Лакну ливчIсса лакрал миллатрал ца яла къювумур масъалалун ккаллину бур ниттил мазрал кьадар. Цала мазру яшаврил буруккин лакран бакъа, вайми Дагъусттаннайсса мюрш миллатирттангу, чичру думиннунгу, чичру дакъаминнунгу, аьмсса масъалар. Ларгмур ттуршукулул 60-ку шиннардийва увкуну бияхха Р.ХIамзатовлул: «Гьунттий ттул ниттил маз бухлагайхьурча, хIакьинува ивчIан на хIадурссара», – куну. Мукунсса кьадар чивчуну бур му мазрай гъалгъатIисса 

 

миллат чIивисса, му мазрал щаллу буллалисса функцияртту ссуссукьусса мазурдин.

Мазрал яла агьаммур функция хъанахъиссар инсантал гъалгъалийну куннащал кув бахIаву (коммуникативная функция). Му давриву яла агьаммур хъар дагьлагьиссар, цалчин, гъалгъа буллалиманайн, яни зумату буклакисса чIурдая сакин хьусса мукъурттил кумаграйну цала пикри бусласиманайн, ва, кIилчин, ми мукъурттил ва миннуя сакин дурсса калимарттал мяъна лаларсун, цахьва бусласимур бувчIлачIисса вичIи дирхьуманайн. Ча, сагъсса маз – му бусласиманал чIурдайну сакин буллалисса, ми чIурду цанма баллалиманал лаласласисса гъалгъар. Маз – инсантурал дянивсса арарду дузал даврил ярагъри. Мазрал функцияртту чIявуссар, бурги так ца жула лакку мазравугума циксса бурив мазраясса, мукъуясса учалартту. На шикку цанний гьашиву данна: «Мазран кIул чув – чай, чал заллу – ахьтта». Циксса гьарзасса мазру кIулну бурив, инсан муксса аванданссар.
Учин ччимургу вари: маз сагъссар му мазрай инсантал гъалгъа тIутIиссаксса. Яла агьаммур мазрал журагу – гъалгъалулмур мазри. Чичру, гъалгъалух бурувгун, хъинну махъ лярхъуссар. Цаппара мазру бур уттигу чичру дакъасса, «бесписьменные» тIисса цIанилусса, ми циняв аьлимтурал ххал бивгьусса, миннун хасъсса чичру ляхъан дурсса, миннул словарду буккан бувсса мазру бунувагу (М.Халиловлул сакин бувсса бежтIиял мазрал словар яру мазралмунияргу хъунмасса бур). Цумур бунугу мазрай гъалгъа тIий бакъахьурча, му маз бивкIусса мазри. Бюхъайссар мунил ччянияцIарасса ­чичру дикIан. Масала, бухзаманнул грек маз, латIин маз. Ми цIана «ливтIусса» мазурдин ккаллину бур, миннуй гъалгъа тIий бакъатIий. Мунияту хьхьичIва-хьхьичI ябан аьркинну бур гъалгъалул маз, яни му мазрай гъалгъа тIун аьркинну бур.
КIулсса зат бур: маз ­сагъ­ну яшайссар му мазрай гъалгъатIисса миллатрал цала аьрщарай, миннал бакIравусса дунияллул суратгу му цанма хасъсса мазрайри дусса, миннал багьу-бизу, аьдат-эбадатру, цала лавгмуниясса бусалартту, магьри, балайрду, учалартту му мазравур бусса. Лакку мазран нигь дакъая лак цала буттал кIанай, Лакку кIанай циняв цачIу бусса чIумал. Арантал хIалтIилух занай, цайми мазругу лахьлай бунугу, хъами-оьрчI бия шаппа, ниттил мазрай гъалгъатIий. Мазрайн щавщи биллай байбивхьуна шяраваллил кIанай колхозру хьуну махъ. Заллухъруннаща хъуру зер­ххукун, чIявуми хIалтIухъантал кулпатирттащал архIал цив­ппа зузисса шагьрурдайн бизлан бивкIуна. КунначIан кув гъанну яхъанахъими, хаснува цалчинмур никирай, гъалгъатIий бия цала мазрай, минначIа мазгу яхъанай бия. ОьхI-чап тIий, лагъарт кунма колхозирттаву зузисса хъаннил хIарачат бикIайва цала оьрчIру дуккин бан, ми «столлах щябивкIсса» къуллугъирттай зуншиврул. Дур­ккусса жагьилмигу къачIявусса кIурабаяйва шяраваллавун.

 

Яла, аьрщив ссуссукьусса зунттал кIанайсса хозяйствар­тту «бесперспективныйсса» дур тIун бивкIуна. Мугу бухьунссия лак чачаннавун бизан баврин­сса ца багьана. ЛичIи-личIисса щархъава ца кIанайн бизан був­сса лакраща цала мазрай гъалгъа тIун бюхълахъишиву – му бия микку хъин чулий ккалли бансса зат. Миннал цала мазрах ххишалану къайгъу буну чIалан бикIай Лаккуй, Гъумукнияр: лагма-ялтту чил мазругу бунутIий бухьунссар. Лакрал ца ялагу цIуцIи кIану хьунни ми миккугу къабивтун, цамур миналийн бизан буллалаву. Мазралмур масъала микку цукун багьанссарив къакIулли, хъинмур Аллагьнал баннав.
Шяраваллу дачIра хъанахъаву, кIий, зунттаву жагьилми чан хъанахъавугу хъанай дур маз яшавринсса ца ссуссукьушин. ЩилчIав бизан бувну бакъанагу, ччянира агьулдануцIа хьунни Вилттащиял шяравалу, цивппа хушрай, шяравалура дирзун лавгунни Хъанар – Янгиюртлив мина дирхьуну бунуккар. МинначIа мазралмур масъала цукунсса буссарив къакIулли.
Циксса халкь буссарив Ла­ккуй (Лакрал ва Ккуллал районнай) мяълумсса статистика ттун къаляркъунни. КъачIярусса дунуккар биялсса халкь бусса, хъунисса шяраваллу. Миккугу дур ца аьжаившиву: Лаккуй­сса шяраваллал мадарасса агьлу бур арив, къутаннай ялапар хъанай, цивппагу зунттавуминнан ккаллину (Кьуби, ­Ппалассун, ГьунчIукьатIи…). Мазрал тагьар минначIа цукунсса ­дуссарив кIул буллайгу цучIав ушиву къакIулли, кIива вузраву лакку мазрал отденияртту дунура.
Шагьрурдайми лакрая ци тIунну? Вайми дагъусттан миллатирттал цала-цала халкь гьарзасса шагьрурду бур: Щурагь, Къизилюртлив ярусса чIявусса бур, Дербентлив чIявур курал, табасаран, Изберглив дарги гьарзасса бур. Миккусса школардаву ниттил мазру лахьлахьаврил масъала захIматсса бакъахьунссар, оьрчIан ми мазру кIулну бунутIий, ми ишлану бунутIий ичIувагу, кьатIувгу.
Му чулухагу лакку мазрал тагьар ххуйну дакъар. Школардай ниттил мазру лахьлан кка­ккан бувну бунугу, учительтурал цIуру-кIуру бур ми оьрчIан ниттил маз къакIулшиврия. ИчIува ишла бакъасса маз школалий, нюжмардий ца-кIира дарс дихьлай, лахьхьин бан къашайссар. Лахьхьингу цири буллалисса? Буккин-чичин. Миннан аьркинсса гъалгъа тIунни. Цири миннал ккалантIисса? ЦIана оьрчIру оьрус мазрайвагу луттирду ккалай бушиву къакIулли, кунначIа кув щябивкIсса жагьилталгума куннащал кув гъалгъатIий бакъарча, гаджетирттавун бувххун бур.
Лакку мазрай дакI цIуцIими хIарачат буллай бур маз ябансса чараннах луглай. Ваниннин 20 шинал хьхьичIгу му масъалалун хасъсса «ккур­кки стол» бавтIун буссия. Муниву гьуртту хьуссия тамансса махъ нанисса лакрал ишкка­ккулт, аьлимтал, чичулт, учительтал. Микку гьаз бувсса масъаларттан хасну «Лакку мазрал пикрирдай» тIисса лугума итабакьуссия (Махачкала, 2003). Микку кьамул дурссия 16 пункт бусса резолюциягу, миннувасса ца: «Лакку мазрал ва литературалул центр» дузал бан, му давривун дугьарамур ва жагьилмур никирттал лак кIункIу буллан. Амма му «Центр» бувсса ттун кIул къавхьунни.
Гьашину августрайгу «Инт» кафелуву хьунни мува масъалалун хас дурсса батIаву. Мунил сиптачи бия лакку мазрал учительтурал модератор П. Аьлиева. Му батIаврия бувсун бу­ссар «Илчи» кказитрайгу (№32, 30.08.2004). Миккугу хIукму бувна мува Лакку мазрал центр тIитIин, мунинсса помещениягу дуллай ия Общественный палаталул председательнал ­хъиривчу Ссапарбаг Аьбдуллаев. Амма му масъалагу ссайн бувкссарив, му центрданул даву ­цукунсса дикIантIиссарив уттигу кIул къавхьунни.
Кьура шинал хьхьичIгу, утти­гу Дагъусттаннал хъуниминналгу, Халкьуннал Собраниялулгу хьхьичI бишинсса ма­съалану кIицI лаглай бия мазурдил хIакъиравусса закон кьамул даву. Ттунма бувчIуссаксса, му закондалиясса тIалавшин – циняв дуклаки оьрчIал чара бакъа ниттил мазру лахьлахьаву дунуккар.
Дагъусттаннай мукунсса закон кьамул дан хьуншиврий ттул вихшала дакъар. Так чичрулул дагъусттан мазру 8 бур (къумукь мазгу хIалану), вайми бикIлил бакъами къахIисавну (чачан, азирбижан, тат ва ц.). Татарнал, башкирнал кунма, так ца маз бивкIссания, му личIия. Амма жучIара мукунсса закон кьамул дан хьуншиву къакIулли. Му ца. Ца ялагу – гужрай, я нитти-буттан, я оьрчIан къаччай маз лахьлахьи бан къашайссар, шаппа ишла бакъасса, нитти-буттал лахьхьин къабувсса мазгу «родной язык» къашайссар. Учин­ссар, циванни чил мазру лахьхьин буллалисса, цаламур лахьхьин къабувну куну. ХIукуматран чил мазру кIулсса специалистътал аьркинну бунутIий. Утти бюхъайссар европанал мазурдицIун, аьраб маз, китай мазгу лахьхьин буллан. Ниттил мазру жунмар аьркинсса. Цищава шаймур хIукуматралгу банссар, бугу буллалиссар (ниттил мазурдийсса кказит-журналлу, литература итадакьлакьаву, театр зузаву, радиолий, телевидениялий передачартту душиву). Вана «Ниттил мазурдил ва культуралул кьинигума» ляхъан дурну, «Мара, бялахъияра, так закондалия­сса гъалгъарду цивппа битияра» тIисса кунма.
Ча, оьруснал «Спасение ­утопающих – дело рук самих утопающих» тIисса кунма, цала маз яшаву жяматрал цийнма ласун­сса масъала хъанай бур. Мунияту ххари хьунсса зат бур Аьли Камалов бакIчисса «Миллатирттал мазру ябаврил фонд» сакин дуршивриясса хаваргу. Амма му фондрал ци дуллантIиссарив конкретныйну, гьарта-гьарзану бусарча хъинну хьунссия. Лакку мазрацIун дархIуну нара дуллалимур давриягу бусавияв, му фондрая ци кумаг хьунтIиссарив ттунма бувчIирча.

Роза Эльдарова,
к.филолог. н., доцент