Тталаткьини, октябрь зурул 28-нний, Ккуллал райондалий Ваччиял шяравусса Вирттаврал аллеялий тIиртIунни Ватандалул Аьрасатнал Виричу Фархад Худайнатовлул аьпалул ула.
КIицI лаган, райондалул Культуралул управлениялул хIаятравусса аллеялий дирхьуну дуссар Ккуллал райондалиясса цинявппагу Вирттаврал: Буттал кIанттул цIанийсса Хъунмасса дяъвилул, 1999-ку шиналсса дяъвилул, хасъсса аьралий операциялул ва социалист захIматрал Вирттаврал аьпа абад буллалисса ултти. Утти шикку ххи хьуссар жула къучагъ Фархад Чариновичлул улагу.
Юнармейцы ва мюрщи оьрчIру тIутIал кацIругу бувгьуну, бавцIуну бия аллеялувусса вирттаврал улттачIа. ОьрчIру мюрщину буна Ватан ххирану тарбия баву мурадрай райондалий вай мудангу укунсса мероприятиярттайн кIункIу бай.
Шамил Рамазанов бакIчисса делегациялул Виричунал улттучIа тIутIив дишайхту, Аьрасатнал гимнрайну байбивхьуна мажлис. Виричунал аьпалун баян бувна минутрайсса пахъ багьаву.Хъирив ихтилат бувна райондалул бакIчинал.
-– Ккуллал райондалия чIявусса къучагътал бувкссар. Миннавух пахрулий кIицI дан бюхъанссар утти Фархадлулмур цIагу. Пахрулущал архIал Виричу жагьилсса оьрмулуву дунияллия лагавриясса пашманшивугу дур. Октябрь зурул 26-нний Аьрасатнал Виричу, гвардиялул прапорщик Фархад Худайнатовлун оьрмулул 39 шин хьунтIиссия. Ванал жан дуллунни хасъсса аьралий операциялий Ватандалул мурадру буручлай. Фархад Худайнатов къуллугъ буллай ивкIсса бригада ВСУ-лул яла хьхьичIунми соединениярттайн къарщину бавцIуну бивкIссар.
Ва кьинисса мероприятиялий гьуртту хьунни Ккуллал райондалул бакIчи Шамил Рамазанов, Лакрал ва Ккуллал районнал военком ХIасан Масуев, райондалул Ветерантурал советрал хъунаманал хъиривчу, отставкалийсса майор, аьралий иширттал гьурттучи Щамхал Хизриев, культуралул зузалт, учительтал, дуклаки оьрчIру.
Укунсса къучагътал бусса жула билаят щищачIав бух бан къахьунтIиссар. Вирттал сагъссар, жунма ми дакIний буссаксса, – увкунни Шамил Рамазановлул.
«Виртталну къаляхъайссар, Вирттал оьрмулулли ккаккан байсса. Лакрал миллатрал тарихраву чIявусса буссар къучагътал. ХIакьину Аьрасатнал Вирттаврал цIарду ларсъсса НурмахIаммадгу, Фархадгу буттал буттахъал яхI-къириятрай, чувшиврий тарбия хьусса оьрчIрур. Вай цивппагу эбратну хьунтIиссар хIакьину шиккун бавтIсса оьрчIан. Барчаллагьрай ура хIакьинугу ялун нанисса ник Ватан ххирану тарбия даврил ххуллий захIмат бихьлахьисса тарбиячитурайн, учительтурайн. Цила чIумал Уинстон Черчильлул увкуну бур: « Буттал кIанттул цIанийсса Хъунмасса дяъвилий Ххувшаву ларсъссар Вирттал тарбия бувсса учительтурал». ЦIанакулгу тарбиялул даврих хъуннасса къулагъас дикIан аьркинссар. Жула жагьилтал жува тарбия къабарчан, ми душмантурал тарбиялийн гьан бюхъайссар. Билаятрал мурадру буруччаврил цIаний Украиннал аьрщарай хасъсса аьралий операция бансса захIматсса хIукму кьамул бан багьунни жула президентнан. Хъуннасса нигьачIаву диркIссар Аьрасатнал аьрщарайн НАТО-лул аьрал буххансса. Цала тIимур къавхьувкун, миннал жува гьулусан бансса, миллатирттал, диннал дянив дичинсса кьаст лархIунни. Кьини дурксса чIумал цинявппагу миллатру цаннал чIарав ца бацIан аьркинссар. Щак бакъар жува ххув хьунтIишиврий», – увкунни Щамхал Хизриевлул.
Военкомнал барчаллагь увкунни Виричу тарбия увсса нитти-буттахь, учительтурахь, мукунма мероприятиялул сакиншинначитурахь.
Фархад Чариновичлул оьрмулия бусласисса ихтилат бунни ЦIийшиял школалул учительница Саният ПатахIовал.
– Худайнатов Фархад Чаринович увну ур 1985-ку шинал октябрь зурул 26-нний Каспийскалий. Шиккува мукьва классгу къуртал бувну, увкIуна ЦIийшиял школалийн. Ччяни хIала увххуна коллективравух. Хъунанал хIурмат бусса, чIивинал чIарав ацIайсса ия. ТачIав вяйливсса, низамрава увксса тIул къадурссар. Дуккавривугу хьхьичIунсса ия. Школалий, райондалий дуллалисса спортрал гьарица мероприятиялий гьуртту шайссия. Школа лавайсса кьиматирттай къуртал бувна.
Учительтуран бикIу, шяраваллил инсантуран бикIу аьркинний кумаг байва. Гьарица чулуха вихшала дишин бучIисса ия. Жулва чайссар чув шай мархха куну. ЧIалай ия ва гиччава най уна мукунсса ушиву.
Виричунал цIа лайкь даннингу, захIматсса шартIирдай ккаккан дурсса чувшиврухлу Фархадлун дуллуну диркIссар кIийлла Къучагъшиврул орден, Георгийл ххач ва Жуковлул медаль. Барчаллагь ххаллилсса арс тарбия увсса ванал ниттийн. Фархад мудангу эбратну икIантIиссар ялун нанисса никиран.
Гвардиялул прапорщик Худайнатов ивкIун ур спецназрал группалул командирнал хъиривчуну. Ванал чувшиврийну ва каялувшиву дан кIулшиврийну цимигу ишираву гуж ххишаласса душманнаяр ххув хьун бювхъуну бур. Фархадлул каялувшиннаралу аьралитурал цимилгу лявкъуну бур ярагъуннищалсса душман лаивкIсса кIанттурду. Цайва дакI цIуцIисса, аякьа дусса командир ххирасса ивкIун ур аьралитуран.
Ца талатавриву Фархад усса машина душманнал ярагъуннил пIякь учин бувну бур. ЧIярусса цIунцIиярттугу, контузиягу хьуну унува, цIу ларчIсса машиналува аьралитал буккан буллай, миннан цалчинсса медициналул кумаг буллай ивкIун ур.
Махъра-махъсса талатавривугу цува захIматсса тагьарданий унува, аьралитал ххассал буллай ивкIун ур.
Ларгсса шинал сентябрь зуруй Запорожскаллал областьрай ва каялувшиву дуллалисса хъун дакъасса кьюкьа душманнал цIарахьхьун дирирну дур. Шанна ссятрал мутталий минарду дирхьусса кIанттурдайх, пахъ къадагьлагьисса цIаравух ва ивкIун ур аьралитал нигьачIаву дакъанийн буккан буллай. Яла, цувагу щавурду дирну унува, махъунай зана хьуну, талай ивкIун ур. Так душман махъаллил хьуну махъ оьвкуну бур кумаграйн. ОьлицIал хьусса Фархад операция буллай буна къуртал хьуну ур. Ванал каялувшиннаралусса разведовательный группалул хасъсса аьралий операция байбивхьуния шинмай бат увну ур 1000-нния ливчусса душман,10 пост,14 опорный пункт, чIярусса танкру, машинартту, ярагъ бусса складру.
Къуллугърал бурж биттур буллай ккаккан дурсса чувшиврухлу
аьпалул хьуну махъ Фархад Худайнатовлун дуллуну дур «Аьрасатнал Виричунал цIа», – бувсунни Саният ПатахIовал.
Фархадлул суратругу дургьуну, дуклаки оьрчIал бувсунни ванал дурсса виричушиврия, дурккунни назмурду.
Мажлис къуртал хьуну махъ, мероприятиялий гьуртту хьун бувкIминнахь барчаллагь увкунни Шамил Рамазановлул.
Андриана Аьбдуллаева
Имара Саидова
