Вай гьантрай, политикалул элмурдал доктор, профессор Галина Климантовал ва политикалул элмурдал кандидат Екатерина Лаховал каялувшиндаралу итабавкьунни «Женщины в науке России» тIисса Аьрасатнал элмурдал академиялун 300 шин шаврин хас бувсса лу. Ва луттиравун бувххун бур политикалул элмурдал доктор, Дагъусттаннал паччахIлугърал университетрал профессор, ДР-лул культуралул лайкь хьусса зузала, Региондалул Культуралул профсоюзирттал комитетрал председатель Буттаева Марзижат АхIмадовна.

Пахрулий кIицI лаган, укунсса даражалул луттиравун жула региондалия хьхьичIва-хьхьичI бувххусса хъамитайпа хъанахъиссар Марзижат АхIмадовна. Ванияр цаппара шиннардил хьхьичIгу «Учитель – это призвание» тIисса Аьрасатнал ва Белоруссиянал цIанихсса педагогтуран хас був­сса, профессор Галина Климантовал ва политолог Александр Ольшанскийл каялувшиндаралу итабавкьусса луттиравугу чивчуну буссия Марзижат АхIмадовная.
Марзижат Буттаева хъунна­сса даву дачин дурну бур Республикалул профсоюзирттал органнаву. Ванил буниялагу биял­сса бутIа бивхьуссар профсоюзирттал идарартту хьхьичIунмай баврил, кIулшивуртту дулаврил ва культуралуву хьунадакьлакьисса захIматшивуртту дух даврил, халкьуннал социал ихтиярду дуруччаврил масъаларттал ялув.
ЧIярусса шинну дурссар Марзижат АхIмадовнал халкьуннал социал-захIматрал масъалартту щаллу буллалисса профсоюзирттал идарартту цачIун буллалисса ХIукуматрал шанчулийнмайсса комиссиялуву зий.
ХIакьинусса кьини Марзижат АхIмадовна Дагъусттаннай цалчинсса политик хъамитайпа хъанай бур. Му бакъассагу, Марзижат бур республикалийсса хъаннил масъаларттал хIакъиравусса ахттаршиннарду дуллалиссагу цалчинсса хъамитайпа. Республикалул Хъаннил союзрал вакил хIисаврай, ванил чялишсса гьурттушинна дурссар «О профессиональных союзах Республики Дагестан», «О культуре Республики Дагестан», «О библиотечном деле Республики Дагестан» тIисса республикалул законнал проектру кьамул давривух.

Марзижат Буттаевал чирчуну дур Республикалул культуралун ва хъаннил суккушиндаран хас дур­сса цикссагу монографияртту.
Элмулул ххуллий ва цуппа зузисса къуллугъирттай дакI марцIну зий лайкь дурну дур паччахIлугъралми ва жяматийсса наградартту, бусрав хьуну бур халкьуннал чулухасса барчаллагьрал чагъардан.
КIицI лаганна, Марзижат АхIмадовна лакрал миллат­райгу, лакку мазрал бучIан­тIимунийгу хъуннасса дакI цIу­цIаву дуллалисса, миллатрал гьарца ишираву чIарав бацIлац1исса уздансса инсангу бур.
Марзижат АхIмадовна барча буллай, чIа тIий буру гьарица дуллалисса давриву тIайлабацIуртту, ина жула миллатран муниярвагу бусравну, ххиранува личIаннав!
Шиккува бусан, «Женщины в науке России» тIисса лу бур билаятрал элмийсса иширттаву хьхьичIуннайшивуртту дурсса Аьра­сатнал хъанния-аьлимутурая бусласисса.
Луттирая хъунмасса мюнпат ласун бюхъайссар аьлимтураща, аспирантътураща, студентътураща ва элмийсса иширттахун багьсса студентътуращал ва школардал выпускниктуращал зузисса пишакартуща.
Имара Саидова