Ларгсса арвахIкьини Дагъусттаннал транспортрал ва ххуллурдал хозяйствалул министр Жамбулат Салавовлул журналистътурахь бувсунни, гьашинусса шинал цуку-цукунсса ххуллурду республикалий буллайгу, бакьин буллайгу буссарив, транспортралмур иш хIисавравун лавсунгу, агьалинан къулайшиндаран цукунсса цIушиннарду, дахханашиннарду дуллайгу, дуван дакIнийгу буссарив.

Ванал журналистътурал суаллахьхьун жавабру дуллунни «Дагъусттан» тIисса республикалул информациялул агентствалул конференциярду дай залдануву. Бувсунни республикалий къулагъас душиву мукьрагу журалул транспортрах: хьхьирийхсса, гьаваллавухсса, муххал ва машинарттал ххуллурдайхсса. Жяматрансса транспортрал къайгъулий, машан лавсун бур уттизаманнул 47 автобус, ГЛОНАСС-рал системардал дузалсса, багьа булунгу карточкарду ишла дувайсса. Укунмасса 61 автобус уттигу машан ласунсса пикри бушивугу бувсунни. Гьаз бунни Каспийскалия МахIачкъалалив агьали ххилаххисса маршрут къулай дансса чаранну ххал бивгьушиву, Каспийскаллал мэр Борис Гонцовлущал архIал. Каспийскаллал агьалинал мукунсса тIалавшинна духьувкун, автобусру Каспийскаллал гьарца махIлалий бацIайсса иш бан икьрал дуршиву, МахIачкъалалийн наними кIива-шанма маршруткалийн къалахълай, ккаккан дурсса остановкалия паракьатну гьаваншиврул. Каспийкалив утти гьарза хьунтIиссар тIайланма МахIачкъалалийн агьали ххилаххисса остановкарду. Министр авцIунни автотранспортрал цаппара предприятиярдайсса дахханашивурттайгу. Масалдаран, Минтрасрал биялалийсса ООО «Каспийское АТП» тIисса предприятие ва АО «МахIачкъалаллал 1736-мур автоколонна» хIала даркьуну, ООО «Дагестанавтотранс» тIисса хIасул дуршиву. Ххуллурдал хIакъиравугу ванал бувсунни аьмну 46, 3 километралул манзилданийсса ххуллурду ва 5 ламу бувшиву, мукунма гьануцIакул бакьин бувшиву 13 ламугу, 397 километра ххуллурдалгу.
«Хасавюртлив къабувххуну агьали ххилансса ххуллул цалчинмур ятIап ккаккан дурсса чIумуяр дирисса бущилийссар, декабрьданул 1-ннийн трассалул 7 километра дурну къуртал дуван аьркинссия, дурссар 9 километра, – увкунни ванал. МахIачкъалалив ва Дарбантлив къабувххуну ххилансса ххуллурду баврил дайдихьу дуршивугу бувсунни. АвцIунни «Нигь дакъасса ххуллурду» тIисса проектрал лагрулий дурцири давурттайгу, кIицI лавгунни 45 километралул манзилданийсса давуртту дуршиву. Шяраваллил кIанттурдайсса ххуллурдахгу дагьайкунсса къулагъас душиврия буслай, кIицI лавгунни, райцентрдайн нанисса ххуллурдахгу, шяраваллил хозяйствалун, промышленностьран ва туризмалун аьркинсса транпорт дузалну душиврул ялувбацIаву хIура къадувайшиву.

ПатIимат Рамазанова