Октябрьданул 29-нний ДР-лул ХIукуматрал къатраву парламентрал спикер Заур Аскандаровлул председательшиврий хьунни Халкьуннал Мажлисрал 37-мур сессия.

Ххал бивгьунни сайки 20 масъала. Миннувух бия мировой судиятал битаврил, Жагьилтурал парламентрал давурттал хIисав-китав даврил ва цIусса состав цIакь баврил масъалартту. Заур Аскандаровлул республикалул жагьилтурал ишир­ттал министр Камил Саэдовлун маслихIат бунни жагьилтурал центрду тIитIайни 12- 14 шинну хьусса оьрчI-бакIуннан социализациялунсса пространствартту дузал дувансса каши ххал дигьин. Парламентрал спикернал пикрилий, мукунсса центрду буван аьркинну бур циняв муниципалитетирттай.
– Уттигъанну нагу, оьрчIал ихтиярдал вакилналгу ххал бигьарду оьрмулул 12 – 14 шиннайн бияннинсса оьрчIал хIакъиравусса масъала. Ва группа бур хъинну ччяни къаччан бикIайсса, аьраттал буккайсса, мунияту жунма аьркинссар миннах къулагъас дуван. Буссар таваккул бутлатисса оьрчIал группа (группа риска), ми бур личIи-личIисса журалул учетрайсса оьрчIру, миннавух бур ярагъуннищалсса къалмакъаллал кIанттурдаясса, мигрантътурал ва цаймигу оьрчIру. Миннах дуллан аьркинссар личIинурасса къулагъас, – кунни Заур Аскандаровлул.
Ванал тапшур бунни мукунма ва давривух гьуртту хьун Халкьуннал Мажлисрал депутатътурайн ва Жагьилтурал парламентрал члентурайн.
Сессиялий цIакь бунни Жагьилтурал парламентрал цIусса состав.
Ттинин зий бивкIсса Жагьилтурал парламентрал члентурал цала даву къуртал дуллалиссар ноябрьданул 1-нний. Арилчинмур составравун ухлай ур 75 инсан, миннавату 50 батIул увссар конкурсрайну, ва ялагу 25 инсан ур политикалул партияр­ттал вакилтал.
Заур Аскандаровлул тIиму­нийну, традициярду аьркинссар никирая никирайн дачин дуллан ва салкьи бувсса опыт гьарза буллан. ЦIусса составран аьркинну бур цахъисгу мюнпатну зун, жагьилтурал мурадирттаву хъин чулийннайсса дахханашивуртту хьуншиврул.
Сессиялий парламентрал спикернал тапшур бунни республикалул циняв шагьрурдал лагмава дузал буван вацIрал ва паркирдал кIанттурду (лесопарковые зеленые пояса).
ХIакьину депутатътурал чIур­ду буллунни мукунсса кIан­ттурду Буйнакск шагьрулул лагмава 1029 гектарданий дузал баврихлу.
Заур Аскандаровлул пикрилий, мукунсса щюлли­сса кIанттурду дузал баврийну бю­хъантIий бур шагьрурдал экологиялул тагьар ххуй дуван.
Сессиялий ххал бивгьунни цаймигу масъалартту.
ХIадур бувссар
ХI. Аьдиловлул