Октябрьданул 28-нний Дагъусттаннал бакIчи Сергей Меликовлул дурунни агьали чIявуну бавтIсса кIанттурдай мюхчаншиву дуруччаврил хIакъиравусса батIаву, хаснура транспортрал инфраструктуралул объектирдай.
Ихтилат бия чIявусса инсантал салкьи хьусса кIанттурдай, стратегиялул чулуха агьамшиву дусса объектирдачIа, ххуллурдачIа ва транспортрал ххуллурду хIала бувхсса кIанттурдай видеоконтроль сакин баврил хIакъираву.
Сергей Меликовлул тIимунийну, цIанасса ппурттуву жяматийсса мюхчаншиву дуруччаврил даража лахъ баву ва аьдлу-низам дуруччаву цалчинмур ххуттайсса масъаларттуну хъанай бур. Мунияту ми масъалартту дузал буван аьркинну бур хьхьичIунми технологияртту щурущи даврил кумаграйну.
ХIакьину республикалий зий бур аппаратрал ва программалул гьанулий зузисса комплекс «Мюхчансса шагьру», ванил кумаграйну гьашину сияхIрайн ларсун дур миллиондалияр ххишаласса аьдлу-низам лиян давуртту. Амма му ихтиярду дуруччаврил цIушинна щурущи дуллалаву анавар дуккан дуван аьркинни.
Сергей Меликовлул бусаврийну, задачалул агьамшивугу хIисаврайн ларсун, язи бугьан аьркинни яла аьркинми (приоритетруми) объектру – миннувух бикIан аьркинссар дуккаврил, цIуллушиву дуруччаврил, транспортрал инфраструктуралул объектру. Лякъин аьркинссар мюхчаншиву дуруччаврил система лядуккан дуллансса харжлугъ.
«Му мурадрай республикалий бартдигьлай бур 2 концессия (паччахIлугърал ишбажаранчитуращалсса кьутIи), аьркинну дур му даву системалийн дуцин», – увкунни Сергей Меликовлул.
Дагъусттаннал бакIчинал дакIнин бувтунни, республикалий гьарца кьини ххуллул апатIру хъанай бушиву, микку цIунцIияртту хьусса, ливтIусса инсантал гьарза хъанай бушиву. Вай ишру чан хьуншиврул хъуннасса мяъна дикIантIий дур ххуллул кьяйдарду дуруччаврил ялув бацIаву гужлан даврил.
ЦIанасса ппурттуву республикалул ххуллурдай бивхьуну бур ххуллурдал кьяйдарду лиян даву чIалачIи байсса (фотовидеофиксации) ялун ххи бувсса стационар, мобиль ва 419 заназисса комплекс. Ва ххуллийсса даву аьркинссар гужлан дуллан», – увкунни Дагъусттаннал бакIчинал
Республикалий ххуллурдайх заназаврил мюхчаншиву дуруччаврил бутIувусса концессуал рязишивуртту бартдигьаврил хIакъираву бувсунни региондалул транспортрал ва ххуллул хозяйствалул министр Жамбулат Салавовлул.
Ванал тIимунийну, «Урбантех ТТ» компаниялущалсса рязишиврул кьутIилий ккаккан бувну бур федерал, региондалул ва кIанттул даражалул ххуллурдай бишин фотовидеофиксациялул 200 стационар комплекс. ХIакьинусса кьини «Паутина» программалуцIун бавзуну бур мукунсса 66 комплекс.
Цамургу «СКОБЖ» предприятиялул пландалий бур бишин 300 стационар комплекс ва ишла буван 10 мобиль комплекс пилот акъа леххайсса аппаратирттал гьанулий. ХIакьинусса кьини бивхьуну бур 100 стационар комплекс, цалсса вай бавзуну бакъар «ПаутиналуцIун».
«Урбантех ТТ» компаниялущалсса рязишиврул кьутIилийн бувну, региондалул бюджетравун дучIантIий дур ялун ххи дурсса 6,38 млрд къурушру. «СКОБЖ» компаниялущалсса кьутIилийн бувну, бюджетравун дучIантIий дур ялун ххи дурсса 11, 58 млрд къуруширтттал.
Жамбулат Салавовлул бувсунни «Мюхчансса шагьру» пограммалул комплексрал лябуккулул хIакъиравугу.
Ххал бигьлагьисса масъалалул хIакъираву махъ лавхъунни республикалул граждан обороналул, ляличIисса тагьардал ва тIабиаьтрал апатIирттал биян бувсса зараллу бухлаган баврил иширттал министр Нариман КазимахIаммадовлул. Ванал тIимунийну, МЧС-лул зузи бувну бур «Мюхчансса шагьрулул» 7 сегмент.
Му дур республикалул ххуллурдай ххуллул кьяйдарду лиян даву чIалачIи дайсса система (фото-видео фиксация); машинартту чIявуну заназисса автомобиллал ххуллурдай ва чIявусса инсантал салкьи хьусса кIанттурдай интеллектуал видеонаблюдениялул ва видеоаналитикалул система; камерарттава транспортрал паччахIлугърал регистрациялул знакирттал хIакъиравусса информация батIайсса ва ми зана-кьала байсса подсистема; агьалинайн баян байсса региондалул система;
агьалинайн анаварну баян байсса комплексрал система;
транспортрай информированиялул ва оповещаниялул чулуха буруччаврил система; цасса «112» номерданий анаварсса оператив къуллугъирттайн оьвчайсса система.
ЦIанасса ппурттуву вай цинярда сегментру чялишну ишла дуллай буссар ва вайннул ккаккан дунни цала мюнпатшиву, – увкунни КазимахIаммадовлул.
БатIаврил хIасиллу дуллалисса махъгу лавхъун, цаппара тапшурлугъругу дурунни Сергей Меликовлул.
