Оьмаханнул арс Минкаил Вагьабов

Увну ур Минкаил Лакрал райондалийсса Кьубиял шяраву 1954-кусса шинал. Ккурккуллал шяраву 1971-ку шинал дянивмур даражалул школа бувккуну махъ, къуртал бувну бур Да­гъусттаннал медициналул институтрал хъин бай ­факультет. Муния мукьах зий ивкIун ур Челябинскаллал областьрай, Миасс тIисса шагьрулий.
Медучилищалуву дарсру дихьлай унува, интернатурагу къуртал бувну, зун ивкIун ур терапевтну, пульмонологну, кардиологну, яла – терапиялул отделениялул ­хъунаману.
1988-ку шинал, кIураавну Дагъусттаннайн, зун ивкIун ур Къизилюртуллал Центральный азарханалий невропатологну, кардиологну. Махъсса шиннардий ва зий ур Къизилюртуллал шагьрулийсса «Здоровье» тIисса Медициналул центрданий кардиологну. ВаницIуна ва биттур буллай ур Хъунив хьуминнал къатрал (Дом престарелых) хIакиннал къуллугъгу.
ХIакиннал пишалий зий Оьмаханнул арс Вагьабов Минкаиллул хьуну дур 47 шин. Ванал хIалал дурну дур «Дагъусттан Рес­публикалул отличник» ва «Дагъусттан Республикалул лайкь хьусса хIакин» тIисса бусравсса цIарду.
ХIакин хIисаврай Минкаил ци даражалул специалист уссарив тасттикь буллай бур цIуллу-сагъшиву дуруччаврил ялув гьарца кьини ваначIан букIлакIисса инсантурал аьдадрал. Ва кьамулгу буллай ур къашайшалт, сайки мутта лях бакъа, кIюрххия кьунниялнин.
Минкаиллуя бувсмуницIун ххи къабувну кьабитан къахьунссар ца цамур затгу. Ванал ппу Вагьаблул арс Оьмахангу цIа машгьур­сса ва хIурматрайсса инсан ур цала жяматрал дянивгу, кьатIувгу. ЛичIи-личIисса шиннардий ва зий ивкIун ур Кьубиял колхозрал парторганизациялул секретарьну, шяраваллил советрал председательну, учительну. Му бакъассагу, хъинну чIярусса ва кьимат ххисса материаллугу цачIун дурну, чивчуну, 2008-ку шинал Оьмаханнул бу­ккан бунни дунияллийн «Лакрал къапу – Кьубиял къала» тIисса цала жяматрал тарихран хас бувсса жуж.
Шиккува кIицI лаган, «Илчи» буккултран цимиллагу итталун дагьну дикIантIиссар Оьмахан Вагьабов авторсса мюрщи-хъунисса макьаларттугу. ХIакьинусса кьинигу Оьмахан оьрмулул 95 шинаву цIуллуну-сагъну яхъанай ур цала агьлу-авладрал дянив.

---

1. Цукунсса хьуна оьрчI­ний вийнма яла гужсса асар биян бувсса зат, иш?

– Юрий Гагарин космосравун левхсса кьини – 12.04.1961 шин.

2.Цими никирайн ­ди­я­ннинсса кIулли вин вила ппухълуннал нясав? Буси яла архманал цIа.

– КIулли ряхра никирайн дияннинсса: Минкаил, ­Оьмахан, Аьвдул-Вагьаб, Аьли, Дандама, МухIаммад.

3. Вила оьрмулуву яла алши бакъамур шин?

– 2006-ку шин. Му ­шинал ивкIуссия ттул арс Рашид.

4. Яла алши бумур шин?

– 1978-ку шин. Нава Мам- ­­­­­­ла­кат­лущал ташулул хьусса шин. Му ­цуксса тIайлабацIу бу­­сса шин хьуссарив гьарца кьини, тIиссакссагу, мяйжан хъанай бур ттун.

5. ВичIара циксса арцу хьувкун дигьаларгун дикIанссия вил дакI?

– Арцул дигьалаган дайсса дакI му дакI дакъар.

6. Ссан диял къашай вил чIун?

– ЧIун тачIаврагу, ссан­кIуйрагу диял къашай, ци дуллай ухьурчагу. Диял къашай игьалагансса чIунгу.

7. Бартлавгун ччисса вила шанма мурад?

– Шанма мурад:
а) дунияллийсса муданна­сса дакьаву;
б) ттула кулпатгу, гъанчугу, дусталгу цIуллуну ­битаву;
в) ттуятува бивзсса наслу тIайлабацIусса шаву.

8. Вила оьрмулуву хъинну ххирасса кIантту бувгьусса шама инса­ннал цIа (нину-ппу къа­хIисавну)?

– Шамагу ттула учительтал хъанай бур:
Аьбдуллагь Мирзаев (учитель); АьлихIажи Аьлиев (Кьубиял ххаллилсса педагог-филолог); Валентина ­Александровна (ванилла на хIакин хьун увсса).

9. Винма ххуй бизайсса хъамитайпалул сурат?

– Намус-адаврал бувччу­сса, аькьилну-иминсса хъамитайпа.

10. Вина кьамулсса чув-адаминал сурат?

– ЯхI-къириятралгу алгусса, ухманай рахIму-цIимигу чан бакъасса чув-адамина.

11. Агарда бюхъайсса бивкIссания, инава ци кIанттай, ци чIумал увну ва ци билаятрай яхъанай ччива вин?

– Лаккуй, Дагъусттаннай, хIакьину, вана ва чIумал.

12. Ссаяту бикIай вил яла хъунмур пахру?

– Нава лаккучу ушиврия, дагъусттанлув ушиврия.

13. Цукунсса дур вил ­виятурасса къарязишиву?

– ХIакьину дан бюхъаймур гьунттинин дитлатаву.

14. Яла къаххирамур дук­ра?

–Къаххирасса дукра дикIан къааьркинссар.

15. Яла ххирамур дук­ра?

– Кьаркь дикIгу, ккурккимайнгу, ххункIгу.

16. Ссаятусса бикIай яла хъунмамур хIучI?

– Ахиратраясса, Аллагьнахьхьун жаваб дулун багьавриясса.

17. Хьуссарив вил оьрмулуву винна инара ттинин багъишла ритан къахъанахъисса къел?

– Хьуссар. Амма къабувснува битан ччай ура.

18. Лавгсса заманардавасса цIанихсса инсантуравасса цуманащал хьунаакьин ччива вин?

– МухIаммад Идавсищал (с.аь.с).

19. Цукунсса бур, вил ­пик­рилий, лакрал миллатрал яла хъунмур буруккин?

– Ниттил мазгу, миллатрал тарихгу хъамабитлатаву.

20. Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ­ххуйнугу, ххаллилнугу ялапар ­хъананшиврул?

– Коррупциягу, казнокрадствагу, клановостьгу.