Вай гьантрай ДР-лийсса Роспотребнадзорданул управлениялий хьунни 2015 шинал давурттал хIасиллу ххалдигьлагьисса гьартасса коллегия.
Коллегиялий ихтилат бунни Управлениялул хъунмур, ДР-лул Хъунма-хъунмур паччахIлугърал санитариялул хIакин Элеонора Оьмариевал. Ганил мукъурттийн бувну, дурсса давурттайну бювхъуну бур щаллу дуван Управлениялул ДР-лул ХIукуматращалсса мюнпатсса хIала-гьурттушиву, мукунна дахIавуртту щаллу дурну дур министерстварттащал ва ведомстварттащал. ХIала-гьурттуну зузаврил хIакъираву чирчуну дур 15 Соглашение, мунил хахливу дурну дур совещанияртту, семинарду ва хьунабакьавуртту.
Коллегиялий ляличIисса къулагъас дунни лахъай азардал профилактикалух, дукиялул качествалух ва мюхчаншиврух, хIачIайсса щинал качествалух, оьрчIал ва зузисса инсантурал цIуллушиву дуруччаврил масъаларттах, муштаринал ихтиярду дуруччаврил масъаларттах.
2015 шинал Управлениялул пишакартурал дурну дур 1714 пландалийнусса хъиривлаявуртту, ашкара дурну дур 8671 диялдакъашиву.
2015 шинал дирхьуну дур 30 млн. 115 азарда къурушрансса аькIри, хьхьичIмур шиналнияр 18 процентрал гьарзану. Аьмну лавсун, 2015 шинал лахъайсса ва паразитарный азардал эпидемиологически тагьар оьккисса къархьуну дур. ЛяличIину нигьачIаву дусса инфекциялул азарду дазул кьатIату дучIаврил хьхьичIалу кьуркьуну дур. Ва ялагу, сияхIрайн ларсун дакъар лякьлул, цIаллил азар, полиомиелит, псевдотуберкулез, дифтерия, малярия, сибирская язва ва цаймигу азарду.
Цаппара цайми азарду, миннувух салмонеллез, острый вирусный гепатит А, ОРВИ, грипп, пневмония, гьарза хьуну дур.
Республикалий санитарно-эпидемиологиялул тагьар ккаккан дуллалисса гьануми ккаккияртту 2015 шинал цалий дарцIуну дур ва ххуйгума хьуну дур. Школалий дуклаки оьрчIру гъилисса дукралул щаллу буллан бивкIунни 99,3 процентрал. Лечебно-оздоровительный комплексирдай оьрчIал цIуллушиву цIакь даврил мюнпат лахъ хьуну бур 96 процентрайн биянцIа.
2015 шинал Управлениялийн бувкIун бур 1198 аьрза, ми хъанай бур 2014 шиналнияр 13 процентрал ххишаласса. Миннува чIалай бур агьали рязи бакъа бушиву ЖКХ-лул хIаллихшинная, шагьрурдаву ва шяраваллаву марцIшиву дуручлай бакъашиврия.
