Утти пикри хьунни, ххаллилсса хIакин-косметолог Зайнаб Баратовал ниттия чичин. Бакуйннал аьнтIикIахъул цивппа ваничIан багьаву марцIсса тIайлабацIулун ккалли буллан бикIай. Вай ттул циняв макьаларттал геройтал цачIун буллалиссар ца иширал: вай циняв хъус-кьинилул, машгьуршиврул, лахъа-хъуншивурттал хъирив багьсса агьлу бакъаяча, хIакинтурал пишарду дакIурдил язи бугьан бувсса бия.

Шиккува кIицI лаган, госпитальгу цивува, чIаравва бивкIсса Гъумучиял азархана 42 шинал лажиндарай хьхьичIунминнувух бивкIссагу, анжагъ хIаятраву алжаннул мурцIу хьун бувну, хъункIултIутIив ххяххан дур­нутIий, бюхттулсса мурхьирдай алжаннул лелуххант макьанну руцлай бивкIунтIий, миннувух 12 тутукъуш, ххуйра-ххуйсса рангру дусса китайнал мюрщи аьнакIив хIаятравух занай бивкIунтIий бакъача, ва азарханалий хъин хъанахъаву санаториялийсса бигьалагаврин ккаллину диркIссар, муксса хъуннасса аякьа-къулагъас къашайшалтрах душиврийн бувну. МукьцIалла шинал лажиндарай Лакрал райондалул азарханалул хъунама хIакинну зий ивкIсса, дяъвилул захIматсса шиннардий агьалинал цIуллу-са

Ттун бусан ччай бур цуппа дунияллия гьаннин, та азарханалий зий бивкIсса ххаллилсса хIакин, Щайхлул душ Алла Щайхановая (1930 — 2002 ш.ш). Ва бия Заннала хIакинну ляхъан бувмур ва аьрщарайсса Заннал кумагчи. Укунсса инсантал дунияллийн ттуршра шинай цалли ляхъайсса. Ванин Заннал тапшур бувну бия къашавайсса ва маэшатрал кIюласса инсантуран кумаг буллан. Укунсса пикри бувххуна ттул бакIравун, ванил пишалул уртакьтурал ва чIявусса шиннардил хьхьичIва ваничIа хъин хъанай бивкIхьурчагума, ванил бувмур дакIнийсса инсантурал бусласимуних вичIи дишайхту. Хьхьу-кьини личIи къадурну, чIун дур, дакъар къакуну, ва инжитминнал, цуппа аьркинминнал чIарав бия, агьалинал дакIурдивуми щавурдайгу ка дихьлай. Бюхъай ттухь, Гиппократлул хъа бувсса медициналул вузирдал циняв выпускниктурал бурж-бигардихха учинссагу уккан. Амма циняв хъарду бувми дакIру тIайланугу къабикIай, оьрмулул мяъна-мурад цалла давриву чIалачIиссагу чIявусса къабикIай. Ванил ххуйсса кIул­шивуртту ларсун дур. Ванил никирал агьулданун, дяъвилул хъиривсса шиннардийминнан, тIайлабацIу хьуну бур. Ленинградрай блокадалул чIумал, цаппара хъунисса предприятияртту, мукунма вузру билаятрал цайми кIанттурдайн бизан бувну бур. Вана укун Ленинградуллал медициналул институт Москавлив бизан бувну бур. Зайнаб дакIнин бутлай бур: «1957 шинал ниттил къуртал бувссия Медициналул институтрал гинекологиялул факультет, ванил преподавательтал бивкIссар Ленинградраясса. Институт къуртал байхту, зун гьан дурссар, лага-бучIан къабигьасса зунттал райондалийн. Цуксса чIалсса чIун духьурчагу, оьвтIий увкIсса ­инсан дарвазалувух ухханнин, анавар дуккайсса диркIссар нину къашайшалачIан. Цурда тIааьн дакъа дунийгума. КьатIув ци дякъил замгьар, чявхъагъарал духьурчагу.

Ца ппурттуву, балчаннуй бакъа гьаз хьун къашайсса шяравун гьан багьссар ванин оьрчI буллай, вяра сукку хьусса хъамитайпалучIан. Анаварсса нину, балчаннуй буртти дикIан нанисса хIалатраву дагьссар, ка лув дирирну, гъаргъссар. Гужсса къювулул къиялий дунура, ва ларгссар оьрчI буллалисса хъамитайпалучIан. ЗахIматсса тагьар диркIссар оьрчI буллалисса хъамитайпалулгу. Цуксса къювурдал бас буллай бунугу, оьрчIакъатлул руцари хьу­сса щавурдугу ххаллу дирхьуну дурурххуну, оьгу бацIан бувну, ванища нинугу, чIивитIугу ххассал бан хьуссар. Цурдамур духIан захIматсса къювурдал азурда дурну, хIал бивну дагьссар. Укунсса ва ванихава лавхьхьусса ишру цикссагу хьуссар ниттищал».
Ва макьала чичлан хьхьичI, на медициналул мадарасса макьалартту дуккав, ххилтIу дував. Ттун, уттизаманнул хIакин цукунсса икIан аьркинссарив бусласисса халкьуннал пикрирдах вичIи дишин ччай бия. Инсантурал няраву цIакь хьуну бур, медицина украссар тIисса пикри. Ва ихтияр Конституциялийгу цIакь дурну дур. Амма, хIакьну иширайрив мукун ­ба­къар. ­Инсантуран язи бугьан багьлай бур, цивппа чун гьанссарив, щичIа хъин хъананссарив. Алла Щайховнал къашайшалтраннив тIайлабацIу хьуну бур, та чIумалсса, ца яла хьхьичIунма хIакинначIа хъин хъанан.

Гъумуксса азарханалий зий бунува, ванил лавхьхьуну дур медициналул цайми касмурдугу. Жура-журасса азардащал букIлакIисса инсантурахь, ттуйн къабагьайсса иш бур, ттулмур профиль дакъар къаучиншиврул, гинекологнал касмулия байбивхьуну, ва бувкIун бур яла терапевтнал ва педиатрнал касмурдайнгу, махъ лархьхьуну дур неврологналмур давугу.

Гъумуксса даврил уртакьтурал, дунияллия лавгун 20 шин хьуну махъгума, гъилисса ва хIайрансса асардайну дакIнин бутлайнма бур Алла Щайховна.
ХIакьинусса кьинигу Гъумучиял азарханалий зузисса МахIаммад Айгунов: «Хъинну захIмат ххирасса, даву нахIу ларчIсса, «къа» бакъасса инсан бия, тачIав махъаллил къашайва кумаг буван, дяхьхьунивугу, кIюрххицIунмайгу, ххявххун бачайва. Къашайшалтрай цIими бусса бия».
Марат Чупалов: «Чанна­сса, тIааьнсса хъамитайпа бия. Чувшиву дусса, сивсусса. Чувшивугу, сисавугу чара бакъа аьркинссар тукунсса хъар цилла хъачIунттайн рутан. Къашайшалт ххассал буву бия. ТачIав кIу къабизайва инсаннан ­кумаг буван, бувххуну бура тIисса, къарязисса махъ зумату ­къабуккайва».
Педиатр ­ПатIимат МахIа­ммад­расуловна зий бивкIун бур Алла Щайховнащал ­­1977-ку шиная тIайла хьуну ва дунияллия гьаннин. «ХIал бавкьусса, хIалимсса, дакI-аьмал ххуйсса хъамитайпа бикIайва. ЦIуну оьрчIру бувминначIан бахшиш дакъа къабуххайва. На медсестрану зий буссияв, ттун ккаккайва, тачIав канил ка дургьуну, бачIва къабучIайва. Аякьа дусса бия лагма-ялттуминнай».

Медсестра ­Галя МахIа­ммадова: «Алла Щайховна вы­зоврдугу кьамул дуллай, инжит­начIан, оьвкуначIан лечлай бикIайва, азарханалийгу кьамул буллай инсантал. Жун ва дежурствалий буну ччан бикIайва. Ванил жулама, чилма личIи къаайва, чIивима, хъунамагу личIишиву дакъая, гьарманан кумаг бансса кIулшивугу, опытгу бия. Хъинну захIматсса, шанийн багьсса, паралич хьусса къашайшалтрал ялув диялсса дакIцIуцIаву дайва. Ттул ласнал ниттил инсульт шайхту, жучIату къабуккайва, даруртту лавсун бучIайва, дукра цукунсса дулун аьркинссарив буслан бикIайва. ХхюцIалла шинал стаж бусса, физиотерапиялул кабинетрал медсестра ­Наташа Бакмаева дакIнин бутлай бур, дяхьхьуниву ссят цанний, кIинний къашайшалачIан лавгун, кIюрххилнин бацIайва тIий. ТачIав диагноз дишавривугу къабяйкьайва, цаягу къашайшала МахIачкъалалийнгу тIайла къауккайва тIий. Гиппократлул заманнай бакъахьунссия жулва Алла Щайховна кунмасса хIакинтал, цалва хъун бакъасса харжирацIух къашайшалтран ­даруртту машан ласайсса.

Буниялттунгу, ­ванил ­щал­ва оьр­мулул гьану, ттарцI ­къа­шавайсса инсан, ганахасса аякьа хьуну дур. Ванин ­сайки гьарма къашайшала дакIний личIайсса, цIа-бакIгума дакIний дугьайсса диркIун дур. Гьарманан шайкун кумаг буллалисса бивкIун бур, хIакин хIисаврайгу, дакI-аьмал хъин­сса инсан хIисаврайгу. Мархралли мурхь бугьайсса учарухха, ши­кку рувхIанийсса ­мархри цIакьсса бушиврулгу иш бухьунссия. Ва щалвагу Ккав­кказнаву цIа ларг­сса щайх Ярагъскийл наслулия­ссар, ванил нину Аьбидат Ярагъскийл внучка бивкIссар. Ванил тухум Гьуйннал МухIаммад-Буттаятугу наниссар. Халкьу­ннан дакIнийссар укунсса иш. Къурагьшиву дагьсса чIун диркIссар. МухIаммад-Буттал оьрчIан ккукку буллалисса циняв ниттихъайн цачIанма оьвкуну, гъарал чIа тIутIисса дуаьрду дуллан ивкIссар. Му ппур­ттуву гужсса гъарал ларчIссар. ­Ганал цалла щарссанийн оьвкуну, кIюлаччатI бувну халкьуннайх бачIи увкуссар. Укунсса миннатгу бувну, лавгссар дунияллия. Укунсса карамат кка­ккан дурсса адамина ивкIссар. ЦIана учинтIиссар цIакьсса генарду бусса куну. Ва ялагу, Алла Щайховна рувхIанийсса кIулшивурттал хъирив багьну, ислам лархьхьуну, диндалул ххуллу-ххуттайгу цIакьну бавцIуну бивкIссар. Диндалущалсса талатаву хIура дуккан къаритлатисса, мизитру лакьлакьисса, дин дуван къадагъа ду­сса совет заманнай, ванил гьаз бувссар складрайн кIурабаен бувсса Гъумучиял мизит, шиву дирхьумургу дуккан дурну, мизитну битан аьркинссар тIисса масъала. Райкомрал секретарьнал ванийн оьвкуну дяъви­ був­ссар, парторг, коммунист мукун тIун бикIайссарив куну. Ванил лявкъуссар секретарьнал дакIничIансса ххуллу, учинсса махъру. Гьунар ­бусса хIакин Алла Щайховнал ялувбацIаву диркIссар чIахху-чIаравсса шяраваллаву яхъанахъиминнайгу, Лаващиял райондалийн, ЦIахъарав лагайсса бивкIссар къашайшалтралсса буван. Ванил бурж къабивкIссар цайми районнал­сса буллан, амма ссихIирчиная кунмасса тIар бувккун бивкIссар вания, ка сававсса хIакин бур тIий. Инсанталгу ваничIан най бивкIссар. Хаснува ванил дакIнил марцIшиврия, ссайнчIав тамахI бакъашиврия хавар буну. Таний хIакинталгу чанну бивкIссар, ванингу­ ­гьарманалсса буван ччай бивкIссар, щилчIав дакIнийн щун къабан, инсан рязи уван.
Ванил душ дакIнин бутлай бур: «Арцул реформа дусса ппурттуву, ца цахъис къухъна­сса даргиричу увкIуна ниттичIан арцул бувцIусса дарвагращал. – ДачIи арцу вилли, дачIи ттул, так кумаг бува ­доходрал декларация дузал дуван, – увкуна ганал. Ни­ттил ­кумаг бувна, амма къуруш къаларсуна».

Алла Щайховна дакI ­давриву дирхьуну зузисса инсан бия, ­гьунарди тIийгу бакъая мукун зузаву, цIардал, бахшиширттал, машгьуршиврул хъирив багьну бакъая. Ва бия къюкIлил оьвкуну, бувцуну агьалинал цIуллушиврул къайгъурдалсса буллали бувсса инсан. Ванил вичIи дишайва так цилла адаврал чIуних. ВаничIа инсаннал оьрмулул кьимат лавайну бия, цилва оьрмулул, ялапаршиндарал мяъна-мурадгу инсантурахсса ччавриву чIалачIисса бия. Ванил диагноз тIайлану дишаврил хIакъираву бусалардува бикIайва. Гьунар бусса хIисаврайгу, бусалардавун багьсса бия.

Цал Телеграм-каналданий, тачIав инсанная цIа ­къадувайсса космонавт Муса Маннаров­лулгума, ци мюнпатсса даву ­дур­ссар ватандалун тIисса ­ин­саннал, Алла Щайховна цалва кумиръя, цал бурувгун тIайлану диагноз дишайва ва ци байссарив бувну инсан хъин увайва увкуна.
Укун­ къашай­­шалт цIуцIавур­ттаща ххассал ­бувну, цIусса дунияллийн буккан байсса гьунарданул, бюхъу-бажарданул заллу бия Алла Щайховна. ­Халкьуннал дакIурдиву ва ливчIунни ххаллилсса хIакинну ва дакI марцIсса ­инсанну. НукIува увкусса ­куццуй, дакIнил ­оьвкуну хIакин хьусса, Аллагьналва хIакин хьун нясив ­бувсса.

СалихIат Аьлиева
ш. Баку
Таржума
ПатIимат Рамазановал