Октябрь зурул 27-нний Москавлив, ва ялун нанисса бигьалагай кьини, Аьрасатнал президентначIасса Дагъусттаннал Постпредствалийн батIинтIиссар гьашинугу Москавлив ва лагма-ялттусса гъансса шагьрурдай яхъанахъисса лак ниттил мазрайсса диктант чичин.
Ва даврил сиптачиталгу кIицI лавгсса Постпредствагур, Москавливсса Дагъусттаннал Культуралул центр ва Мариян Илиясовал цIанийсса «Дараччи» фондри. ДукIугу бавтIссия Москавливсса лак диктант чичин, дукIумур диктант хас дурссия Расул ХIамзатовлун 100 шин шаврин. ДукIу бавтIссия М.И. Рудоминол цIанийсса кьатIаллил билаятирттал литературалул библиотекалувун. Ванийн кутIану «Иностранка» учай. Гьашинумур диктант хас дуллалиссар Дагъусттаннал халкьуннал шаэр ва классик Сулайман Стальскийн 155 шин шаврин ва лакрал машгьурсса шаэр, прозаик, таржумачи, публицист, литературовед МахIаммад-Загьид Аминовлун 85 шин шаврил юбилейран. Диктантрал текстгу МахIаммад-Загьид Аминов авторсса текстри.
«Ниттил маз ххирашиву ва муний гъалгъа тIутIаву, ниттил мазрайсса диктант чичин бучIавугу – мугу жува гъурбатрай бунугу, ниттил маз ябансса хъит бушивугур, жулва буттал кIану ххирашиврул ца лишанни. Ялун нанисса никиран жулва ххаллилсса чичултрал произведениярттая хавар бикIавур. Ва давугу лавайсса даражалий тIайла дуккан хIарачатрай буру, МахIаммад-Загьид Аминовлул дарс дирхьусса студенткахъул хIисаврай ва давриха зун тIайлабацIу шаврия ххарину бунугу, жуйрасса жаваблушиннагу кIулну», – тIий бур Дагъусттаннал Культуралул центрданул президиумрал член Басират Билалова. Диктант чичаву дакъа, цаймигу бахшишру дуссар. Лакку мазрайсса луттирдал выставка, лакрал зунттал халкьуннал оьрму, ичIаллил багьу-бизу чIалачIи буллалисса суратирттал выставка, миллатирттал хьхьичIарасса лаххия, лакрал халкьуннал дукрарду, концертрал программа. Балайрду учинтIиссар машгьурсса балайчитурал. Лакрал театрданул артистътурал ккаккан бантIиссар «Вассалам, вакалам» спектакльданувасса парча. Гьаннайсса, программа хъуннассар, уттива программалул барт ттирихIлай аьч къадулланна, бавнунияр ккавккун хъинссар, бухьхьияра бучIан шайми. Миллатрал бюхттулсса шаэр МахIаммад-Загьид Аминовлул юбилейран хас дурсса лакку байран хьунтIиссар билаятрал хъуншагьурулий.
Ва даврия зухь бусан Москавлийн наниссар «Илчилул» корреспондентгу. Барчаллагьрай кIицI лаганну, гьар шинах кунма, гьашинугу диктантраха зузисса Сакиншиннарал комитетраву «Илчилул» вакил ушивугу. Ччя-ччяни ххал булувара «Илчилул» сайтгу, къадурнал подписка дувара «Илчилул» Телеграм-каналданийнгу. Диктант дайдирхьуну къуртал хьуннинсса репортаж дикIантIиссар ва нанисса ппурттувура Телеграм-каналданий. Зувагу мяйжаннугусса лакрал байрандалийн багьсса, цачIу-чIарав бусса кунмасса иш бикIантIиссар.
ПатIимат Рамазанова
