* * *

Ца мискинсса хъус уксса
Арцул ххаржан гьалмагъай,
Ца пакьирнал кьамуксса
Къалмухърал кьяпа лачин.

* * *

Даим ахттукьун чIумал
Вил бава жуннийн дучIай,
Жул оьрчIах хьусса эшкьи,
АьтIий, экьидутIа тIий.

* * *

Бабай, эшкьи кIуривав?
Аьрдакьи кьянкьаривав?
Нания эшкьи кIуну,
ДухIан къашавай бура.

* * *

Вил мурадирал хьхьуну
Ссаврунная чIу хьуннав,
Ссавнил паранну дагьну,
Паммалул шану ччуччин!

* * *

КIюрххил чаклийн нанийни,
Хьу ккуллардал буцIиннав,
Чаклияту нанийни,
Кьяпа нярал буцIиннав!

* * *

Аьрххилий нех дукканнав,
Вил бакI неххал ласуннав,
Ххуллийн мурлу лекьаннав,
Вил оьручу бивчIаннав!

* * *

Оьручал ччармузаву
Оьттул бярду бацIаннав,
На дакIнийну дурцу щар
Щахъанниву дацIаннав!

* * *

Лаххи варанттул чухъа,
Вил му хъинну тIатIивуй,
Биша къалмухърал кьяпа,
Мюрай нуцлул букивуй!

* * *

Вил чIу чIутIул хьуннав,
Чу мурчал хьуннав,
Ссавнил парандарал
Вихьсса тур хьуннав.

* * *

Хъинсса виричура тIий,
ХьхьичIунгу мауккара,
НякI чIутIул ккуллалуву
Инсап къадикIайссарча.

* * *

Агьшиву бакIрайн ларсун,
Махъунайгу машара,
Чувнан чивчусса кьадар
Лиххан бан къашайссарча.

* * *

Аьралуннал дучраву
Вил чу хьхьичIун буккарча,
БакIрай мукьцIалва хIаллу
Мурхьхьардин тIайла банна.

* * *

Аьрай аьралуннаву
Вил ккулла аьщуйн щурча,
Зумув зувира ккарччи
Вин ккуллардан дулунна.

* * *

Никъа мусил къавтIалай,
Мусил мархь кIутIутIалай,
ЦIараяр кIири арив
ЦIа дурксса багьадурай!

* * *

Мискин чувгу чумартри,
Хъусрагу дакъанугу,
Давлатлувгу кьадарди,
Хъуслил къатри бунугу.

* * *

Вил дакъасса чувшиву
На ча машан ласуви?
Вил варсул дурсса дакIний
Чаннан цукун дишиви?

* * *

Ссав дурцIуну цIуртти бур,
ЧаннацIуку бакъари,
Ар дурцIуну уртту дур,
Урттуй тIутIи дакъари.

* * *

Ца умуд бур дунъяллий
Дигьалагру дулайсса,
Хъус дума ва дакъама
Гьаттал личIи къабайсса.

* * *

Бюрунттул дарвачрахун
Пикрирдал гьиву дуртун,
Хьунаавкьунахь буслай,
Чаран лякъин шайссарив?

* * *

Аман, на вай дардирдан
Цу-цумунин ци бави?
Духмур лувату гьаннин
ЦIусса ялун диллай дур.

* * *

НякI микIирал лувату
Дуккайххакур банавша,
Дуккавивав, ххуйсса оьрчI,
Вил хханххирава ттул дакI?

* * *

КIинттул кьакьай щаращив
Щюлли гъинттул буккайхха,
Буккавияв, ххазинай.
Вил бакIрава ттул яру?

* * *

Зунттуявав ва ттул дакI,
Ттурлу яла къалагай?
Ттурулливъявав яру,
Хъювхъу тIисса къабацIай?

* * *

Уттубишай увкуну,
Хьхьу шанай лагайххурав?
БувкIун, чулухун багьай
Сундарав оьрчIи шатта.

* * *

КIюрххил бизай увкуну,
Къатлул даву дайххурав?
БувкIун, чIарав щябикIай
Муруллул лухIи хъатIу.

* * *

Арцу-муси дарцунан
Бунагь бикIайссари тIар.
Арцул хъазам бавцунан
Ци бунагь бикIайривав?

* * *

Цурк бувманан – ряхва барз,
Чув ивкIунан – ряхра шин,
Агь, байчара хIалтIухъан,
Вин – чIун дакъасса ссивир.

* * *

Уртту къаххяххай ххяллай
РахIмат циван байривав?
Нясив къаайсса оьрчIах
Ччаву циван шайривав?

* * *

ОьрчI, ина кьабитарча,
КьатIув къабукканххурав?
Кьалантрал иттацIанттал
Ччисса цамагу анна.

* * *

Вияту личIи шаврил
На лухIи лахханххурав?
Вайва лухIи яруннал
Ав цамургу бугьанна.

* * *

Бюхттул зунтту лахъри,
Арду майданни,
Ва ттул дакI къумари,
Цаннив къакIулли.

* * *

Эшкьи къахьун ва ттул дакI
Муххай дирхьу чаннанъяв?
Чийх къабурган ттул яру
НякI чIутIул ккуллардуяв?

* * *

Дягъинттул барзунттайн
Марххала бунни,
КIилла кIи дуркIунни –
ДакI дюхлул къашай.

* * *

Ина силул ччуччивуй,
КIикьунтталу банавшай,
Вищал дурсса ттул эшкьи
БакIуйн дуккан дурари.

* * *

Ися идавс архIалну
Лахъан хьурдай меъражрайн,
Малаиктал жям бувну,
Заннахь ина чIа учин.

* * *

Царай тIутIив дури тIар
Ися идавсил гьаттай,
Нарза ласун лавгсса най
ТIутIувува личIайсса.

* * *

Царай уртту дури тIар
Алжаннул багъирдаву,
Авлий лавгсса гъаттара
ХIайран хьуну личIайсса.

* * *

Ца ина ва на хьурдай,
Ца вайлул лухччи хьурдай,
Ина ва на жапирай
Аьрщи-чару аьтIи дан.

* * *

Лахъавав лахъ цIияллайн,
Рутавив кIяла лачак,
Вай щарнил жагьилтурахь
Дичлачи бавив цIарду?

* * *

Къаччинал лархсса хьхьури
Ччан бивзун руцавияв,
Ччисса аьзиз гьалмагъай
Нясив ансса кIулния.

* * *

Къаччимагу, ччимагу
Ччимур буслай кьаивтун,
Ччисса аьзиз гьалмагъай
Хьувух ихьлай бикIанна.

* * *

ОьрчI къакъунттул чIу бури
Тай суннал яхъалату,
ОьрчIнийра дурсса эшкьи
ЦIунияр кIирири тIий.

* * *

Эшкьи хьунан хъинни тIий
Вил луттирай бухьурча,
Илагьий, щарнил дивир,
На вия кьурван хьуннав.

* * *

На эшкьи дарчIуссари
АрулцIалла аьршлуцIух,
Арулазарда шинай
БатIул къадан увкуну.

* * *

На ччаву дарчIуссари
ЦIа хIавилул мархлуцIух,
Мархха аьвну гьарчагу,
БатIул къадан увкуну.

* * *

Ина ва на, яруххуй,
Ялугьлай чув битаву,
Гъарал лачIун чIал хьурча,
Ялув Ххувзал къаитай.

* * *

Мусиву садапнияр
Паракьат къашай ттул дакI,
Элмулул точкалуяр
Утти цалий дарцIунни.

* * *

Аьзиз, на бивчIан мабав,
Эшкьилул ччуччин мабав,
Ттул лухIитIутIул яру
ХъатIултрахь хIачIан мабав.

* * *

Ччаву хьуна вин ва ттун,
На дуччав лухччинуву,
Интту шюлли урттущал
ЛарайчIин ххяхханссари.

* * *

Бавай, цIубарз хъиннивав,
ЦIу гъили баргъ хъиннивав?
Бавай, цIубарзва хъинни,
ЦIан хьхьурду чанна дайсса.

* * *

Ина кунма бакъара,
Чассагуйх тIутIи дичлай,
Гулаватилул дакIнийх
Ттурлу даркьуну бура.

* * *

Эшкьи хьуссагу бури,
Ччаву хьуссагу бури,
Хьуну, чулийн къадурксса,
На кунмассагу бурув?

* * *

Ссавруннайсса баргъ ва барз,
Зу ссай тамашалийру,
Эшкьи батIул дувайсса
На бакъа къаккавкссарив?

* * *

Тти бувагу къагьанна
ЦIахъардал Къуманивун,
Ялтту ттурлу даркьуну,
Лултту зунчал бухьурча.

* * *

Эшкьи хьунан чичайсса
Дивирнал щекьи-кьалам
Ца ттунния къачивчур,
Гунттараву кьакьивул.

* * *

Ччаву хьунан дувайсса
Мюталиннал сававртту
Ца ттунния къадурди,
Элму хъама ритувул.

* * *

Эшкьилия тур данна,
Ччаврия ттупанг банна,
Ххуй оьрчI, вищал эшкьилий
Гъазаватрай букканна.

 

* * *

Та дужагьирал цIарал
Ина ччучлачи чIумал,
Алжаннул чIавахьулттийх:
Му ласи, лавмарт, чинна.

* * *

ОьрчI, ина ухьунссара
Ттун эшкьи хьуссари тIий,
Кьукьин данна вил эшкьи,
ХIисилттул дарайнияр.

* * *

ОьрчI, ина ухьунссара
Ттун ччаву хьуссари тIий,
БатIул данна вил ччаву,
Чарвитул чаннаннияр.

* * *

Хьхьиривух жавгьарнияр

ДакIнивух ппив хьу эшкьи,
Вил дакIниймур къакIулну,
Ашкара дуван къашай.

* * *

Утти на ницIал ялун
ЗалакIгу къаккухIара,
Кьюкьала вин дуллуну,
Кьамул данна лухIи гьав.

* * *

ЭшкьилуцIух цIу ларчIун,
ЦIарал ччучлай кьабивтун,
Вийнма лама къащунну
Ххассал хьуссарав, ххуй оьрчI?

* * *

 

Аьраххуллул дяниву
Арцул тавхана хьурдай,
Ла-ялавай нанинахь
Ина цIухлай бикIаван.

* * *

Агь, ца-цасса макь рутIай
Вай ттул тIутIул яруннал,
НухI идавсил заманнай
БувтIусса тIюпаннияр.

* * *

Ца ина тIий на бура,
Азбардай бавцIу цIубарз,

На тIий чIявусса бури,
ЗуручIа чаннацIукуй.

* * *

Гьалмагъайл хъунна бавай,
Вин алжан ччав, дужагь ччав?
Вин алжан ччисса кунма,
Ттунгу вил оьрчI ччай ури.

* * *

 

Алжан бачIай хIажитал,
ХIаж бачIай хIурулэнтал,
Мурад бачIай гьалмагъайл
Ттун кIива бутIа бара.

* * *

Агь, ттул оьрму ччуччивуй,
Ттуруллул хъирив бивзсса,
БакIру лахъсса барзунттайх
Гьава бувну лавгунни.

* * *

Лухччи хъяхъа чин дурну,

Щюлли урттугу ххяххай,
Гьай-жан, ина сававрай
На хъяхъа чавай бура.

* * *

Хъяхъа чивуй учайсса
ХъункIултIутIуйн бакъаяв,
На тIутIияв, тIуллу ххуй,

Хъяхъа чавай кьабитан?

* * *

БакIрал ххуйми ххаллилли,
Хъус чIяруми виртталли,
Ххуйсса бавал къабувра,
Хъус Заннал къадуллури.

* * *

 

Жул ичIува жан бури,
ЦIияллай маржан бури,
Тавханттуву баргъ бури,
ДакI паракьатну дури.

* * *

На цIузурух ялугьлай,
ЦIубарз ттуй тамашалий,
Шаннагу Заннал цIанийн,
БавцIунийва личIара.

* * *

Багъдадуллал багъраву
Дарувран дукай суну,
Идавсил риттун дурну,
Хьурдай вийх ва ттуйх дачIин.