Дагъусттан Республикалул 2015 шинал социал-экономикалул лябуккулул хIасиллу дунни ДР-лул Экономикалул ва территориярттал лябуккулул министерствалул гьартасса коллегиялий. Коллегия бачин бувну ия ДР-лул ХIукуматрал Председательнал хъиривчу – экономикалул министр Раюдин Юсупов. Муналва бунни хъунмур ихтилатгу.

Министрнал мукъурттийн бувну, 2015 шинал промышленностьрал производствалул лябукку хьуну бур 2%, шяраваллил хозяйствалулсса – 5,1%, основной капиталданувунсса инвестициярду гьарза хьуну дур 4,8%, къатри даврил иширттаву – 6,6%, розницалий маша баву – 3,5%. Инсантурал арцул доход­ру лирчIун дур ларгмур шинал даражалий.
Республикалул цачIусса (консолидированный) бюджетравун дуркIун дур налогирттал ва къаналогирттал доходирттал 28 млрд. ва 485 млн. къуруширттал, 2014 шинал дуркIминнул 106%.
Ларгмур шинал хьусса ишир­ттавату ца яла агьаммурну хъанай бур «Социально-экономическое развитие Дагестана на 2015-2025 годы» тIисса подпрограмма кьамул даву, ва хъанахъиссар «Развитие Северно-Кавказского федерального округа до 2025 года» тIисса АьФ-лул ПаччахIлугърал программалул подпрограмма.
ДР-лул Минэкономразвитиялул бакIчинал бувсъсса куццуй, Аьрасатнал Федерациялул исполнительный властьрал органнал давурттал мюнпат бищаврил хIасиллайн бувну, АьФ-лул субъектирдавату Дагъусттаннал бувгьуну бур 17-мур кIану, ганияр хьхьичIмур шинал республика диркIссар 34-мур кIанттай.
«Обеление экономики» тIисса ДР-лул приоритетсса проект дузрайн дуккан даврил хIакъираву тIурча, 2015 шинал дурсса давурттал хIасиллуну хъанахъиссар недвижимостьрал паччахIлугърал кадастрданувун 40 азарда аьрщарал участок ва 31 азарва капитальный строительствалул объект ласаву.
2015 шинал инсантурал хъуслия дучIайсса налог, хьхьичIмур шинах бурувгун, гьарза хьуссар 11,6 процентрал.
ДР-лул УФНС-рал (Налогирттал къуллугъ) ккаккияр­ттайн бувну, 2015 шинал 17 азаллий 795 ишбажаранчишиврул субъектирдал давурттал хъиривлаявуртту дурссар, миннувату 5 азаллий 975 ишбажаранчишиврул субъект сияхIрайн къалавсун бивкIун бур, миннуватугу 3 азаллий 156 субъект учетрай бацIан бувну бур.
2016 шинал январьданул 1-нний республикалий ашкара увну ур документирттайну сияхIрайн къалавсун зузисса 39 азаллий 100 инсан, миннавату 20 азаллий 633 инсаннащал чирчуну диркIун дур захIматрал кьутIирду (трудовые договоры).
Ларгсса шинал «Юг России» тIисса Федерал программа дузрайн дуккан даврил хахливу республикалий бувну бур 16 объект: 4 объект цIуллушиву дуру­ччаврил, 9 объект дуккаврил, 3 объект инженершиврул инфраструктуралул. Миннуяр ххишалагу, бувну бур 1 артскважина ва сайки 25 километра газрал сетирдал.
Ларгсса шинал ДР-лул Минэкономразвитиялул тамансса давуртту дурну дур Дарбант шагьрулун 2000 шин шаврил шадлугъирттан хаснугу: Дарбантлив бакьин бувну бур 14 куча ва 4 парк, шагьрулул 15-мур школалул цаппара кIанттурду, зузи бувну бур Кырхляр станциялий щинал насосрал станция.
Ларгсса шинал тамансса давуртту дурссар Каспийск, Дагестанские Огни шагьрурдай.
Коллегиялий ихтилатру бунни мукунма «Концерн КЭМЗ» ОАО-рал гендиректор Ибрагьим АхIматовлул, ДГУНХ-рал президент ХIамид Бучаевлул ва цайминналгу.