Ноябрьданул 12-нний МахIачкъалалив «Аьрасат – ттул тарихри» тIисса музейраву шадлугърал даражалий кIицI ларгунни Дагъусттаннал региондалийсса Аьрасатнал Журналистътурал союзрал 65 шинал юбилей.

Журналистътал барча бан бувкIун бия Дагъусттаннал Информациялул ва печатьрал агентствалул каялувчи Аьбдуразакь Жамалуттинов, Дагъусттаннал региондалийсса Журналистътурал союзрал председатель МахIаммад Ибрагьимов, Аьрасатнал Журналистътурал союзрал секретариатрал бакIчи Денис Токарский, МахIачкъала шагьрулул администрациялул бакIчинал хъиривчу Мавлидин Маликов, ДР-лул Халкьуннал Мажлисрал депутат Шамил Оьмаров, ДР-лийсса Росреестрданул управлениялул каялувчи Арсен ПирмахIаммадов, Дагъусттаннал цифралул лябуккулул министр Юрий ХIамзатов.

МахIаммад Ибрагьимовлул гьарта-гьарзану бувсунни региондалийсса отделениялул дуллалисса давурттая, иширайну зузи дурсса проектирдая ва хIакьинусса кьини хьхьичI бивхьусса масъаларттая.

Ванал мукунма кIицI лавгунни, Журналистътурал къатрал хьхьичIсса скверданун «Аллея журналистов» тIисса цIа дизан­сса ихтияр дулара тIисса сипталущал шагьрулул администрациялийн бувкшиву.

– Умуд бур шагьрулул администрациялул бакIчи Юсуп Умавовлул жул сипталуцIунгу авкьуну, аллея тIитIинсса кабакьу банссар тIисса, – увкунни МахIаммад Ибрагьимовлул.
Шадлугърал мажлисрай хьхьи­­чIунну зузисса журналистъ­туран дуллунни личIи-личIисса наградартту.
Дагъусттаннал Информациялул ва печатьрал агентствалул чулухасса ХIурматрал грамоталун лайкь хьунни «Голос степи» кказитрал хъунмур редактор Эльмира Кожаева, «Дагъусттаннал лайкь хьусса журналист» тIисса бусравсса цIа дуллунни «Нур» кказитрал хъунама редактор Байрам Аьбдуллаевлун, «Дагестан» журналданул хъунама редактор Марат ХIажиевлун дуллунни «ДР-лул культуралул лайкь хьусса зузала» тIисса бусравсса цIа.

Дагъусттаннал машгьурсса журналист Алик АьбдулхIамидов лайкь хьунни «За храбрость» тIисса медальданун, «Честь. Достоинство. Профессионализм» тIисса медальлу дуллунни «Дагестан» РГВК-лул гендиректор Камила ХIамзатован ва «Ватан» радиолул хъунама редактор Жалал ХIусайновлун. «Дагестан» Этномедиахолдинграл каялувчи Арсен Юсупов лайкь хьунни «За заслуги» тIисса медальданун, «За поддержку прессы» тIисса медальданун лайкь хьунни Дагъусттаннал региондалийсса отделениялул Журналистътурал союзрал ревизиялул комиссиялул председатель Мурад МахIаммадкаримов.

«Дагестанская правда» кказитрал корреспондент Эмма Тышенко лайкь хьунни «Ветеран журналистики» тIисса медальданун.
Аьрасатнал Журналистътурал союзрал чулухасса дипломран лайкь хьунни «Илчи» кказитрал корректор Аминат АхIмадова.
Бахшишру дуллунни мукунна Да­гъусттаннал халкьуннал шаэр Сулайман Стальскийл 155 шинал юбилейран хас дурну, ларсун диркIсса документал кинордал автортуран.
Шиккува бусан, ва конкурсрал сакиншинначитал ва сиптачитал хъанахъиссар Дагъусттаннал региондалийсса Аьрасатнал Журналистътурал союзрал отделение.
1-мур даражалул диплом ва 50 азарда къуруш дуллунни «Замана» кказитрал корреспондент Эльза Чубанован, 2-мур даражалул диплом ва 30 азарда къуруш дуллунни «Поэт из народа – закаленный как сталь» тIисса кинорал автортуран, 3-мур даражалул диплом ва 20 азарда къуруш дуллунни Сулайман Стальский райондалул муниципал телевидениялул хъунмур редактор Эльвира Набиеван.

Юрий ХIамзатовлул цала министерствалул чулухасса Барчаллагьрал чагъарду булунни 2024-ку шинал Дунияллул халкьуннал дянивсса Цифралул 2-мур форумран информациялул чулухасса чIарав бацIавуртту дурсса республикалул телеканаллал ва кказит-журналлал редакциярттан.
Ихтилатру къуртал хьуну, наградартту дуллуну махъ, ххаллил­сса концертрал программа кка­ккан дунни Б. Мурадовал цIанийсса Дагъусттаннал культуралул ва искусствалул колледжрал хореографиялул ансамбльданул коллективрал, Дагъусттаннал паччахIлугърал филармониялул солистътурал Аьбдул Мурадовлул ва Тахмина Мирайлул. «Путь к успеху» тIисса оьрчIансса психологиялул кумаг баврил центрданул тарбиялувтурал ккаккан бунни Сулайман Стальскийн хас бувсса «Один – лишь капля, все мы – океан» тIисса сценка.

Имара Саидова

P.S. ДакIнийхтуну барча буллай буру Аьрасатнал Журналистътурал союзрал лахъсса наградалун лайкь хьусса Аминат АхIмадова. Вил давриву пахру буллансса хьхьичIуннайшивуртту, оьрмулуву тIайлабацIуртту чан къахьуннав.