Вай гьантрай «Илчилул» редакциялий хъамалу уссия ­хIа­­кин-хирург, тарихчи, жяматийсса ишккакку Аьлиев Исмяил Аьбдуллул арс. Ва ур ччянива чIявучил итталун агьсса жагьил, цувагу хIакин хIисаврайнияргу, тарихчи хIисаврай, соцсетирдавусса ванал ­тарихрайн багьайсса чичрурдайну.

Увну ур Исмяил ТIулизмав, шикку къуртал бувну бур байбихьулул школагу. Ва буслай ур ШавкIрату бучIайва шагьрулиясса жагьилсса учительница, дуккаврил цIакьсса гьанугу кIикку бивзссар, чIивисса школа бивкIхьурчагу тIий.

Яла 5-мур классрая айивхьуну, 9-мур класс къуртал баннин занай ивкIун ур ШавкIрав. Гиччава цала хIучча бусса ивкIун ур, гьуртту шайсса ивкIун ур слетирттай, олимпиадарттай, 10-11-ми классирттавун занай ивкIун ур Гъумучиял школалийн.

– Гьаркьини 6 километра гихуннайгу, шихуннайгу ритан багьайва. ХIакьинугу хIайпну чIалан дикIай, спортзалданувун гьансса, дарсирдах ххишала ургансса чIун ххуллийх лагайва. Яла махъ интернат бувна Гъумук, кIикку оьрчIаву гьунарду итххяххавринсса шартIру ххишала­сса дия. Кьянатсса бухьурчагу, шяраву ларгсса оьрчIшиву дакIний личIансса дия, оьрму хIазсса бия. Кьянатшиврул сасан аврилла на гихунмайсса оьрмулуву хьунабавкьусса къуркъабацIурдал лахIан ан къаивтссагу. КIинттул чIумал микI-чIикIирайх ца километралийхсса ххуллийх гьан багьайва щинав, диял хьунуксса салкьи даншиврул кьинибархан ххилан багьайва. Нитти-буттан ятти-гъаттарах уруган, хъунил давурттан кумаг бангу аьркинну бикIайва. ХIакьину шяравусса оьрмулул шагьрулиймунияр хъуннасса тапаватшиву дакъар, соцсетирдал ясир бувсса бур.
Нитти-буттачIа дуккаврил кьадру хъунмасса бия, цалагу ларайсса кIулшиву дуссар. ХьхьичI Хьурттал совхозрай зий бивкIун бия кIиягу бухгалтерталну. Яла шяраву диялсса хозяйство, ризкьи-кьини дия, миннуха зий бия. Ппу ШавкIуллал шяраваллил бакIчину зий икIайссия тамансса шиннардий.

Пиша язи бугьаврил ялув тIурча, оьрчIахь ци пиша язи бугьанна, тIисса суал щала тIайлану чIалан къабикIай. ОьрчIан ци бувчIайссар пишалия, ттунгу къакIула. Ниттилли, ина хIакин хьун аьркинссара тIий, хIакин хьунсса пикри чIивинияцIава ттул няравун бавкьусса.

Аьралий хIакин хьунсса пикрилий Самаралийн лавгссияв школа къуртал байхту, 2004-ку шинал. Тикку Аьралий медициналул институтравун ухханшиврул, багьлай бивкIун бия граждан медицина лахьхьин. Тиха зана хьуннин, шийхгу уххан чIал хьуну на увхссияв Москавуллал тIивтIусса университетрал юридический факультетрайн, заочнайну. Мединститутравун уххайхту, кьабитан багьуна, амма кIикку ларсъсса кIулшивурттугу дучIи ляркъунни оьрмулуву. Ххуйну дуклай уссияв. ТIайламур бусан, ттун медициналуяр тарихрал дарсру хьхьичIунну дикIайва, дакI мунихух ларгун дия: дунияллул тарих, паччахIлугърал ихтиярдал тарих, вайннухмур гъира ялтту буклай бикIайва. Тикку на кIул хьунав ца хъинну за кIулсса профессорнащал, цувагу колорит дусса, зунттачунал журат дусса ия, Хъювхъатусса МахIач МахIаммадоваяр ихтилат.

Ттул политикалухсса ябитаву дикIайва, гужсса патриотгу ияв. МахIачлул паччахIтурал тарихрая бусласийни, ттун тай цайми инсанталну тIивтIунав, жува луттирдай лавхьхьуминнаяр хъинну личIисса. МахIач АхIмадовичлущал гъанну кIул хьувкун, ганал пикрирду ттуламиннун маччасса лявкъуна.
Шанма курс къуртал байхту, на Мединститутравун увхссияв, лечебный факультетрайн.

Тай дия 90-ку шиннардива був­ккун 2000-ку шиннардивун бухлахисса жула билаятран захIматсса шинну. Шагьрулий яхьунсса къатта бусса, машина бусса студент – му нажагьсса ишъя. Нитти-буттал дуллу­сса арцу, зуруя зуруйн диял даншиврул, кIункIу дуллан багьайва.
ХIакьину жула агьалинал ахIвал хъинну хьхьичIунмай хьунни, тани машина бусса студент нажагьсса акъа къаивкIхьурча, хIакьину жагьилсса хъамитайпагума нажагьсса бакъа хьунабакьлай бакъар машина бакъасса. Кредитру дур, личIи-личIисса выплатарду, субсидияртту бур, вина ччисса давриха зунсса каширду дур.
Дуккаврия оьнасса чIумал спортзалданувун занан ивкIра. Гикку хьунабакьлакьисса жагьилтал чIявуми диндалувусса бия, жува лак тIурча, диндалия ятну бияв. Дакъанан дулара тIий, чIярусса арцурду ихIсандалул фондирттавун дичлалисса инсантал бакIрайн багьувкун, махIаттал хъанай икIайссияв, яла навагу гьуртту хъанай айивхьуссияв ми давурттавух.

Ттун нава шагьрулийсса оьрчIаяр махъун агьлай чIалай, дусса арцух луттирду машан лавсун, ккалай айивхьуссияв. Ттула гъалгъалул ялув зий айивхьуссияв. Мяйжаннугу кумаг хьуна. ХIаллицIух Кьуръангу ккалай айивхьуссияв. Диндалувусса жагьилтал мяйжаннугу эбрат ласунсса бикIайва, къалиян учайсса жагьил къаикIайва. Яла цакуну, ца мугьали бувксса кунма, идеология даххана хьуна. Ахир дакъасса КТО-рду, щак бусса жагьилтал сияхIрайн ласлай, аварасса, нитти-буттан цала оьрчIал ялув дард-буруккин бусса чIун дия. Мяйжаннугу, жагьилтал къалпсса, жунна ятсса идеологиялул ясир буллай бия.

Гьарца инсаннал кьадар бур цаманан дарсну хьунсса. Ганал оьрмулуву бур тIайлабацIугу, му тIайлабацIулийн ияннин­сса ххуллийх хьунабакьлакьисса къуркъабацIурттугу, байча щавурттугу. Къачансса хьуссар ми ттул оьр­мулувугу. Агьссара милицанайнгу, ивкIссара эшкьилул ххуттава уккан увнугу. Бюхъай на лапра ттула дакI аьч дуллай икIангу, амма цайми жагьилтуран насихIатну хьувча тIисса мурадрай, бува бусаннача ми лахIзардаягу.
Луттирдугу чIявусса ккалай, ттула ялув нава зий, на цимигу шаттирал хьхьичIунай хьунав ттущала архIал дуклакиминнаяр. Муна муний эшкьи хьуну, ттуву дуккаврих­ссагу, даврихссагу гъира левщуна. Гьарзат ду-дунийра дарцIуна. Жу цаннан ца къакьисматну лявкъуна. Амма асардалгу лахIан айсса ивкIун ия инсан, кIулну бикIан багьлай бур асардаяр ххув хьун.

Милицанайн агьсса куц. Ца инсан ттул буттан арцу буржну уссия. Къадуллай тамансса шинну най духьувкун, ттулгу ссавур кIюла дуклай дия. Ахиргу ттуща ка итадакьин бувккуна. Ганай цIунцIия хьуну дия, му иш сававну иялсса милицанал кIункIу-хъит увссара, жиплийхгу рищаву хьуна. Мунияту инсаннал хасиятраву яла аьркинмур дур ссавур, вила кIунттил инава угьан кIулшиву.
Бусанна ттула пикри бакъашиврийну байча щусса ца цамургу ишираятугу.
Гьарца студентнал буссар машина ласунсса хиял. Ттулгу бия. Дуклай унува зугу-зий, ласав машина. Ца хъатIуй уссихьхьун буллуну, ганалгу щун бувну, машиналуцIа хьура. Машина бакъа къаикIан щяивкIун автобусрай, лавргра усси­щал Москавлийн. Ласлай айишара машина, хIарамзадатурайн бакIрайн агьара. Ахиргу, азурда шаврил, ца азирбижаннаща Мерседес ласлай айивхьура. Ганил моторданий дур ца чIирисса ккутI. Вания цичIав бакъассар куну, вихшала дишин бувну, ласарду жу га машина, гагу гайминнаярва ялттусса хIарамзада лявкъун, ци къабикIави цичIав, ххуллийх кIунтIа тIий, нагь духлаглай, гьарца бавцIусса кIанттай жугу ччи-ччикунсса нагь рутIлай, мотор бавцIун лавгунни. Жувагу кьурукIинттул ливчIунну ца тайгалий. Ахиргу ца автовоз хьунабавкьуну, машинагу ганий бивхьуну, жувагу ганийн лавхъун тIивтIусса машиналий дякъил литIавайгу ливчIун, цукуннугу бивру.

Мукунсса хIарамзадатураягу урувччуну икIан багьлай бур, архIал хIал кIулсса, вихшаласса инсан акъа мукунсса иширттавух вийнува инава хIала уххавангу къабивкIун бур. Университет къуртал байхту лавгра Москавлийн. Москав ххирая, хъун шагьру бур да. ЧувчIав дакъасса къулайшиннарду дур. Тихун учIавривуна ттун Москавлия дакI дяркъуна. Тай шиннардий Москавливгу, Аьрасатнал цайми шагьрурдайгу Дагъусттанная бувкIминнахсса ябитаву цукун­сса диркIссарив жунна къакIулну дакъар. Къатта бугьан хьуннав, даврийн уххан хьуннав жапасса иш бия. Дагъусттаннал постпредствалийсса Астемир Икрамовичлулгу, Арсен Буйдалаевичлулгу кумаграйхчин увхра Москавуллал 1-мур шагьрулул азарханалийн. Тикку ттухьхьун ттула пишалий зунсса даву къадуллуну, аьдада чагъарду кьамул байсса даву дуллуна. ЧIалай бия ттула пишакаршиву ларай дансса сант ттучIара дакъашиву, ялунссаннун общежитиягу буллай бакъая. Уссугу армиялия учIан най уну, на зана хьура махъунай, Дагъусттаннайн. Увхра МахIачкъала шагьрулул 2-мур азарханалийн. Микку ттун хIисав хъанан диркIуна Москавуллащалсса тапаватшиву. Тийх инсантал социалныйну итххявхсса бия. 2-мур азарханалий жула лаккучу ХIусайн Камалович ХIусайнов, хъинну ителлигентныйссагу, цала пишагу кIулсса хIакин уну, ваначIан лавгра. Ххуй­сса практика хьуна. Туну, га бия циняв къашайшалт нанисса «Анавар­сса кумаграл» азархана.

Амма гиккугу на лахъи къалавгра, зана хьура Москавлийнай.
Зун увхра Москавуллал 1-мур шагьрулул азарханалул 22-мур поликлиникалий, Пироговлул цIанийсса 2-мур медуниверситетрал жяматрал цIуллу-сагъшиврул кафедралий дарсругу дихьлай. Общежитие буллай бакъая, лаякъаттагу буллай бакъая. Махъунай зана хьунна тIисса пикрилий унува, буттал цала гьалмахчуначIан, ШавкIратусса ХIажиначIан оьвкунни, та иш бавчусса инсан ия. Танал дачалий ялапар хъанай уссияв. Яхьун дахIалай чинсса кIану бия, ттарлил вацIа чIарав бия, эмаратсса къатри, хIаят дия, магьлувун бакIрайн агьсса хханссия, амма даврийнсса ххуллу лахъисса бия, метроравугу таман­сса станцияртту битан багьлай бия, гива уккайхтугу ца автобусрая цамунийн лахъан багьлай бия. Му чIумал ттун тукунсса шатIру чIалай дакъая, давричIан гъанну ца уттуишинсса кIану хьурдай, тIий уссияв. Ахиргу, директорнайн увккун, ганая яла къалагавай общежитие тIалав бувну, гиккун ивзра. ДавричIан гъанну рахIатшивугу, къулайшивугу диякьай, гьай-гьай, ххуллийх гьан дансса чIунгу, постпредствалийн занай, тиккусса жула лакращал, дагъусттанлувтуращал щяикIлай-излай, тайннал давурттавух хIала ухлай, хIаллицIух жяматийсса иширттавухгу гьуртту хъанай айивхьура. Харж оьккисса бакъая, оьрму кьаралданийн багьлан байбивхьуна. Ялапаршиндарансса къулайшиннарду духьурчагу, хъуншагьру ттул дакIнил ласлай бакъая. Му чIумал жул кулпатравугу оьзру хьуна, ттул чIавама уссу хьхьирил оьвкьуну ивкIуна. Нину цийнна цурда дукIлай дакъая. Ттун гьарзат кьариртун Гъумукун учIан багьуна. АьбдурахIин Дибировгу Москавлия увкIун, райондалий хъунама хIакинну зий ия. Амма махIасара хьуну ливчIун ивкIра, райондалул азарханалий зун кьамул ара тIисса аьрза цIуллу-сагъшиву дуруччаврил министрнал цIаний бия чичин багьлай. Москавлив отдел кадровлийн лавгун, щаллу хъанай бивкIсса чIумал бигьанма укунсса суаллу, зунсса кIанттурдугу ччиссаксса бия», – тIий ур Исмяил.

КIикку зузисса чIумалгу жяматийсса давурттавухгу чялишсса гьурттушинна дуллай икIайва Исмяил. Цалчинсса «Лакку улклул кубок» дансса сиптачигу хьуну ур Исмяил. Гьашину Исмяиллул сипталий ва сакиншиндарай хьуссар Дагъусттаннал волейболданул командалул хъунаману ивкIсса Нуруллагь Оьмаровлул юбилейран хас дурсса Волейболданул турнир.

ХIакьину Исмяил зий ур «Целитель» поликлиникалий хирургну. Ларгсса шинал уссия хIажлийсса хIакинтурал группалуву.
«ХIакиншиву ттул пиша бухьурчагу, дакIнивусса гьавасгу, ччавугу тарихрахсса ххишаласса дур. Да­гъусттаннал, хаснува лакрал, мивугу Сурхай-ханнал заманнайсса тарих мяйжаннугу авадансса бур. Ттул гихуннайсса ниятругу тарихраха зун­сса дур», – тIий ур Исмяил.
Ванащал редакциялийсса ихтилат 2 ссятрай лахъи гьарчагу, гихунмайгу ссятурдий вичIидиширчагу, къабизар хьунссияв. Ва ур политикалиягу за бувчIусса, мазрал ялувгу цала пикри бусса жагьил.
Жугу дуаьрдай буру Исмяиллул ниятру дузрайн дукканнав тIий!

Чивчуссар
Зулайхат Тахакьаевал