Октябрьданий щалагу билаятрай кIицI лагай Бугьараминнал кьини. Жула республикалул шагьрурдай ва районнайгу бугьараминнал хIурмат-кьимат буллалисса тамансса мероприятияртту хьунни.
Ва кьинилуцIун бавхIусса мажлис хьунни ЧIяйннал шяравусса Магьирлугърал къатравугу. Шикку захIматрал ветерантуращал хьунабавкьунни Магьирлугърал къатрал хъунмур СалихIат Алхасова. Мажлисрай гьуртту хьунни ПатIимат Рамазанова, Шавлухъ Илдарова, Гулжагьра Шахабуттинова, ПатIимат СутIаева, Майсарат Рамазанова, МахIаммад Илдаров ва мукунма цаймигу. Мажлис бачин бувну бия СалихIат, ванил бувсунни байрандалул тарихраягу.
– Июльданул 1-нний 1992-ку шинал Аьрасатнал Верховный Советрал Президиумрал кьамул буссар хIукму, Щалагу Аьрасатнаву октябрь бугьараминнал барзну баян бувшиврийсса. Ва кьини баян баврил сававну хьуссар хIукуматрал учреждениярттал ва жяматийсса идарарттал къулагъас дулланшиврул, хъама къабитланшиврул бугьарами ва вайннал бувсса захIмат. Яла-яла, бугьара хьусса инсантурал чулухуннай ххишаласса къулагъас дулланшиврул ялун нанисса никирал, – увкунни ванил. Хъирив барча бунни захIматрал ветерантал.

– ХIурмат бусса ветерантал!
ЧIа тIий бура зун цIакьсса цIуллушиву, оьрчIал ххари буллай битаннав, вайннал дард къаккакканнав, дунияллий дакьаву хьуннав. Зул захIмат ялун нанисса никиран эбратну личIаннав!», – увкунни СалихIат Алхасовал. Бувккунни ванил бугьараминнан хас бувсса шеърирдугу. Мажлисрай жагьилминнахь насихIатру буллалисса ихтилатру бунни МахIаммад Илдаровлул, Майсарат Рамазановал ва ПатIимат СутIаевал.
Дуклаки оьрчIал чулуха нитти-буттахь, бава-ттаттахъахь барчаллагь увкунни Мирзаев Жамаллул ва Тугуев Аьбдуллул.
Хьунабакьаврийн бувкIми барчаллагьрай бия цивппа цачIун батIин савав хьусса СалихIат Алхасовайн.

Лажин хIадур дурссар
Имара Саидовал