурад бия терроризмалул идеологиялийн къарщину бацIансса ххуллурду лякъаву.
Президиумраву бия Дагъусттаннал национал политикалул ва диндалул иширттал министр Энрик Муслимов, Аьрасатнал Жяматийсса палаталул миллатирттал, диннал дянивсса арардал ва миграциялул масъалартталсса буллалисса комиссиялул председатель Владимир Зорин, «Изолента live» шоулул автор ва ведущий Трофим Татаренков, «Соловьев live» телеканалданул ведущий Сергей Карнаухов, «Инфорус» АО-лул аналитикалул департаментрал директор Александр Есаулов, Дагъусттаннал Информациялул ва печатьрал агентствалул каялувчи Жамалуттин Аьбдуразакьов, Терроризмалущалсса талатаврицIун кабакьу буллалисса фондрал президент ­Рустам Исламов, Москавуллал патриархначIасса исламрал дунияллущал дахIаву дуллалисса Экспертътурал советрал председатель Отец Григорий.
Форумрал гьурттучитуращал видеосвязьрайхчин ихтилат бунни Дагъусттаннал чулухасса ПаччахIлугърал Думалул депутат Султан ХIамзаевлул.

Энрик Муслимов:
Дагъусттаннай буссар личIи-личIисса миллатирттал, диннал ва культурардал халкь. Жул тарихраву миллатирттал дянив питна хьусса кIанттурду бакъассар. Кьини дурксса чIумал жу циняв цачIун шайссару. Дагъусттан АьрасатнацIун цачIуссар. Буттал КIанттул цIанийсса Хъунмасса дяъвилул шиннардий кунма, 25 шинал хьхьичI жула аьрщарайн къачагътал ххявхсса чIумал кунма, хIакьину хасъсса аьралий операция нанисса чIумалгу.

Владимир Зорин:
Жунма кIулну бикIан аьркинссар жула билаятран нигьачIаву дусса радикал ­пикрирдал инсантал ялун личин бан, миннал идеологиялийн къарщисса хIуччарду лякъин.
ДакIний битан аьркинссар экстремизмалийн ва терроризмалийн къарщину бацIансса хъунмур ярагъ миллатирттал цашиву душиву.

Трофим Татаренков:
Так 7-мур классравур ттун ттула миллат бушиву кIул ­хьусса.
Ттул классраву дуклай би­кIайва оьрус, ккавкказ миллатрал оьрчIру, жугьутI. Жу аьмсса лавгмунил цачIун буллай бияв. Жу бияв Буттал КIанттул цIанийсса Хъунмасса дяъвилий ххувшаву ларсъсса совет халкьуннал ца бутIа.
Ларайсса кIулшивурттал, тарбиялул ва культуралул обществалуву жяматран нигьачIаву дусса радикал пикрирду ппив буллалиминнан кIану бакъассар. Миннал тIутIимунийх цучIав къагьантIиссар.

Отец Григорий:
Терроризмалул мурад мудангу цар бивкIсса – нигь рутаву. Му кьяйдалийри цаппара радикалтурал группардан цала политикийсса мурадру бартбигьин ччисса. Вайннал талатаврил ляличIишивугу, тIайламур кьюлтI буллай, хъяврин буллай сукку тIутIаву дур.Терроризмалул идеологтурал хъяврин бихьлай бур цала хъирив наними.
Форумрал лагрулий хьунни мукунма семинарду, ккуркки столлу, дискуссиялул площадкартту. Экспертътурал лавайсса кьимат бивщунни форумрал даврин.

Андриана Аьбдуллаева