Вай гьантрай ДР-лул ­энергетикалул ва тарифирттал министр Марат Шихаьлиевлул, ­«Северный Кавказ» — «Даг­энерго» ПАО-лул филиалданул директор Арсен ХIажиевлул ва МахIачкъалаллал энергосетирдал отделениялул хъунама инженер Сяид Лачиновлул «Дагестан» РИА-лул площадкалий дунни пресс-конференция.
Вайннал бувсунни региондалий гъинтнил зурдардий электроэнергия ишла баврин яла гуж багьлагьимур чIумал агьали энергиялул дузал баврил тагьарданул хIакъираву.
Ххал бигьлай бия сетирдан гуж багьаву сававну чирахъру лещан баврил масъала.

Дагъусттанлувтурал чирахъру ччя-ччяни лещан буллай бур тIийнугу, пресс-кон­ференциялийн бувкIсса экспертътурал бувсунни 1920-1923-ку шиннардий электросетьру цIу дуккан даврийну ­2024-ку шинал гъинтнил зурдардий хьхьичIра куннасса аварияртту хъанай ва чирахъру лещан буллай къабивкIшиву. Вайннал бувсунни электроэнергетикалул ­сетьру цIу дуккан даврийну (модернизация) региондалий хъин чулийннайсса хIасиллу хьуну душиврул хIакъиравугу.Шихаьлиевлул тIимунийну, вай давуртту бартдигьаврийну аварияртту чан хьуну дур шамлийну, амма дузал буван аьркинсса масъалар­тту ттигу ливчIун бур.
«Жу уттигу зий буру аварияртту чан даврил ва тагьар куклу-бигьа даврил масъаларттаха», – кунни министрнал.

Арсен ХIажие­влул тIи­мунийну, «Россети» ­ПАО-лул агьаммур масъала хъанай бур агьали вихшалану электричествалул дузал баврил масъала, муниха идара зийгу бур. ­Ларгсса ттуршукулул 60-70-ку шиннардий бувсса чIявуми объектру кугьна хьуну, гьава зия шайхту ливну най бур. Махъсса шиннардий ­региондалий электричество ишла баву гьарза хьуну дур, мунилгу системалун зарал ххи буллай бур.

«Гьашину жул пишакартурал тамансса давуртту дунни: бакьин бунни 600-нниха лирчусса километрарду электропередачарттал ххаллал, даххана дунни сайки 200 километраксса дух хьусса ххаллу, миннуйнугу чан хъана­хъиссар технология лиян давуртту ва ток бацавуртту. Даххана дур­ссар 1600 ттарцI (опора) ва сайки 1500 кугьна хьусса ­изолятор», – кунни ХIажиевлул.
Ванал мукунма бувсунни филиал кIинтнил зурдардийн хIадур шаврил хIакъиравугу. ХIажиевлул бусаврийну, дур­сса давурттайну тамансса даххана хьуну дур электричествалул агьали дузал баврил ­тагьар: 2024-ку шинал 8 зурул мутталий электропередачарттал ххаллаву аварияртту чан хьуну дур 20,8 процентрал, мукунма чан хьуну бур чирахъру лещан бавуртту.

Уттинин салкьи хъанай бивк­сса масъалартту дузал баву мурадрай, 2020-2023- 2026-ку шиннардийнсса республикалул электросетирдал комплекс вихшалану зузаврил программалул лагрулий хIадур дурну дур МахIачкъалалив цалчин ярглий ­дуван аьркинсса давурттал план.
ХIадур дурну дур мукунна республикалул электросетирдал комплекс 2026-ку шинайннин ххуй-хъин баврил планну.
2024-ку шинал техникийсса обслуживаниялул ремонт даву дацIлай дур 1 673,5 млн къуруширттан, ягу дукIуминнуяр 74 процентрал ххишалану.
2025-ку шинал электросетьру цIу дуккан даврил давурттан харж хьунтIий дур 1 650 млн къуруши­рттал.

ХI. Аьдилов