Октябрь зурул 29-нний МахIачкъала шагьрулул 49-мур школалул директор Аьбдулкарим Айгуновлул хьхьичIунну дуклакисса оьрчIру Чачаннал Республикалийн экскурсиялий бувцунни.
Грозный шагьрулий дуклаки оьрчIру хьунабавкьунни Чачаннал парламентрал депутат, Социал политикалул, ЦIуллу-сагъшиву дуруччаврил ва спортрал масъаларттал комитетрал председатель Муса Ханариковлул. МахIачкъалаллал 49-мур школалул 3-ми,7-ми ва 10-ми классирттал отличниктал хьунабавкьунни Грозный шагьрулийсса школардай хьхьичIунну дуклакисса оьрчIащал.
Аьрххилул лагрулий оьрчIал ххал бунни Ахмат Кьадировлул цIанийсса мемориал комплекс, Чачаннал Республикалул парламент, мукунма, дуклаки оьрчIру бувцунни шагьрулийх экскурсия бан.
Парламентрал вакилтуращалсса ва чIун архIал оьрчIащалсса хьунабакьавурттайну жула оьрчIан куннащал кув дусшиву, дахIаву дуну бикIансса сант ххишала хьунни. ЦIуну хьусса дустурайн оьвчин бюхъаншиврул цаннаща цаннал лавсунни телефоннал номерду.
КIулшиву дулаврил даву лавайсса даражалий дачин дурсса школалул директорнал захIматран кьимат бишлай, Аьбдулкарим Ризауттиновичлун дуллуни Чачаннал Республикалул парламентрал чулухасса ХIурматрал грамота.
– Школалий кIулшиву дулаврил шартIру лайкьсса даражалий сакин даврицIун, ва чялишну гьуртту хъанай ур спортрал ва жяматийсса иширттавух. Ва хъуннасса къулагъасрайн ласлай ур учительтурал масъалартту. Мунил исват буллай бур Аьбдулкарим цала коллективрай дакI цIуцIисса каялувчи ушиву. Цува зузисса кIанттай бикIу, гьалмахтурал дянив бикIу, Аьбдулкаримлул хIурмат-кьимат лавайсса бур.
ЧIалай ур ва цува каялувшиву дуллалисса школалул цIа-кьини бюхттул дан хIарачат буллалисса, унгу-унгусса педагог ушиву.
Цинявннан хIисав хьухьунссар ванал каялувшиврий 49-мур школа республикалул хьхьичIунсса школардал сияхIрай бушиву. Даврил сант кIулсса, зун гъира-шавкь дусса, жагьилсса пишакар Аьбдулкарим Айгунов буниялагу хъунмасса захIмат бихьлай ур цIушиннарду дуллай, оьрчIан дуккаврихсса гъира бутлай, – увкунни Муса Ханариковлул. Чачаннал Республикалул парламентрал чулуха дуклаки оьрчIангу дунни дакIний личIансса бахшишру.
Шиккува кIицI лаган, ларгсса нюжмардийгу Аьбдулкарим Айгуновлул байбихьулул классирттаву хьхьичIунну дуклакисса оьрчIру Ингушетиянал Республикалийн бувцуну, вайннангу ххаллилсса экскурсия бувссия.
Имара Саидова
