Украиннал аьрщарай хасъсса аьралий операция байбивхьуния шийнмай, аьралитуран кумаг буллай, шайсса куццуй миннал чIарав бацIлай бур ДР-лул культуралул лайкь хьусса зузала, Мариям Илиясовал цIанийсса «Дараччи» ихIсандалул клубрал вакил, Т. Мурадовлул цIанийсса Дагъусттаннал паччахIлугърал филармониялул директорнал хъиривмур Кьурбаннул душ София Разуева.

Вай гьантрай, хасъсса аьралий операциялул гьурттучитуран кумаг буллалаврихлу София лайкь хьунни шанна наградалун.
«Великая община» тIисса жяматийсса суккушиндарал президент МахIаммад Мусаевлул Софиян дуллунни «Герою нашего времени» тIисса, аьралитуран чялишну кумаг буллалисса инсантуран дулайсса ХIурматрал грамота ва «За содействие в СВО» тIисса медаль. Вара кьини Софиян дуллунни ялун нанисса никиран патриот ва рувхIанийсса тарбия дулаврил, миллатирттал ва конфессиярттал дянивсса дусшиврул арарду цIакь давриву бивхьусса захIматрахлу ДР-лул Миллатирттал политикалул министерстсвалул чулухасса ХIурматрал грамота.

Шамилчинсса награда, Барчаллагьрал чагъар буллунни Софиян ДР-лул Халкьуннал Мажлисрал чулуха.
Шиккува кIицI лаган, хасъсса аьралий операция байбивхьуния шийнмай Софиял аьралитуран цимилгу тIайла дурккунни медикаментру, рацияртту ва цаймигу аьркинсса кьай-кьуй. Ванил аьралитуран буллалисса кумаг ххаралун буллалисса бакъарча, дакIнийхтунусса бур. Софиян цила дуллалисса давурттая щинчIав кIул хьунугума ччай бакъая.
Хасъсса аьралий операциялул иширттал жунма цимилагу ккаккан бунни аьралитурал махъ къучагъсса ниттихъул, ссурвал бушиву.

Жула халкьуннал дугъришиврул, ка-кумаг бан хIадуршиврул, вайннал дуллалисса чумартсса тIуллал, дакI дуллай дур ва гьавас бутлай бур аьралитуравун. Дунияллийсса оьрмулул дуцин хъинбала-хъиншивурттайнур кIул шайсса. Софиял цила дакIнил гъилишивугу, чанигу цимилгу биян бувссар СВО-лий гьуртту хъанахъисса аьралитурачIан.
Ванил яхI-къириятрая ва чумартсса тIуллая кIул хьуну, ванищал хIала-гьурттуну зий бур Дагъусттаннал республикалийсса «Великая Община» тIисса жяматийсса суккушиндарал вакилтал.
ХIакьинусса кьини хасъсса аьралий операциялуву гьуртту хъанахъисса жула аьралиталгу кIулну бикIийча, Ватандалий вайннах уздансса ниттихъул, ссурвал ялугьлай бушиву.

Имара Саидова