Тамансса хIал хьуссия жул Бабаюртуллал райондалийсса лакрал къутаннайсса школардайн биян ччай. Ахиргу сант дагьну, цалчинсса ва тIайлабацIусса аьрххи хьунни жул Сангардал школалийн. ХIакьину районнал школардай дуклакисса оьрчIру шиная шинайн чан хъанай, классру лакьлан багьлагьисса чIумал, Сангардал школалий 11-вагу класс яхьуну бушиврия жу ххари хьуру.

ШколучIан гъан шайхтура итта­лун дагьлай дия гьарта-гьарзасса лазиларкьусса хIаят. Шиккува бия лагма-ялттусса къутанная бучIайсса оьрчIру яхьунсса ххуйсса шартIру дусса интернатгу. Школул хьхьичI дия учительтуралгу, жяматралгу харжирацIух дурсса Буттал КIанттул цIанийсса Хъунмасса дяъвилий ливтIуминнал аьпа абад буллалисса гьайкал. Яла-яла тIааьан бизлай бия чIявусса лакрал школардай кунма, шикку ­оьрус мазрайсса гъалгъа баллай бакъашиву. ОьрчIалгу, учительтуралгу ихтилат так лакку мазрайсса бия.
ХIакьину Сангардал школалий дуклай ур 81 оьрчI, зий ур 14 учитель.

Дуклаки оьрчIал райондалул ва республикалул конкурсирттай, олимпиадарттай гьуртту хьуну хьхьичIунсса кIанттурду бугьайсса бур. Вайннал лайкь був­сса дипломру ва грамотартту лархъун дия ккаккиялун жанахIраву. Шикку зузисса учительталгу лавайсса даражалул пишакартал бур. Чансса бувккун бакъар Сангардал школалия учительтуралгу, школалулгу цIа гьаз дансса инсантал. Ва школалул выпускниктал хъанахъиссар Да­гъусттаннал халкьуннал чичу, Дагъусттаннал луттирду итабакьай басмаханалул хъунама, чIярусса шиннардий «ЦIубарз» журналданул редакторшиву дуллалисса Илияслул арс Хизри Илиясов, Дагъусттаннал панкратиондалул цачIун дур командалул хъунама тренер, Дагъусттаннал дзюдорал вице-президент, МахIачкъала шагьрулул 49-мур школалул директорну зузисса МахIаммадлул арс Аьбдулкарим Айгунов.

Кьунияхъайсса шиннардий школалий каялувшиву дуллай бур ххаллилсса педагог АхIмадова Магьинур Муртазааьлил душ.
– Жул директор цила даву ххирасса, коллективрай дакI цIуцIисса, дуклаки оьрчIах ччаву дусса инсан бур. Ванил каялувшиннаралу школалул даража гьаз хьунни. КIулсса куццуй, цIана кIулшивуртту дулаврил сфералуву чIярусса тIа­лавшиннарду дур, ттизаманнул технологиярттайн бувну зун багьлай бур. Му чулуха жун тIайлабацIу хьунни заманалуха лавхьхьуну зузисса каялувчи ушиврийну. Жул школа ттизаманнул шартIру дусса, учительтал хIарачат бусса, ххуйсса кIулшивуртту дусса буну тIий, лагмасса къутаннаясса оьрчIругу жучIан букIлай бур. Миннансса интернатгу аьркинсса шартIру дузал дурсса буссар.

ЕГЭ-рду дуллай байбивхьуния шийнмай, жучIа экзамен дулун къавхьусса оьрчIру къавхьуссар, – буслай бур учительтал.
Сангардал школалий чIярусса шиннардий лакку мазрал дарсру дихьлай бур ПатIимат Айгунова. Ванил хъунмасса захIмат буллай бур дуклаки оьрчIаву мазрахссагу, миллатрахссагу ччаву дишин. ХIурмат-кьиматрай бур ва учительтурал коллективравугу, оьрчIачIа ва миннал нитти-буттачIагу. ОьрчIан кIулшивуртту дулаврил цIаний бивхьусса захIматрахлу ПатIимат МахIаммадовна лайкь хьуну бур хIукуматрал чулухасса личIи-личIисса наградарттан. Ванин яла бусравмур наградарив дур дуклаки оьрчIал чулухасса ччаву.

Ватан ххирану, буттал улклул тарих кIулну оьрчIру тарбия баву мурадрай хъуннасса даву дуллай бур школалул завуч Ххадижат Борисовна. Цила дарсругу дихьлай, ва дачин дурну бур школалий краеведениялул кружокгу. Ванил каялувшиндаралу ахттаршиннардал проектирдал фестивальлай ва личIи-личIисса конкурсирттай гьуртту хьуну, Санградал школалул дуклаки оьрчIал бувгьуну бур хьхьичIунсса кIанттурду.
ХIурматрай дакIнин бичлай бия учительтал цала школалий зий хъунмасса захIмат бивхьу­сса хIакьсса педагогтал: Ризауттин Айгунов, Кирамуттин ва Сакинат Аьбдуллаевхъул. Школалул тарихрая ва шикку зузисса учительтурая гьарта-гьарзану чичинсса пикрилий буссару.
Сангардал школалийсса хьунабакьаву тIааьнсса, дакIний личIансса хьунни. Умуд бур ччя­сса чIумул мутталий лакрал ваймигу къутаннайн биян бюхъанссар тIисса.

Андриана Аьбдуллаева
Имара Саидова