Луганскалий имамну зузисса МухIаммад Ссаламовлущалсса онлайн-интервью

Жу хьхьичIвагу бувсъссия Буршиял шяравасса ХIамзатлул арс МухIаммад Ссаламов Луганскалий Хъун мизитрал имамну зий ушиву. Луганскалий бусса бур кьуния ххюазарунниха ливчусса бусурман агьлу. МухIаммад МахIачкъалалив Хъун мизитрал имамну, Лаккуй Имамтурал советрал хъунаману ва цаймигу давурттай зий уссия.
Кьунниха лирчусса шинну исламрал ххуллий гьан дурсса, каялувчи хIисаврайгу биялсса опыт бусса инсанни. КутIану ванал оьрмулул ххуллия бусан, увну ур Бабаюртуллал райондалийсса Львовск-4 къутандалий. Ва Буршиял къутанни. Дуклай ивкIун ур тиккувасса школалийгу, МахIачкъалаллал 37-мур школалийгу. Аьралий бурж биттур бувну махъ, 26 шинал оьрмулуву, дуклан увххун ур Буйнакскаливсса Сайпуллагь-кьади Башларовлул цIанийсса мадрасалувун. Амма имамну зунсса, Муфтиятращал уртакьну зунсса мурадрай къаувххуссияв, тай аьратталсса шиннардий исламрал литература личIи-личIисса духьувкун, ссаву ци буссарив бувчIин, аьдатрайсса исламрал ххуллу-ххуттай цIакьну ацIан, аькъяйкьин увхссияв тIий ур.
Мадраса къуртал байхту, ва гьан увну ур Къяннал шяравун, ца шинайсса имамшиву дурну дур. 2002-ку шинал ва Лакралмур райондалийн гьан увну ур, Гъумук цал имамнал кумагчину, яла имамну зий ивкIун ур. 2012-ку шинал хIадисирттал элму лахьхьин гьан увну ур Египетнава тIалав увсса хIапизначIан-хIадисоведначIан Зайнул АьбидиннучIан. ТаначIа исламрал кIулшивуртту куртIгу, цIакьгу дуллай унува, зий ивкIссар МахIачкъалаливсса вокзалданийсса мизитрал имамнугу, бувкссар аспирантурагу. Гьаннай­сса, МухIаммад Ссаламов лакрангу, Дагъусттаннал агьалинангу ислам лахьхьин дуваврил ххуллий хъунмасса захIмат бивхьусса инсанни. Вари «Ислам Лаккуй» тIисса машгьурсса порталданул сиптачигу, хIасул дурмагу, порталданул канонический редакторгу. ЦIанакул Луганскаллал агьулданун исламрал дин ла­хьхьин дуллай, бусурман диндалул аьдатру дуван кабакьу буллай, Хъунмур мизитрал имамшиву дуллай уссар.
– МухIаммад, цуксса хIалли вил Луганскалий имамну зий? Цукун агьра ина михун?
– Шин ва шанма барз хьунни. Луганскаллал Республикалул муфти МухIаммад Исмяиллул тавакъю бувссия Дагъусттаннал Муфтиятрахь, на гьан увара куну, нагу ттуятува мюнпат хьувча тIисса мурадрай зун ивкIра цIусса кIанай.
– Исламрал дин дусса агьлу чIявусса бурив Луганскалий, мизитравун дянивну цими инсан учIай ахттайн чаклийн бикIу, укунма вяъзардах вичIи дишин бикIу?
– ЦIакьну исламрал ххуллу-ххуттай бавцIусса агьлу Луганскалий чансса бакъар, мизитравун лагайссар шанттурша инсан ур, нюжмар- кьинирдай щапI куну бувцIуну бикIай.
– Лакгу бакIрайн багьайрив?
– На шикку уссаксса хIаллай, ца арула лаккучунащал хьунаавкьура, мигу я аьралий бурж биттур буллалисса чиваркI бия, ягу даврил иширай ялун биян бувкIсса. Луганскалий зузисса ца лаккучу ур ттун кIулсса, Вихьлиясса Магьди, вагу мудан мизитравунгу учIай, на дуллалисса даврил чIаравгу ацIай. Дагъусттаннаягу ттун хьунаавкьуна Гьухъалия­сса инсан, вагу буслай ия зувилку шиннардий цала ттатта къалайчину зий ивкIшиву, тайра шиннардий кулакшиврий ивхьуну думуницIа увну ивкIшиву. Луганскалий Буттал кIанттул цIанийсса Хъун дяъвилий ливтIуминнал цIарду дусса аьпалул луттирай, ттун бакIрайн дагьунни тикку ливтIусса лакрал цIардугу.
– Цукунсса захIмат­шивуртту дур цIусса кIа­най?
– Аллагьнал кумаграйну вайри учинсса, гьанулун ласунсса захIматшивуртту дакъар.
– КIанттул агьали зух цукун буруглай бур?
– Так хIурматрай. Куннан кув къабувчIавуртту дакъар. Луганскаллал Муфтиятрал шайсса кумаг бувайссар чIумуя чIумуйн ялгъузсса оьрчIал къатран, мюхтажминнан, мушакъатминнан.
– МухIаммад, вин барчаллагь хъунмасса, дуллалисса давриву тIайлабацIу баннав!
– Зунгу барчаллагь. Муфтиятрал ттуйнна вихшала дур­сса даву вихшалдарава къаукканну дувансса хIарачат буллай, Хъунасса Аллагьнал дин, жува аьдат­сса ислам лахьхьин дуллалисса ттуяту, хIалу дагьнура ссалам бусияра Ватандалул агьулданухьгу. Жу ччя-ччяни бияру лагма-ялттусса шагьрурдайсса мизитирттавунгу, буккару лекциярду, вяъзарду, дулару суаллахьхьун жавабру. Бусурман диндалул идарарарттащал уртакьну зий, жулва хьхьичI бавцIусса масъалартту бартбигьлай буссару.

Ихтилат бувссар
ПатIимат Рамазановал